Aur yeh bhi bayan hai ke mashwara ek kaam ka musam-mam azam aur is ke bayan kar dene se pehle lena chahiye jaise farmaya «fa-izhaa azamta fa-tawak-kal alallaahi» ”phir jab ek baat thehra le (yani salah wa mashwara ke baad) to Allah par bharosa kar (is ko kar guzar)“ phir jab Nabi kareem salla Allahu alaihi wasallam mashware ke baad ek kaam thehra lein ab kisi aadmi ko Allahaur is ke Rasool ke aage barhna durust nahi (yani doosri rai dena) aur Nabi kareem salla Allahu alaihi wasallam ne Jang e Uhud mein apne as-hab se mashwara liya ke Madinah hi mein reh kar larein ya bahar nikal kar. Jab Aap ne zirrah pehn li aur bahar nikal kar larna thehra liya, ab baaz log kehne lage Madinah hi mein rehna achha hai. Aap ne in ke qaul ki taraf iltifaf nahi kiya kyunke (mashware ke baad) Aap ek baat thehra chuke thay. Aap salla Allahu alaihi wasallam ne farmaya ke jab Paighambar (larayi par mustaid ho kar) apni zirrah pehn le (hathyar waghaira baandh kar lais ho jaye) ab baghair Allah ke hukm ke is ko utaar nahi sakta (is hadees ko Tabrani ne Ibn Abbas raziAllahu anhuma se wasal kiya). Aur Nabi kareem salla Allahu alaihi wasallam ne Ali aur Usamah bin Zayd raziAllahu anhuma se mashwara kiya, Aisha razi Allahu anha par jo buhtan lagaya gaya thu is muqaddama mein, aur in ki rai suni yahan tak ke Quran utra aur Aap ne tuhmat lagane walon ko koray maare aur Ali aur Usamah raziAllahu anhuma mein jo ikhtilaf e rai thu is par kuch iltifaf nahi kiya (Ali razi Allahu anhuki rai oopar guzri hai) balkay Aap ne Allah ke irshad ke muafiq hukm diya aur Nabi Karim salla Allahu alaihi wasallam ki wafat ke baad jitne Imam aur khaleefa huay woh imandar logon se aur aalimon se mubah kaamon mein mashwara liya karte taake jo kaam aasaan ho is ko ikhtiyar karein phir jab un ko Quran aur hadees ka hukm mil jata to is ke khilaf kisi ki na sunte kyunke Nabi Karim salla Allahu alaihi wasallam ki pairwi sab par muqaddam hai aur Abu Bakr Siddiq razi Allahu anhune in logon se jo zakat nahi dete thay larna munasib samjha to Umar razi Allahu anhune kaha tum in logon se kaise laro ge Nabi kareem salla Allahu alaihi wasallam ne to yeh farmaya thu ke mujhko logon se larnay ka hukm hua yahan tak ke woh Laa ilaaha illallaah kahein jab unhon ne Laa ilaaha illallaah keh liya to apni jaanon aur maalon ko mujh se bacha liya. Abu Bakr razi Allahu anhune yeh jawab diya, main to in logon se zaroor laroon ga jo in farzhon ko juda karein jin ko Nabi kareem salla Allahu alaihi wasallam ne yak-saan rakkha. Is ke baad Umar razi Allahu anhuki wahi rai ho gayi, gharaz Abu Bakr razi Allahu anhune Umar razi Allahu anhuke mashware par kuch iltifaf na kiya in ke paas Nabi kareem salla Allahu alaihi wasallam ka hukm maujood thu jo log namaz aur zakat mein farq karein, deen ke ahkaam aur arkan ko badal daalein in se larna chahiye (woh kafir ho gaye) aur Nabi kareem salla Allahu alaihi wasallam ne farmaya ke jo shakhs apna deen badal daale (Islam se phir jaye) is ko maar daalo aur Umar razi Allahu anhuke mashware mein wahi sahabah shareek rehte jo Quran ke Qaari thay (yani aalim log) jawan hon ya burhay aur Umar razi Allahu anhujahan Allah ki kitab ka koi hukm sunte bas thehar jaate is ke muafiq amal karte is ke khilaf kisi ka mashwara na sunte.

Hum se Abd-ul-Aziz bin Abdullah Owaysi ne bayan kiya, kaha hum se Ibrahim bin Saad ne, in se Salih bin Kaysan ne, in se Ibn Shihab ne, kaha ke mujh se Urwah bin al-Musayyab aur Alqama bin Waqqas aur Ubaidullah bin Abdullah ne bayan kiya aur in se Aisha razi Allahu anha ne ke jab tuhmat lagane walon ne in par tuhmat lagayi ku aur Rasool Allahsalla Allahu alaihi wasallam ne Ali bin Abi Talib, Usamah bin Zayd raziAllahu anhuma ko bulaya kyunke is muamla mein wahi is waqt tak nahi aayi ku aur Nabi Karim salla Allahu alaihi wasallam apni Ahl e khana ko juda karne ke silsila mein in se mashwara lena chahte thay to Usamah razi Allahu anhune wahi mashwara diya jo unhein maloom thu yani Nabi kareem salla Allahu alaihi wasallam ki Ahl e khana ki barat ka lekin Ali razi Allahu anhune kaha ke Allah Ta'ala ne Aap par koi pabandi to aa-id nahi ki hai aur is ke siwa aur bahut si auratein hain, baandi se Aap daryaft farma lein, woh Aap se sahih baat bata de gi. Chunanche Nabi Karim salla Allahu alaihi wasallam ne poochha ke kiya tum ne koi aaisi baat dekhi hai jis se shubha hota hai. Unhon ne kaha ke main ne is ke siwa aur kuch nahi dekha ke woh kam umr larki hain, aata goondh kar bhi so jaati hain aur paros ki bakri aa kar usay kha jaati hai, is ke baad Nabi Karim salla Allahu alaihi wasallam mimbar par khare huay aur farmaya, Ae Musalmano! meere muamle mein is se kaun nimte ga jis ki aziyatein ab meere Ahl e khana tak pahunch gayi hain. Allah ki qasam! main ne in ke baare mein bhalayi ke siwa aur kuch nahi jaana hai. Phir Aap salla Allahu alaihi wasallam ne Aisha razi Allahu anha ki paak-damni ka qissa bayan kiya aur Abu Usamah ne Hisham bin Urwah se bayan kiya.