Hum se Amr bin Aun ne byaan kiya , kaha hum se Hammad bin Zayd ne byaan kiya , un se Abu Hazim ne byaan kiya , un se Sahl bin Saad razi Allahu anhu ne byaan kiya ke ek khatoon Nabi Karim salla Allahu alaihi wasallam ki khidmat mein hazir hui aur kaha ke unhon ne apne aap ko Allah aur us ke Rasool (ki raza) ke liye hiba kar diya hai . Nabi Karim salla Allahu alaihi wasallam ne farmaya ke ab mujhe auraton se nikah ki koi haajat nahi hai . Ek sahab ne arz kiya: ya Rasool Allah! In ka nikah mujh se kar dein . Nabi Karim salla Allahu alaihi wasallam ne farmaya ke phir unhein (mahr mein) ek kapra la ke de do . Unhon ne arz kiya ke mujhe to yeh bhi muyassar nahi hai . Aap salla Allahu alaihi wasallam ne farmaya phir unhein kuch to do ek lohe ki angoothi hi sahi . Woh is par bahut pareshan huay (kyunke un ke paas yeh bhi na thi) . Nabi Karim salla Allahu alaihi wasallam ne farmaya ke achha tum ko Quran kitna yaad hai ? Unhon ne arz kiya ke falan falan surtein . Nabi Karim salla Allahu alaihi wasallam ne farmaya ke phir main ne tumhara in se Quran ki in suraton par nikah kiya jo tumhein yaad hain .