Hum se Ismail bin Abi Oways ne bayan kiya, kaha ke mujh se Imam Malik ne bayan kiya, in se Ibn Shihab ne, in se Ubaidullah bin Utbah bin Masood razi Allahu anhu ne, unhein Abu Hurairah razi Allahu anhu aur Zayd bin Khalid razi Allahu anhu ne khabar di ke do aadmiyon ne Rasool Allah salla Allahu alaihi wasallam ki majlis mein apna jhagra pesh kiya. In mein se ek ne kaha ke hamare darmiyan Aap Kitab-ullah ke mutabiq faisla kar dein. Doosre ne, jo zyada samajh-dar tha kaha ke theek hai, ya Rasool Allah! Hamare darmiyan Kitab-ullah ke mutabiq faisla kar dijiye aur mujhe ijazat dijiye ke is muamla mein kuch arz karoon. Nabi Karim salla Allahu alaihi wasallam ne farmaya ke kaho. In sahab ne kaha ke mera larka is shakhs ke yahan «aseefun» tha. «aseefun» , «al-ajeeru» ko kehte hain. ( «al-ajeeru» ke maani mazdoor ke hain) aur is ne is ki biwi se zina kar liya. Unhon ne mujh se kaha ke ab mere larke ko sangsar kiya jaye ga. Is liye (is se najat dilaane ke liye) main ne sau bakriyon aur ek londi ka unhein fidya de diya phir main ne doosre ilm walon se is masla ko poochha to unhon ne bataya ke mere larke ki saza yeh hai ke usay sau koray lagaye jayein aur ek saal ke liye shehar-badar kar diya jaye, sangsari ki saza sirf is aurat ko ho gi. Is par Nabi Karim salla Allahu alaihi wasallam ne farmaya ke is zaat ki qasam jis ke hath mein meri jaan hai main tumhara faisla Kitab-ullah ke mutabiq karoon ga. Tumhari bakriyaan aur tumhari londi tumhein wapas ho gi aur phir Aap ne is ke larke ko sau koray lagwaye aur ek saal ke liye jala-watan kar diya. Phir Aap ne Unais Aslami se farmaya ke mud-dayee ki biwi ko laaye aur agar woh zina ka iqrar kare to usay sangsar kar de. Is aurat ne zina ka iqrar kar liya aur sangsar kar di gayi.