Hum se Abdullah bin Yusuf Taneesi ne byaan kiya , kaha hum ko Imam Malik ne khabar di unhein Rabia bin Abu Abdur Rahman ne unhein Qasim bin Muhammad ne aur un se Aisha razi Allahu anha ne byaan kiya ke Barira ke saath teen sunnat qaim hoti hain , unhein aazad kiya aur phir ikhtiyar diya gaya (ke agar chahein to apne shohar sabiqa se apna nikah faskh kar sakti hain) aur Rasool Allah salla Allahu alaihi wasallam ne (Barira razi Allahu anha ke baare mein) farmaya ke walaa' aazad karane wale ke saath qaim hui hai aur Nabi Karim salla Allahu alaihi wasallam ghar mein dakhil huay to ek haandi (gosht ki) choolhay par thi . Phir Nabi Karim salla Allahu alaihi wasallam ke liye roti aur ghar ka salan laya gaya . Aap salla Allahu alaihi wasallam ne farmaya ke (choolhay par) haandi (gosht ki) bhi to main ne dekhi thi . Arz kiya gaya ke woh haandi is gosht ki thi jo Barira ko sadqa mein mila tha aur Aap salla Allahu alaihi wasallam sadqa nahi khate . Nabi Karim salla Allahu alaihi wasallam ne farmaya ke woh is ke liye sadqa hai aur ab hamare liye in ki taraf se tuhfa hai . Hum usay kha sakte hain .