Hum se Saeed bin Abi Maryam ne byaan kiya , kaha hum se Abu Ghassan ne byaan kiya kaha ke mujh se Abu Hazim ne byaan kiya , un se Sahl bin Saad razi Allahu anhu ne ke ek aurat ne apne aap ko Nabi Karim salla Allahu alaihi wasallam se nikah ke liye pesh kiya . Phir ek sahabi ne Nabi Karim salla Allahu alaihi wasallam se kaha ke ya Rasool Allah! In ka nikah mujh se kara dijiye . Nabi Karim salla Allahu alaihi wasallam ne daryaft farmaya tumhare paas (mahr ke liye) kiya hai ? Unhon ne kaha ke mere paas to kuch bhi nahi . Nabi Karim salla Allahu alaihi wasallam ne farmaya ke jao aur talash karo , khwah lohe ki ek angoothi hi mil jaye . Woh gaye aur wapas aa gaye aur arz kiya ke Allah ki qasam! Main ne koi cheez nahi paayi . Mujhe lohe ki angoothi bhi nahi mili , albatta yeh mera tehband mere paas hai is ka aadha unhein de dijiye . Sahl razi Allahu anhu ne byaan kiya ke in ke paas chadar bhi nahi thi . Magar Nabi Karim salla Allahu alaihi wasallam ne farmaya ke yeh tumhare is tehband ka kiya kare gi , agar yeh usay pehan le gi to yeh is qadr chhota kapra hai ke phir to tumhare liye is mein se kuch baqi nahi bache ga aur agar tum pehno ge to is ke liye kuch nahi rahe ga . Phir woh sahab baith gaye , der tak baithe rehne ke baad uthay (aur jaane lage) to Nabi Karim salla Allahu alaihi wasallam ne unhein dekha aur bulwaya , ya unhein bulwaya gaya (rawi ko in alfaz mein shak thu) phir Aap salla Allahu alaihi wasallam ne in se poocha ke tumhein Quran kitna yaad hai ? Unhon ne kaha ke mujhe falan , falan surtein yaad hain chand surtein unhon ne ganayein . Nabi Karim salla Allahu alaihi wasallam ne farmaya ke hum ne tumhare nikah mein is ko is Quran ke badle de diya jo tumhein yaad hai .