Hum se Qutaibah Bin Saeed ne bayan kiya, kaha hum se Laith ne bayan, un se Ibn Shihab ne, un se Ubaidullah Bin Abdullah Bin Utbah Bin Masood ne aur un se Abu Hurairah aur Zaid Bin Khalid Juhani (Radi Allahu Anhuma) ne bayan kiya ke ek dehati sahabi Rasul Allah (Sallallahu Alaihi Wasallam) ki khidmat mein hazir hue aur kaha ke ya Rasul Allah! Mein aap se Allah ka wasita de kar kehta hoon ke aap mera faisla Kitabullah se kar dein. Doosre fareeq ne jo is se zyada samajh dar tha, kaha ke jee haan! Kitabullah se hi hamara faisla farmaiye, aur mujhe (apna muqaddama pesh karne ki) ijazat dijie. Aap (Sallallahu Alaihi Wasallam) ne farmaya ke pesh kar. Us ne bayan karna shuru kiya ke mera beta in sahab ke yahan mazdoor tha. Phir us ne in ki biwi se zina kar liya, jab mujhe maloom hua ke (zina ki saza mein) mera larka rajm kar diya jayega to mein ne us ke badle mein so bakriyan aur ek bandi di, phir ilm walon se us ke baare mein poocha to unhon ne bataya ke mere larke ko (zina ki saza mein kyunke wo ghair shadi shuda tha) so kore lagaye jayein ge aur ek saal ke liye shehar badar kar diya jayega. Albatta is ki biwi rajm kar di jayegi. Rasul Allah (Sallallahu Alaihi Wasallam) ne farmaya "Is zat ki qasam! Jis ke hath mein meri jaan hai, mein tumhara faisla Kitabullah hi se karoon ga. Bandi aur bakriyan tumhein wapas milein gi aur tumhare bete ko so kore lagaye jayein ge aur ek saal ke liye jila watan kiya jayega. Accha Anis! Tum is aurat ke yahan jao, agar wo bhi (zina ka) iqrar kar le, to ise rajm kar do (kyunke wo shadi shuda thi) bayan kiya ke Anis (Radi Allahu Anhu) is aurat ke yahan gaye aur us ne iqrar kar liya, is liye Rasul Allah (Sallallahu Alaihi Wasallam) ke hukm se wo rajm ki gayi."
.