Kyunke Allah Ta'ala ne farmaya hai «masna wa sulasa wa rubaa-a» wao «au» ke maani mein hai . (yani do biwiyaan rakkho ya teen ya char) Zayn-ul-Aabideen bin Husain alaihis-salam farmate hain yani do ya teen ya char jaise Surah Fatir mein is ki nazeer maujood hai «ulee ajnihatim masna wa sulasa wa rubaa-a» yani ”do pankh wale farishte ya teen wale ya char pankh wale .“

Hum se Muhammad bin Salam Baykandi ne byaan kiya , kaha hum ko Abdah ne khabar di , unhein Hisham ne , unhein un ke walid ne aur unhein Aisha razi Allahu anha ne Allah Ta'ala ke irshad «wa in khiftum alla tuqsitoo fil yataama» ”aur agar tumhein khauf ho ke tum yateemon se baare mein insaf nahi kar sako ge .“ Ke baare mein farmaya ke is se murad yateem larki hai jo apne wali ki parwarish mein ho . Wali is se is ke maal ki wajah se shadi karte aur achhi tarah is se sulook na karte aur na is ke maal ke baare mein insaf karte aise shakhson ko yeh hukm hua ke is yateem larki se nikah na karein balkay is ke siwa jo auratein bhali lagein un se nikah kar lein . Do do , teen teen ya char char tak ki ijazat hai .