Kyun ke Allah Ta'ala ne (Surah Al-Baqarah mein) farmaya hai "Ae iman walo! jab tum aapas mein udhaar ka mamla kisi muddat-e-muqarrara tak ke liye karo to is ko likh liya karo aur lazim hai ke tumhare darmiyan likhne wala theek sahi likhe aur likhne se inkar na kare. Jaisa ke Allah ne is ko sikhaya hai. Pas chahiye ke wo likh de aur chahiye ke wo shaks likhwaye jis ke zimme haq wajib hai aur chahiye ke wo apne Parvardigar Allah se darta rahe aur is mein se kuch bhi kam na kare. Phir agar wo jis ke zimme haq wajib hai kam-aql ho ya ye ke kamzor ho aur is qabil na ho ke wo khud likhwa sake to lazim hai ke is ka karkun theek theek likhwa de aur apne mardon mein se do ko gawah kar liya karo. Phir agar donon mard na hon to ek mard aur do auratein hon, in gawanhon mein se jinhein tum pasand karte ho taake in do auraton mein se ek doosri ko yaad dila de agar koi ek in donon mein se bhool jaye aur gawah jab bulaye jayein to inkar na karein aur is (mamle) ko khwah wo chota ho ya bara, is ki miyad tak likhne se akta na jao, ye kitabat Allah ke nazdeek zyada se zyada insaf se nazdeek hai aur gawahi ko durust tar rakhne wali hai aur zyada layak is ke ke tum shuba mein na paro, bajuz is ke ke koi sauda hathon hath ho jise tum baaham lete dete hi rehte ho. So tum par is mein koi ilzam nahi ke tum ise na likho aur jab khareed-o-farokht karte ho tab bhi gawah kar liya karo aur kisi katib aur gawah ko nuqsan na diya jaye aur agar aisa karo ge to ye tumhare haq mein ek gunah ho ga aur Allah se darte raho aur Allah tumhein sikhata hai aur Allah har cheez ka bahut janne wala hai". Aur Allah Ta'ala ka irshad hai ke "Ae iman walo! insaf par khoob qaim rehne wale aur Allah ke liye gawahi dene wale ban kar raho. Chahe tumhare ya (tumhare) walidain aur azizon ke khilaf hi kyun na ho. Wo ameer ho ya muflis, Allah (bahar-hal) donon se zyada haqdar hai. To khwahish-e-nafs ki pairwi na karna ke (haq se) hat jao aur agar tum kaji karo ge ya pehlu tahi karo ge, to jo kuch tum kar rahe ho, Allah is se khoob khabardar hai
.

Hum se Hajjaj Bin Minhal ne bayan kiya, kaha hum se Abdullah Bin Umar Numairi ne bayan kiya, kaha hum se Sauban ne bayan kiya aur Lais Bin Saad ne bayan kiya ke mujh se Yunus ne bayan kiya, un se Ibn Shihab ne, unhein Urwah, Ibn Musayyib, Alqama Bin Waqas aur Ubaidullah ne Aisha (Radi Allahu Anha) ki hadees ke mutalliq khabar di aur un ki baaham ek ki baat doosre ki baat ki tasdeeq karti hai ke jab un par tohmat lagane walon ne tohmat lagayi to Rasul Allah (Sallallahu Alaihi Wasallam) ne Ali aur Usama (Radi Allahu Anhuma) ko apni biwi (Aisha Radi Allahu Anha) ko apne se juda karne ke mutalliq mashwara karne ke liye bulaya, kyunke Aap (Sallallahu Alaihi Wasallam) par ab tak (is silsile mein) wahi nahi aayi thi. Usama (Radi Allahu Anhu) ne to ye kaha ke Aap ki zauja-e-mutahira (Aisha Radi Allahu Anha) mein hum siwaye khair ke aur kuch nahi jante. Aur Barira (Radi Allahu Anha) (un ki khadima) ne kaha ke mein koi aaisi cheez nahi janti jis se un par aib lagaya ja sake. Itni baat zaroor hai ke wo nau-umar larki hain ke aata goundhti aur phir ja ke so rehti hai aur bakri aa kar ise kha leti hai. Rasul Allah (Sallallahu Alaihi Wasallam) ne (tohmat ke jhoot sabit hone ke baad) farmaya ke aise shaks ki taraf se kaun uzr khwahi kare ga jo meri biwi ke bare mein bhi mujhe aziyat pahunchata hai. Qasam Allah ki! mein ne apne ghar mein khair ke siwa aur kuch nahi dekha aur log aise shaks ka naam lete hain jis ke mutalliq bhi mujhe khair ke siwa aur kuch maloom nahi
.