Hum se Abdullah bin Rajaa ne byaan kiya , kaha hum ko Shubah ne khabar di , unhein Hakam ne , unhein Ibrahim Nakhai se aur woh Aswad se ke Aisha razi Allahu anha ne Barira razi Allahu anha ko khareedne ka irada kiya lekin in ke malikon ne kaha ke woh isi shart par unhein baich sakte hain ke Barira ka tarka hum lein aur in ke saath walaa' (aazadi ke baad) unhi se qaim ho . Aisha razi Allahu anha ne jab is ka zikr Nabi Karim salla Allahu alaihi wasallam se kiya to Aap ne farmaya ke unhein khareed kar aazad kar do . Tarka to isi ko mile ga jo laundi ghulam ko aazad kare aur walaa' bhi isi ke saath qaim ho sakti hai jo aazad kare aur Nabi Karim salla Allahu alaihi wasallam ke samne gosht laya gaya phir kaha ke yeh gosht Barira razi Allahu anha ko sadqa kiya gaya tha . Nabi Karim salla Allahu alaihi wasallam ne farmaya ke woh un ke liye sadqa hai aur hamare liye in ka tuhfa hai . Hum se Adam bin Abi Iyas ne byaan kiya , in se Shubah ne byaan kiya aur is riwayat mein yeh izafa kiya ke phir (aazadi ke baad) unhein un ke shohar ke mutalliq ikhtiyar diya gaya (ke chahein un ke paas rahein aur agar chahein un se apna nikah torr lein) .