Aur Mugheerah bin Shubah ne ek aurat ko nikah ka paigham diya aur sab se qareeb ke rishta-dar is aurat ke wahi thay . Aakhir unhon ne ek aur shakhs (Usman bin Abi al-Aas) se kaha , us ne in ka nikah parha diya aur Abdur Rahman bin Auf ne Umm Hakeem bint Qaariz se kaha tu ne apne nikah ke baab mein mujhko mukhtar kiya hai , main jis se chahoon tera nikah kar doon . Is ne kaha haan . Abdur Rahman ne kaha to main ne khud tujh se nikah kiya . Aur Ata bin Abi Rabah ne kaha do gawahon ke samne is aurat se keh de ke main ne tujh se nikah kiya ya aurat ke kunba walon mein se (go door ke rishta-dar hon) kisi ko muqarrar kar de (woh is ka nikah parha de) aur Sahl bin Saad Saadi ne riwayat kiya ke ek aurat ne Nabi Karim salla Allahu alaihi wasallam se kaha main apne aap ko bakhsh deti hoon , is mein ek shakhs kehne lagaya Rasool Allah! Agar Aap ko is ki khwahish na ho to mujh se is ka nikah kar dijiye .

Hum se Ibn Salam ne byaan kiya , kaha hum ko Abu Muawiyah ne khabar di , kaha hum se Hisham ne , in se un ke walid ne aur un se Aisha razi Allahu anha ne aayat «wayastaftoonaka fin-nisa'i qulillahu yufteekum feehinna» ”aur Aap se auraton ke baare mein masla poochte hain , Aap keh dijiye ke Allah in ke baare mein tumhein masla batata hai .“ Aakhir aayat tak farmaya ke yeh aayat yateem larki ke baare mein nazil hui , jo kisi mard ki parwarish mein ho . Woh mard is ke maal mein bhi shareek ho aur is se khud nikah karna chahta ho aur is ka nikah kisi doosre se karna pasand na karta ho ke kahin doosra shakhs is ke maal mein hissa-dar na ban jaye is gharz se woh larki ko roke rakkhe to Allah Ta'ala ne logon ko is se mana kiya hai .