Hum se Abdullah Bin Muslimah ne bayan kiya, kaha hum se Laith ne bayan kiya, un se Ibn Shihab ne, un se Urwah ne aur unhein Aisha (Radi Allahu Anha) ne khabar di ke Barirah, Aisha (Radi Allahu Anha) ke yahan apni mukatabat ke baare mein un se madad lene ke liye aayin, unhon ne abhi tak is maamle mein (apne malkon ko) kuch diya nahi tha. Aisha (Radi Allahu Anha) ne un se farmaya ke apne malkon ke yahan ja kar (un se daryaft karo) agar wo ye surat pasand karein ke tumhari mukatabat ki sari raqam mein ada kar doon aur tumhari wala mere liye ho jaye to mein aisa kar sakti hoon. Barirah ne is ka tazkira jab apne malkon ke samne kiya to unhon ne inkar kiya aur kaha ke wo (Aisha Radi Allahu Anha) agar chahein to ye kaar-e-sawab tumhare sath kar sakti hain lekin wala to hamari hi rahegi. Aisha (Radi Allahu Anha) ne is ka zikr Rasul Allah (Sallallahu Alaihi Wasallam) se kiya to Aap (Sallallahu Alaihi Wasallam) ne un se farmaya ke tum unhein khareed kar azad kar do, wala to baharhaal usi ki hoti hai jo azad kar de
.