Hum se Ahmad bin Miqdam ne byaan kiya , kaha hum se Fudayl bin Sulayman ne byaan kiya , kaha hum se Abu Hazim ne byaan kiya , kaha hum se Sahl bin Saad razi Allahu anhu ne byaan kiya ke hum Nabi Karim salla Allahu alaihi wasallam ki khidmat mein baithe huay thay ke ek khatoon aayin aur apne aap ko Nabi Karim salla Allahu alaihi wasallam ke liye pesh kiya . Nabi Karim salla Allahu alaihi wasallam ne unhein nazar neechi oopar kar ke dekha aur koi jawab nahi diya phir Aap ke sahabah mein se ek sahabi ne arz kiya: ya Rasool Allah! In ka nikah mujh se kara dijiye . Nabi Karim salla Allahu alaihi wasallam ne daryaft farmaya ke tumhare paas koi cheez hai ? Unhon ne arz kiya ke mere paas to kuch nahi . Aap salla Allahu alaihi wasallam ne daryaft farmaya ke lohe ki angoothi bhi nahi ? Unhon ne arz kiya ke lohe ki ek angoothi bhi nahi hai . Albatta main apni yeh chadar phaar ke aadhi unhein de doon ga aur aadhi khud rakhoon ga . Nabi Karim salla Allahu alaihi wasallam ne farmaya ke nahi , tumhare paas kuch Quran bhi hai ? Unhon ne arz kiya ke hai . Nabi Karim salla Allahu alaihi wasallam ne farmaya ke phir jao main ne tumhara nikah in se is Quran Majeed ki wajah se kiya jo tumhare saath hai .