Hum se Khallad Bin Yahya ne bayan kiya, kaha hum se Abdul Wahid Bin Aiman Makki ne bayan kiya, un se un ke baap ne bayan kiya ke mein Aisha (Radi Allahu Anha) ki khidmat mein hazir hua to aap ne batlaya ke Barirah (Radi Allahu Anha) mere yahan aayin, unhon ne kitabat ka maamla kar liya tha. Mujh se kehne lagein ke ae Umm-ul-Momineen! Mujhe aap khareed lein, kyunke mere malik mujhe bechne par amada hain, phir aap mujhe azad kar dena. Aisha (Radi Allahu Anha) ne farmaya ke haan (mein aisa kar loon gi) lekin Barirah (Radi Allahu Anha) ne phir kaha ke mere malik mujhe isi waqt bechein ge jab wo wala ki shart apne liye laga lein. Is par Aisha (Radi Allahu Anha) ne farmaya ke phir mujhe zaroorat nahi hai. Jab Nabi Kareem (Sallallahu Alaihi Wasallam) ne suna, ya Aap (Sallallahu Alaihi Wasallam) ko maloom hua (rawi ko shuba tha) to Aap (Sallallahu Alaihi Wasallam) ne farmaya ke Barirah (Radi Allahu Anha) ka kya maamla hai? Tum unhein khareed kar azad kar do, wo log jo chahein shart laga lein. Aisha (Radi Allahu Anha) ne kaha ke mein ne Barirah ko khareed kar azad kar diya aur is ke malik ne wala ki shart apne liye mehfooz rakkhi. Aap (Sallallahu Alaihi Wasallam) ne yehi farmaya ke wala usi ki hoti hai jo azad kare (doosre) jo chahein shart lagate rahein
.