Hum se Abdullah bin Yusuf Taneesi ne byaan kiya , kaha hum se Imam Malik ne khabar di , unhein Abu Hazim Muslim bin Dinar ne aur in se Sahl bin Saad Saadi razi Allahu anhu ne byaan kiya ke ek aurat Rasool Allah salla Allahu alaihi wasallam ke paas aayi aur kaha ke main apne aap ko Aap ke liye hiba karti hoon . Phir woh der tak khari rahi . Itne mein ek mard ne kaha ke agar Nabi Karim salla Allahu alaihi wasallam ko is ki zaroorat na ho to is ka nikah mujh se farma dein . Aap salla Allahu alaihi wasallam ne daryaft farmaya ke tumhare paas unhein mahr mein dene ke liye koi cheez hai ? Is ne kaha ke mere paas is tehband ke siwa aur kuch nahi . Nabi Karim salla Allahu alaihi wasallam ne farmaya ke agar tum apna yeh tehband is ko de do ge to tumhare paas pehnne ke liye tehband bhi nahi rahe ga . Koi aur cheez talash kar lo . Is mard ne kaha ke mere paas kuch bhi nahi . Aap salla Allahu alaihi wasallam ne farmaya ke kuch to talash karo , ek lohe ki angoothi hi sahi! Usay woh bhi nahi mili to Nabi Karim salla Allahu alaihi wasallam ne daryaft farmaya . kiya tumhare paas kuch Quran Majeed hai ? Unhon ne arz kiya ke ji haan! Falan falan surtein hain , in suraton ka unhon ne naam liya . Nabi Karim salla Allahu alaihi wasallam ne farmaya ke phir hum ne tera nikah is aurat se in suraton ke badle kiya jo tum ko yaad hain .