Hum se Abdullah bin Maslamah ne bayan kiya, kaha hum se Abd-ul-Aziz bin Abi Hazim ne bayan kiya, in se un ke walid ne aur unhon ne Sahl razi Allahu anhu se suna, unhon ne bayan kiya ke ek aurat Nabi Karim salla Allahu alaihi wasallam ki khidmat mein hazir huien aur arz ki ke main apne Aap ko hiba karne aayi hoon, der tak woh aurat khari rahi. Nabi Karim salla Allahu alaihi wasallam ne unhein dekha aur phir sar jhuka liya jab der tak woh wahien khari rahien to ek sahab ne uth kar arz kiya: agar Nabi Karim salla Allahu alaihi wasallam ko in ki zaroorat nahi hai to in ka nikah mujh se kar dein. Aap salla Allahu alaihi wasallam ne farmaya, tumhare paas koi cheez hai jo mahr mein unhein de sako, unhon ne kaha ke nahi. Aap salla Allahu alaihi wasallam ne farmaya ke dekh lo. Woh gaye aur wapas aa kar arz kiya ke wallah! Mujhe kuch nahi mila. Nabi Karim salla Allahu alaihi wasallam ne farmaya ke jao talash karo, lohe ki ek angoothi hi sahi. Woh gaye aur wapas aa kar arz kiya ke woh mujhe lohe ki ek angoothi bhi nahi mili. Woh ek tehband pehne huay thay aur in ke jism par (kurte ki jagah) chadar bhi nahi thi. Unhon ne arz kiya ke main unhein apna tehband mahr mein de doon ga. Aap salla Allahu alaihi wasallam ne farmaya ke agar tumhara tehband yeh pehan lein gi to tumhare liye kuch baqi nahi rahe ga. Aur agar tum usay pehan lo ge to in ke liye kuch nahi rahe ga. Woh sahab is ke baad ek taraf baith gaye phir jab Nabi Karim salla Allahu alaihi wasallam ne unhein jaate dekha to Aap salla Allahu alaihi wasallam ne unhein bulwaya aur farmaya tumhein Quran kitna yaad hai? Unhon ne arz kiya ke falan falan suratein. Unhon ne suraton ko shumar kiya. Nabi Karim salla Allahu alaihi wasallam ne farmaya ke ja main ne is aurat ko tumhare nikah mein is Quran ke iwaz mein de diya jo tumhein yaad hai.