Hum se Qutaybah bin Saeed ne byaan kiya , kaha hum se Yaqoob bin Abdur Rahman ne byaan kiya , un se Abu Hazim Salamah bin Dinar ne , un se Sahl bin Saad razi Allahu anhu ne ke ek khatoon Rasool Allah salla Allahu alaihi wasallam ki khidmat mein hazir huien aur arz kiya: ya Rasool Allah! Main Aap ki khidmat mein apne aap ko hiba karne aayi hoon . Nabi Karim salla Allahu alaihi wasallam ne in ki taraf dekha aur nazar utha kar dekha , phir nazar neechi kar li aur sar ko jhuka liya . Jab khatoon ne dekha ke Nabi Karim salla Allahu alaihi wasallam ne in ke baare mein koi faisla nahi farmaya to baith gayin . Is ke baad Aap ke sahabah mein se ek sahab kharay huay aur arz kiya ke ya Rasool Allah! Agar Aap ko in ki zaroorat nahi to in ka nikah mujh se kara dijiye . Nabi Karim salla Allahu alaihi wasallam ne daryaft farmaya ke tumhare paas koi cheez hai ? Unhon ne arz ki ke nahi ya Rasool Allah, Allah ki qasam! Nabi Karim salla Allahu alaihi wasallam ne farmaya ke apne ghar jao aur dekho shayad koi cheez mil jaye . Woh gaye aur wapas aa kar arz ki ke nahi ya Rasool Allah! Main ne koi cheez nahi paayi . Nabi Karim salla Allahu alaihi wasallam ne farmaya aur dekh lo , agar ek lohe ki angoothi bhi mil jaye . Woh gaye aur wapas aa kar arz kiya: ya Rasool Allah! Mujhe lohe ki angoothi bhi nahi mili , albatta yeh mera tehband hai . Sahl razi Allahu anhu ne byaan kiya ke in ke paas chadar bhi nahi thi (in sahabi ne kaha ke) in khatoon ko is tehband mein se aadha inayat farma dijiye . Nabi Karim salla Allahu alaihi wasallam ne farmaya ke yeh tumhare tehband ka kiya kare gi agar tum usay pehno ge to is ke liye is mein se kuch baqi nahi rahe ga . Is ke baad woh sahab baith gaye aur der tak baithe rahe phir kharay huay to Rasool Allah salla Allahu alaihi wasallam ne unhein wapas jaate huay dekha aur unhein bulane ke liye farmaya , unhein bulaya gaya . Jab woh aaye to Aap salla Allahu alaihi wasallam ne in se daryaft farmaya ke tumhare paas Quran Majeed kitna hai . Unhon ne arz kiya falan falan surtein . Unhon ne in suraton ko ganaya . Nabi Karim salla Allahu alaihi wasallam ne farmaya ke kiya tum in suraton ko zabani parh lete ho . Unhon ne haan mein jawab diya . Nabi Karim salla Allahu alaihi wasallam ne phir farmaya ke jao main ne is khatoon ko tumhare nikah mein is Quran ki wajah se diya jo tumhare paas hai . In suraton ko is se yaad kara do .