Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Hisham Bin Urwah ne, unhein un ke baap Urwah ne, aur un se Aisha (Radi Allahu Anha) ne bayan kiya ke mere paas Bareerah (Radi Allahu Anha) (jo is waqt tak bandi theen) aayiein aur kehne lageein ke mein ne apne malikon se nau oqiya chandi par kitabat kar li hai. Shart ye hui hai ke har saal ek oqiya chandi unhein diya karoon. Ab aap bhi meri kuch madad kijiye. Is par mein ne is se kaha ke agar tumhare malik ye pasand karein ke yak musht un ka sab rupiya mein un ke liye (abhi) muhayya kar doon aur tumhara tarka mere liye ho to mein aisa bhi kar sakti hoon. Bareerah (Radi Allahu Anha) apne malikon ke paas gayein. Aur Aisha (Radi Allahu Anha) ki tajweez un ke samne rakkhi. Lekin unhon ne is se inkar kiya, phir Bareerah (Radi Allahu Anha) un ke yahan wapas aayiein to Rasul Allah (Sallallahu Alaihi Wasallam) (Aisha Radi Allahu Anha ke yahan) baithe hue thay. Unhon ne kaha ke mein ne to aap ki soorat un ke samne rakkhi thi magar wo nahi mante balkay kehte hain ke tarka to hamara hi rahe ga. Nabi Kareem (Sallallahu Alaihi Wasallam) ne ye baat suni aur Aisha (Radi Allahu Anha) ne bhi aap ko haqeeqat-e-haal se khabar ki. To Aap (Sallallahu Alaihi Wasallam) ne farmaya ke Bareerah ko tum le lo aur unhein tarka ki shart lagane do. Tarka to isi ka hota hai jo azad kar'e. Aisha (Radi Allahu Anha) ne aisa hi kiya. Phir Nabi Kareem (Sallallahu Alaihi Wasallam) utth kar logon ke majma mein tashreef le gaye aur Allah ki hamd-o-thana ke baad farmaya, Amma Ba'ad! kuch logon ko kya ho gaya hai ke wo (khareed-o-farokht mein) aisi shartien lagate hain jin ki Kitab-ul-Lah mein koi asal nahi hai. Jo koi shart aisi lagayi jaye jis ki asal Kitab-ul-Lah mein na ho wo baatil ho gi. khwah aisi sau shartien koi kyun na lagaye. Allah Ta'ala ka hukm sab par muqaddam hai aur Allah ki shart hi bahut mazboot hai aur wala to isi ki hoti hai jo azad kare
.