Lafz «al-ifk» «najis» aur «al-najis» ki tarah hai. Bolte hain «ifkahum» (Surah Al-Ahqaf mein) aaya hai. «wa zalika ifkuhum» wo bikasra hamza hai aur ye bifataha hamza-o-sukoon fa aur «ifkuhum» ye bifataha hamza-o-fa bhi hai aur kaf ko bhi fataha parha hai to tarjuma yun ho ga is ne un ko iman se pher diya aur jhoota banaya jaise Surah Waz-Zariyat mein «yu'faku anhu man ufika» hai yani Quran se wahi munharif hota hai jo Allah ke ilm mein munharif qarar pa chuka hai
.

Hum se Abdul Aziz Bin Abdullah Uwaisi ne bayan kiya ‘ kaha hum se Ibrahim Bin Saad ne bayan kiya ‘ in se Salih Bin Kaisan ne ‘ in se Ibn Shihab ne bayan kiya ‘ unhon ne kaha ke mujh se Urwah Bin Zubair ‘ Saeed Bin Musayyab ‘ Alqama Bin Waqqas aur Ubaidullah Bin Abdullah Bin Utbah Bin Masood ne bayan kiya aur in se Nabi Kareem Sallallahu Alaihi Wasallam ki zauja mutahhara Aisha Radi Allahu Anha ne ke jab ahl-e-ifk (yani tuhmat lagane walon) ne in ke mutaliq wo sab kuch kaha jo unhein kehna tha (Ibn Shihab ne bayan kiya ke) tamam hazrat ne (jin char hazrat ke naam unhon ne riwayat ke silsile mein liye hain) mujh se Aisha Radi Allahu Anha ki hadees ka ek ek tukra bayan kiya. Ye bhi tha ke in mein se baaz ko ye qissa zyada behtar tariqa par yaad tha aur umdagi se ye qissa bayan karta tha aur mein ne in mein se har ek ki riwayat yaad rakhi jo is ne Aisha Radi Allahu Anha se yaad rakhi thi. Agarche baaz logon ko dusre logon ke muqable mein riwayat zyada behtar tariqa par yaad thi. Phir bhi in mein baham ek ki riwayat dusre ki riwayat ki tasdeeq karti hai. In logon ne bayan kiya ke Aisha Radi Allahu Anha ne bayan kiya ke Rasul Allah Sallallahu Alaihi Wasallam jab safar ka irada karte to azwaj-e-mutahharat (Radi Allahu Anhun) ke darmiyan qura dala karte thay aur jis ka naam aata to Nabi Kareem Sallallahu Alaihi Wasallam unhein apne sath safar mein le jate. Aisha Radi Allahu Anha ne bayan kiya ke ek ghazwa ke mauqe par jab Aap ne qura dala to mera naam nikla aur mein Aap Sallallahu Alaihi Wasallam ke sath safar mein ravana hui. Ye waqia parda ke hukm ke nazil hone ke baad ka hai. Chunancha mujhe haudaj samait utha kar sawar kar diya jata aur isi ke sath utara jata. Is tarah hum ravana hue. Phir jab Nabi Kareem Sallallahu Alaihi Wasallam apne is ghazwa se farigh ho gaye to wapas hue. Wapsi mein ab hum Madina ke qareeb thay (aur ek maqam par parao tha) jahan se Aap Sallallahu Alaihi Wasallam ne kooch ka raat ke waqt elaan kiya. Kooch ka elaan ho chuka tha to mein khari hui aur thori dur chal kar lashkar ke hudood se aage nikal gayi. Phir qazaye hajat se farigh ho kar mein apni sawari ke pas pahunchi. Wahan pahunch kar jo mein ne apna seena tatola to Zufar (Yaman ka ek shehar) ke muhra ka bana hua mera haar ghayib tha. Ab mein phir wapas hui aur apna haar talash karne lagi. Is talash mein der ho gayi. Unhon ne bayan kiya ke jo log mujhe sawar kiya karte thay wo aaye aur mere haudaj ko utha kar unhon ne mere oont par rakh diya. Jis par mein sawar hua karti thi. Unhon ne samjha ke mein haudaj ke andar hi maujood hoon. In dinon aurten bahut halki phulki hoti thin. In ke jism mein zyada gosht nahi hota tha kyunke bahut mamooli khorak unhein milti thi. Is liye uthane walon ne jab uthaya to haudaj ke halke pan mein unhein koi farq maloom nahi hua. Yun bhi is waqt mein ek kam umar larki thi. Gharaz oont ko utha kar wo bhi ravana ho gaye. Jab lashkar guzar gaya to mujhe bhi apna haar mil gaya. Mein dere par aayi to wahan koi bhi na tha. Na pukarne wala na jawab dene wala. Is liye mein wahan aayi jahan mera asal dera tha. Mujhe yaqeen tha ke jald hi mere na hone ka unhein ilm ho jaye ga aur mujhe lene ke liye wo wapas laut ayein ge. Apni jagah par baithe baithe meri aankh lag gayi aur mein so gayi. Safwan Bin Muattal Sulami Al-Zakwani Radi Allahu Anhu lashkar ke peeche peeche aa rahe thay. (Taake lashkar ki koi cheez gum ho gayi ho to wo utha lein) unhon ne ek soye insan ka saya dekha aur jab (qareeb aa kar) mujhe dekha to pehchan gaye parda se pehle wo mujhe dekh chuke thay. Mujhe jab wo pehchan gaye to inna-lillahi parhna shuru kiya aur in ki awaz se mein jaag utthi aur furan apni chadar se mein ne apna chehra chupa liya. Allah ki qasam! Mein ne in se ek lafz bhi nahi kaha aur na siwa inna-lillahi ke mein ne in ki zaban se koi lafz suna. Wo sawari se utar gaye aur ise unhon ne bitha kar is ki agli taang ko mor diya (taake baghair kisi madad ke Umm-ul-Momineen is par sawar ho sakein) mein utthi aur is par sawar ho gayi. Ab wo sawari ko aage se pakre hue le kar chale. Jab hum lashkar ke qareeb pahunche to theek dopahar ka waqt tha. Lashkar parao kiye hue tha. Umm-ul-Momineen Radi Allahu Anha ne bayan kiya ke phir jise halak hona tha wo halak hua. Asal mein tuhmat ka bera Abdullah Bin Ubayy Ibn Salool (munafiq) ne utha rakha tha. Urwah ne bayan kiya ke mujhe maloom hua ke wo is tuhmat ka charcha karta aur is ki majlison mein is ka tazkira hua karta. Wo is ki tasdeeq karta ‘ khoob ghor aur tawajju se sunta aur phailane ke liye khoob khod kuraid karta. Urwah ne pehli sanad ke hawale se ye bhi kaha ke Hassan Bin Sabit ‘ Mistah Bin Usathah aur Hamnah Bint-e-Jahsh ke siwa tuhmat lagane mein shareek kisi ka bhi naam nahi liya ke mujhe in ka ilm hota. Agarche is mein shareek hone wale bahut se thay. Jaisa ke Allah Ta'ala ne irshad farmaya (ke jin logon ne tuhmat lagayi hai wo bahut se hain) lekin is muamla mein sab se barh charh kar hissa lene wala Abdullah Bin Ubayy Ibn Salool tha. Urwah ne bayan kiya ke Aisha is par bari khafgi ka izhaar karti thin. Agar in ke samne Hassan Bin Sabit Radi Allahu Anhu ko bura bhala kaha jata ‘ Aap farmatin ke ye sher Hassan hi ne kaha hai ke ”Mere walid aur mere walid ke walid aur meri izzat ‘ Muhammad Sallallahu Alaihi Wasallam ki izzat ki hifazat ke liye tumhare samne dhaal bani rahein gi.“ Aisha Radi Allahu Anha ne bayan kiya ke phir hum Madina pahunch gaye aur wahan pahunchte hi mein bimar ho gayi to ek mahine tak bimar hi rahi. Is arsa mein logon mein tuhmat lagane walon ki afwahon ka bara charcha raha lekin mein ek baat bhi nahi samajh rahi thi albatta apne marz ke dauran ek cheez se mujhe bara shubha hota ke Rasul Allah Sallallahu Alaihi Wasallam ki wo muhabbat-o-inayait mein nahi mahsoos karti thi jis ko pehle jab bhi bimar hoti mein dekh chuki thi. Aap mere pas tashreef late ‘ salam karte aur daryaft farmate kaisi tabiyat hai? Sirf itna pooch kar wapas tashreef le jate. Aap Sallallahu Alaihi Wasallam ke is tarz-e-amal se mujhe shubha hota tha. Lekin sharr (jo phail chuka tha) is ka mujhe koi ehsas nahi tha. Marz se jab afaqa hua to mein Umm-e-Mistah ke sath Manasi ki taraf gayi. Manasi (Madina ki abadi se bahar) hamare rafa hajat ki jagah thi. Hum yahan sirf raat ke waqt jate thay. Ye is se pehle ki baat hai. Jab bait-ul-khala hamare gharon ke qareeb ban gaye thay. Umm-ul-Momineen ne bayan kiya ke abhi hum Arab-e-qadeem ke tariqe par amal karte aur maidan mein rafa hajat ke liye jaya karte thay aur humein is se takleef hoti thi ke bait-ul-khala hamare gharon ke qareeb banaye jayein. Unhon ne bayan kiya ke al-gharaz mein aur Umm-e-Mistah (rafa hajat ke liye) gaye. Umm-e-Mistah Abi Ruhm Bin Abdul Muttalib Bin Abd Manaf ki beti hain. In ki walida Sakhar Bin Amir ki beti hain aur wo Abu Bakr Radi Allahu Anhu ki khala thin. Unhi ke bete Mistah Bin Usathah Bin Abbad Bin Muttalib Radi Allahu Anhu hain. Phir mein aur Umm-e-Mistah hajat se farigh ho kar apne ghar ki taraf wapas aa rahe thay ke Umm-e-Mistah apni chadar mein ulajh gayin aur in ki zaban se nikla ke Mistah zaleel ho. Mein ne kaha ‘ Aap ne buri baat zaban se nikali ‘ ek aise shakhs ko Aap bura keh rahi hain jo Badr ki larayi mein shareek ho chuka hai. Unhon ne is par kaha kyun Mistah ki baatein tum ne nahi sunin? Umm-ul-Momineen ne bayan kiya ke mein ne pucha ke unhon ne kya kaha hai? Bayan kiya ‘ phir unhon ne tuhmat lagane walon ki baatein sunayin. Bayan kiya ke in baaton ko sun kar mera marz aur barh gaya. Jab mein apne ghar wapas aayi to Nabi Kareem Sallallahu Alaihi Wasallam mere pas tashreef laye aur salam ke baad daryaft farmaya ke kaisi tabiyat hai? Mein ne Aap Sallallahu Alaihi Wasallam se arz kiya ke kya Aap mujhe apne walidain ke ghar jane ki ijazaat marhamat farmaiye ge? Umm-ul-Momineen ne bayan kiya ke mera irada ye tha ke un se is khabar ki tasdeeq karungi. Unhon ne bayan kiya ke Aap Sallallahu Alaihi Wasallam ne mujhe ijazaat de di. Mein ne apni walida se (ghar ja kar) pucha ke aakhir logon mein kis tarah ki afwahen hain? Unhon ne farmaya ke beti! Fikr na kar ‘ Allah ki qasam! Aisa shayad hi kahin hua ho ke ek khoobsurat aurat kisi aise shohar ke sath ho jo is se muhabbat bhi rakhta ho aur is ki sokanen bhi hon aur phir is par tuhmaten na lagayi gayi hon. Is ki ayib jooi na ki gayi ho. Umm-ul-Momineen ne bayan kiya ke mein ne is par kaha ke Subhan-Allah (meri sokanon se is ka kya talluq) is ka to aam logon mein charcha hai. Unhon ne bayan kiya ke udhar phir jo mein ne rona shuru kiya to raat bhar roti rahi isi tarah subah ho gayi aur mere aansu kisi tarah na thamte thay aur na neend hi aati thi. Bayan kiya ke udhar phir Rasul Allah Sallallahu Alaihi Wasallam ne Ali Bin Abi Talib Radi Allahu Anhu aur Usama Bin Zaid (Radi Allahu Anhuma) ko apni biwi ko alayhda karne ke mutaliq mashwara karne ke liye bulaya kyunke is silsile mein ab tak Aap par vahi nazil nahi hui thi. Bayan kiya ke Usama Radi Allahu Anhu ne to Nabi Kareem Sallallahu Alaihi Wasallam ko isi ke mutabiq mashwara diya jo wo Aap Sallallahu Alaihi Wasallam ki biwi (murad khud apni zaat se hai) ki pakizgi aur Aap Sallallahu Alaihi Wasallam ki in se muhabbat ke mutaliq jaante thay. Chunancha unhon ne kaha ke Aap ki biwi mein mujhe khair-o-bhalayi ke siwa aur kuch maloom nahi hai lekin Ali Radi Allahu Anhu ne kaha: Ya Rasul Allah! Allah Ta'ala ne Aap par koi tangi nahi rakhi hai aur aurten bhi in ke alawa bahut hain. Aap in ki baandi (Barira Radi Allahu Anhu) se bhi daryaft farma lein wo haqiqat-e-haal bayan kar de gi. Bayan kiya ke phir Aap Sallallahu Alaihi Wasallam ne Barira Radi Allahu Anha ko bulaya aur in se daryaft farmaya ke kya tum ne koi aaisi baat dekhi hai jis se tumhein (Aisha par) shubha hua ho. Barira Radi Allahu Anha ne kaha: Is zaat ki qasam! Jis ne Aap ko haq ke sath mab'oos kiya. Mein ne in ke andar koi aaisi cheez nahi dekhi jo buri ho. Itni baat zaroor hai ke wo ek nau-umar larki hain ‘ aata gundh kar so jati hain aur bakri aa kar ise kha jati hai. Unhon ne bayan kiya ke is den Rasul Allah Sallallahu Alaihi Wasallam ne sahaba (Radi Allahu Anhum) ko khitab kiya aur minbar par kharay ho kar Abdullah Bin Ubayy (munafiq) ka muamla rakha. Aap Sallallahu Alaihi Wasallam ne farmaya. Ai giroh-e-muslimin! Is shakhs ke bare mein meri kaun madad kare ga jis ki aziyaten ab meri biwi ke muamle tak pahunch gayi hain. Allah ki qasam ke mein ne apni biwi mein khair ke siwa aur koi cheez nahi dekhi aur naam bhi in logon ne ek aise shakhs (Safwan Bin Muattal Radi Allahu Anhu jo Umm-ul-Momineen ko apne oont par laye thay) ka liya hai jis ke bare mein bhi mein khair ke siwa aur kuch nahi jaanta. Wo jab bhi mere ghar aaye to mere sath hi aaye. Umm-ul-Momineen Radi Allahu Anha ne bayan kiya ke is par Saad Bin Muaz Radi Allahu Anhu qabila Banu Ash-hal ke hum rishta kharay hue aur arz kiya mein, Ya Rasul Allah! Aap ki madad karunga. Agar wo shakhs qabila-e-Aus ka hua to mein is ki gardan maar doonga aur agar wo hamare qabila ka hua Aap ka is ke mutaliq bhi jo hukm hoga hum baja layein ge. Umm-ul-Momineen ne bayan kiya ke is par qabila-e-Khazraj ke ek sahabi kharay hue. Hassan ki walida in ki chacha zad bahen thin yani Saad Bin Ubadah Radi Allahu Anhu wo qabila-e-Khazraj ke sardar thay aur is se pehle bare salih aur mukhliseen mein thay lekin aaj qabila ki hamiyat in par ghalib aa gayi. Unhon ne Saad Radi Allahu Anhu ko mukhatab kar ke kaha: Allah ki qasam! Tum jhoote ho ‘ tum ise qatl nahi kar sakte, aur na tumhare andar itni taqat hai. Agar wo tumhare qabila ka hota to tum is ke qatl ka naam na leyte. Is ke baad Usaid Bin Hudair Radi Allahu Anhu jo Saad Bin Ubadah Radi Allahu Anhu ke chachere bhai thay kharay hue aur Saad Bin Ubadah Radi Allahu Anhu ko mukhatab kar ke kaha: Allah ki qasam! Tum jhoote ho ‘ hum ise zaroor qatl karein ge. Ab is mein shubha nahi raha ke tum bhi munafiq ho ‘ tum munafiqon ki taraf se mudafiat karte ho. Itne mein Aus-o-Khazraj ke dono qabile bhark utthe aur aisa maloom hota tha ke aapas hi mein larr parein ge. Is waqt tak Rasul Allah Sallallahu Alaihi Wasallam minbar par hi tashreef farma thay. Umm-ul-Momineen Aisha Radi Allahu Anha ne bayan kiya ke phir Aap Sallallahu Alaihi Wasallam sab ko khamosh karane lage. Sab hazrat chup ho gaye aur Aap Sallallahu Alaihi Wasallam bhi khamosh ho gaye. Umm-ul-Momineen Aisha Radi Allahu Anha ne bayan kiya ke mein is roz poora den roti rahi. Na mera aansu thamta tha aur na aankh lagti thi. Bayan kiya ke subah ke waqt mere walidain mere pas aaye. Do ratein aur ek den mera rote hue guzar gaya tha. Is poore arsa mein na mera aansu ruka aur na neend aayi. Aaisa maloom hota tha ke rote rote mera kaleja phat jaye ga. Abhi mere walidain mere pas hi baithe hue thay aur mein roye ja rahi thi ke qabila-e-Ansar ki ek khatoon ne andar aane ki ijazaat chahi. Mein ne unhein ijazaat de di aur wo bhi mere sath baith kar rone lagin. Bayan kiya ke hum abhi isi halat mein thay ke Rasul Allah Sallallahu Alaihi Wasallam tashreef laye. Aap ne salam kiya aur baith gaye. Bayan kiya ke jab se mujh par tuhmat lagayi gayi thi ‘ Aap Sallallahu Alaihi Wasallam mere pas nahi baithe thay. Ek mahina guzar gaya tha aur mere bare mein Aap ko vahi ke zariye koi ittela nahi di gayi thi. Bayan kiya ke baithne ke baad Aap Sallallahu Alaihi Wasallam ne kalma-e-shahadat parha phir farmaya ”amaba'du“ Ai Aisha! Mujhe tumhare bare mein is is tarah ki khabren mili hain ‘ agar tum waqeyi is muamla mein pak-o-saaf ho to Allah tumhari paki khud bayan kar de ga lekin agar tum ne kisi gunah ka qasad kiya tha to Allah ki maghfirat chaho aur is ke huzoor mein tauba karo kyunke banda jab (apne gunahon ka) etiraf kar leyta hai aur phir Allah ki bargah mein tauba karta hai to Allah Ta'ala is ki tauba qabool kar leyta hai. Umm-ul-Momineen Aisha Radi Allahu Anha ne bayan kiya ke jab Aap Sallallahu Alaihi Wasallam apna kalam poora kar chuke to mere aansu is tarah khushk ho gaye ke ek qatra bhi mahsoos nahi hota tha. Mein ne pehle apne walid se kaha ke meri taraf se Rasul Allah Sallallahu Alaihi Wasallam ko in ke kalam ka jawab dein. Walid ne farmaya: Allah ki qasam! Mein kuch nahi jaanta ke Aap Sallallahu Alaihi Wasallam se mujhe kya kehna chahiye. Phir mein ne apni walida se kaha ke Nabi Kareem Sallallahu Alaihi Wasallam ne jo kuch farmaya hai wo is ka jawab dein. Walida ne bhi yahi kaha. Allah ki qasam! Mujhe kuch nahi maloom ke Aap Sallallahu Alaihi Wasallam se mujhe kya kehna chahiye. Is liye mein ne khud hi arz kiya. Halanke mein bahut kam umar larki thi aur Quran Majeed bhi mein ne zyada nahi parha tha ke Allah ki qasam! Mujhe bhi maloom hua hai ke Aap logon ne is tarah ki afvahon par kaan dhara aur baat Aap logon ke dilon mein utar gayi aur Aap logon ne is ki tasdeeq ki. Ab agar mein ye kahoon ke mein is tuhmat se bari hoon to Aap log meri tasdeeq nahi karein ge agar aur is gunah ka iqrar kar loon aur Allah Ta'ala khoob jaanta hai ke mein is se bari hoon to Aap log is ki tasdeeq karne lag jayein ge. Pas Allah ki qasam! Meri aur logon ki misal Yusuf Alaihis Salam ke walid jaisi hai. Jab unhon ne kaha tha «fasabrun jamilun wallahul musta'anu ala ma tasifun» (Yusuf: 18) ”Pas sabr-e-jamil behtar hai aur Allah hi ki madad darkaar hai is bare mein jo kuch tum keh rahe ho“ phir mein ne apna rukh dusri taraf kar liya aur apne bistar par leyit gayi. Allah khoob jaanta tha ke mein is muamla mein qat'an bari thi aur wo khud meri barat zahir kare ga. Kyunke mein waqeyi bari thi lekin Allah ki qasam! Mujhe is ka koi wahm-o-guman bhi na tha ke Allah Ta'ala vahi ke zariye Quran Majeed mein mere muamle ki safayi utare ga kyunke mein apne ko is se bahut kamtar samajhti thi ke Allah Ta'ala mere muamla mein khud koi kalam farmaye ‘ mujhe to sirf itni umeed thi ke Aap Sallallahu Alaihi Wasallam koi khwab dekhein ge jis ke zariye Allah Ta'ala meri barat kar de ga lekin Allah ki qasam! Abhi Nabi Kareem Sallallahu Alaihi Wasallam majlis se utthe bhi nahi thay aur na aur koi ghar ka aadmi wahan se uttha tha ke Aap Sallallahu Alaihi Wasallam par vahi nazil honi shuru hui aur Aap par wo kaifiyat tari hui jo vahi ki shiddat mein tari hoti thi. Motiyon ki tarah pasine ke qatray Aap ke chehre se girne lage. Halanke sardi ka mausam tha. Ye is vahi ki wajah se tha jo Aap par nazil ho rahi thi. Umm-ul-Momineen Radi Allahu Anha ne bayan kiya ke phir Aap ki wo kaifiyat khatam hui to Aap tabassum farma rahe thay. Sab se pehla kalma jo Aap ki zaban-e-mubarak se nikla wo ye tha. Aap Sallallahu Alaihi Wasallam ne farmaya: Ai Aisha! Allah ne tumhari barat nazil kar di hai. Unhon ne bayan kiya ke is par meri walida ne kaha ke Nabi Kareem Sallallahu Alaihi Wasallam ke samne khari ho jao. Mein ne kaha ‘ nahi Allah ki qasam! Mein Aap ke samne nahi khari hoongi. Mein Allah Azzawajal ke siwa aur kisi ki hamd-o-sana nahi karungi (ke isi ne meri barat nazil ki hai) bayan kiya ke Allah Ta'ala ne nazil farmaya «innallazina jauu bil-ifki» ”Jo log tuhmat tarashi mein shareek hue hain“ das ayitein is silsila mein nazil farmayin. Jab Allah Ta'ala ne (Surah Al-Noor mein) ye ayitein meri barat ke liye nazil farmayin to Abu Bakr Siddiq Radi Allahu Anhu (jo Mistah Bin Usathah ke ikhrajat ‘ in se qarabat aur in ki muhtaji ki wajah se khud uthate thay) ne kaha: Allah ki qasam! Mistah ne jab Aisha ke mutaliq is tarah ki tuhmat tarashi mein hissa liya to mein is par ab kabhi kuch kharch nahi karunga. Is par Allah Ta'ala ne ye ayat nazil ki «wala ya'tali ulul fazli minkum» yani ”Ahl-e-fazl aur ahl-e-himmat qasam na khayein“ se «ghafurun rahimun» tak (kyunke Mistah Radi Allahu Anhu ya dusre momineen ki is mein shirkat mahz ghalt fahmi ki bina par thi). Chunancha Abu Bakr Siddiq Radi Allahu Anhu ne kaha ke Allah ki qasam! Meri tamanna hai ke Allah Ta'ala mujhe is kehne par maaf kar de aur Mistah ko jo kuch diya karte thay ‘ ise phir dene lage aur kaha ke Allah ki qasam! Ab is wazife ko mein kabhi band nahi karunga. Aisha Radi Allahu Anha ne bayan kiya ke mere muamle mein Aap Sallallahu Alaihi Wasallam ne Umm-ul-Momineen Zainab Bint-e-Jahsh Radi Allahu Anha se bhi mashwara kiya tha. Aap ne in se poocha ke Aisha ke mutaliq kya maloomat hain tumhein ya in mein tum ne kya cheez dekhi hai? Unhon ne arz kiya: Ya Rasul Allah! Mein apni aankhon aur kaanon ko mahfooz rakhti hoon (ke in ki taraf khilaf-e-waqia nisbat karoon) Allah ki qasam! Mein in ke bare mein khair ke siwa aur kuch nahi jaanti. Aisha Radi Allahu Anha ne bayan kiya ke Zainab hi tamam azwaj-e-mutahharat mein mere muqabil ki thin lekin Allah Ta'ala ne in ke taqwa aur pakbazi ki wajah se unhein mahfooz rakha. Bayan kiya ke albatta in ki bahen Hamna ne ghalt rasta ikhtiyar kiya aur halak hone walon ke sath wo bhi halak hui thin. Ibn Shihab ne bayan kiya ke yahi thi wo tafseel is hadees ki jo in akabir ki taraf se mujh tak pahunchi thi. Phir Urwah ne bayan kiya ke Aisha Radi Allahu Anha ne bayan kiya ke Allah ki qasam! Jin sahabi ke sath ye tuhmat lagayi gayi thi wo (apne par is tuhmat ko sun kar) kehte ‘ Subhan-Allah ‘ is zaat ki qasam! Jis ke hath mein meri jaan hai ‘ mein ne aaj tak kisi aurat ka parda nahi khola. Umm-ul-Momineen Radi Allahu Anha ne bayan kiya ke phir is waqia ke baad wo Allah ke raste mein shaheed ho gaye thay
.