Hum se Muhammad Bin Abdullah Ansari ne bayan kiya, kaha ke mujh se mere walid Abdullah ne bayan kiya, un se Sumama ne aur un se Anas (Radi Allahu Anhu) ne ke jab Abu Bakr (Radi Allahu Anhu) Khalifa hue to unhon ne un ko (yaani Anas Radi Allahu Anhu ko) Bahrain (aamil bana kar) bheja aur ek parwana likh kar un ko diya aur is par Nabi Kareem (Sallallahu Alaihi Wasallam) ki angoothi ki mohr lagayi, mohr mubarak par teen satrain kanda theen, ek satar mein "Muhammad" doosri mein "Rasul" teesri mein "Allah" kanda tha
.

Hum se Abul Hasan Muhammed bin Muqaatil ne bayan kiya, un se Abdullah ne, unhein Sho’bah ne Qatadah se khabar di, woh Anas bin Malik Radhiallahu Anhu se riwayat karte hain, unhon ne farmaaya ke Rasoolullah Sallallahu Alaihi Wasallam ne (kisi baadshaah ke naam da’wat-e-Islam dene ke liye) ek khat likha ya likhne ka iradah kiya to Aap Sallallahu Alaihi Wasallam se kaha gaya ke woh baghair mohar ke khat nahi padhte (yani be mohar ke khat ko mustanad nahi samjhte) tab Aap Sallallahu Alaihi Wasallam ne chaandi ki angothi banwaayi. Jis mein «مُحَمَّدٌ رَسُولُ اللَّهِ» kanda tha. Goya main (aaj bhi) Aap Sallallahu Alaihi Wasallam ke haath mein us ki sufaidi dekh raha hun. (Sho’bah rawi-e-Hadees kehte hain ke) main ne Qatadah se poocha ke yeh kis ne kaha (ke) us par «مُحَمَّدٌ رَسُولُ اللَّهِ» kanda tha? Unhon ne jawaab diya, Anas Radhiallahu Anhu ne.

Hum se Muhammad bin Abdullah ne byaan kiya . Kaha ke mujh se mere walid Abdullah bin Musanna ne byaan kiya . Kaha ke mujh se Sumamah bin Abdullah ne byaan kiya . Un se Anas razi Allahu anhu ne ke Abu Bakr Siddiq razi Allahu anhu ne unhein (apne daur-e-khilafat mein farz zakat se mutalliq hidayat dete hue) Allah aur Rasool ke hukm ke mutabiq yeh farmaan likha ke jis ka sadqa ”bint-e-makhad“ tak puhanch gaya ho aur us ke paas ”bint-e-makhad“ nahi balke ”bint-e-laboon“ hai . To us se wahi le liya jaye ga aur us ke badla mein sadqa wasool karne wala bees dirham ya do bakriyan zaid dede ga aur agar us ke paas ”bint-e-makhad“ nahi hai balke ”ibn-e-laboon“ hai to yeh ”ibn-e-laboon“ hi le liya jaye ga aur is soorat mein kuch nahi diya jaye ga ‘ woh mada ya nar oont jo teesre saal mein laga ho .

Hum se Ali Bin Jad ne bayan kiya, kaha hum ko Shuba ne khabar di Qatada se, unhon ne kaha ke mein ne Anas (Radi Allahu Anhu) se suna ke aap bayan karte thay ke jab Nabi Kareem (Sallallahu Alaihi Wasallam) ne Shah-e-Room ko khat likhne ka irada kiya to aap (Sallallahu Alaihi Wasallam) se kaha gaya ke wo log koi khat us waqt tak qabool nahi karte jab tak wo sar-ba-muhr na ho, chunancha aap (Sallallahu Alaihi Wasallam) ne ek chandi ki angoothi banwayi. Goya dast-e-mubarak par is ki safedi meri nazron ke samne hai. Is angoothi par ”Muhammad Rasul Allah“ khuda hua tha
.

Hum se Musaddad ne bayan kiya , kaha hum se Yahya bin Abi Kaseer ne bayan kiya , in se Ubaidullah ne bayan kiya , kaha ke mujh se Nafi ne bayan kiya aur in se Abdullah bin Umar razi Allahu anhuma ne ke Rasool Allah salla Allahu alaihi wasallam ne sone ki ek angoothi banwayi aur is ka nageena hatheli ki jaanib rakkha phir kuch doosre logon ne bhi isi tarah ki angoothiyaan banwa lein . Aakhir Nabi Karim salla Allahu alaihi wasallam ne usay phenk diya aur chaandi ki angoothi banwa li .

Hum se Yusuf bin Musa ne bayan kiya , kaha hum se Abu Usamah ne bayan kiya , kaha hum se Ubaidullah ne bayan kiya , in se Nafi ne aur in se Abdullah bin Umar razi Allahu anhuma ne ke Rasool Allah salla Allahu alaihi wasallam ne sone ya chaandi ki angoothi banwayi aur is ka nageena hatheli ki taraf rakkha aur is par «Muhammadun Rasool-ullahi» ke alfaz khudwaye phir doosre logon ne bhi isi tarah ki angoothiyaan banwa lein . Jab Nabi Karim salla Allahu alaihi wasallam ne dekha ke kuch doosre logon ne bhi is tarah ki angoothiyaan banwa li to Aap ne usay phenk diya aur farmaya ke ab main usay kabhi nahi pehnoon ga . Phir Aap ne chaandi ki angoothi banwayi aur doosre logon ne bhi chaandi ki angoothiyaan banwa lein . Ibn Umar razi Allahu anhuma ne bayan kiya ke Nabi Karim salla Allahu alaihi wasallam ke baad is angoothi ko Abu Bakr razi Allahu anhu ne pehna phir Umar razi Allahu anhu aur phir Usman ne pehna . Aakhir Usman razi Allahu anhu ke ahad e khilafat mein woh angoothi Areis ke kunwien mein gir gayi .

Hum se Abdullah bin Maslamah ne bayan kiya , kaha hum se Imam Malik ne , in se Abdullah bin Dinar ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam (hurmat se pehle) sone ki angoothi pehnte thay phir hurmat ka hukm aane par Aap ne usay phenk diya aur farmaya ke main ab se kabhi nahi pehnoon ga aur logon ne bhi apni angoothiyaan phenk dein .

Hum se Ishaq ne bayan kiya , kaha hum ko Mutamir ne khabar di , kaha ke main ne Humayd se suna , woh Anas razi Allahu anhu se bayan karte thay ke Nabi Karim salla Allahu alaihi wasallam ki angoothi chaandi ki thi aur is ka nageena bhi isi ka tha aur Yahya bin Ayub ne bayan kiya ke mujh se Humayd ne bayan kiya , unhon ne Anas razi Allahu anhu se suna , unhon ne Nabi Karim salla Allahu alaihi wasallam se isi tarah bayan kiya .

Hum se Abd-ul-A'la bin Hammad ne bayan kiya, unhon ne kaha hum se Yazid bin Zuray ne bayan kiya, unhon ne kaha hum se Saeed bin Abi Aroobah ne bayan kiya, in se Qatadah ne aur in se Anas bin Malik razi Allahu anhu ne ke Nabi Karim salla Allahu alaihi wasallam ne Ajam ke kuch logon (Shahan e Ajam) ke paas khat likhna chaha to Aap se kaha gaya ke Ajam ke log koi khat is waqt tak nahi qabool karte jab tak is par mohar lagi hui na ho. Chunanche Nabi Karim salla Allahu alaihi wasallam ne chaandi ki ek angoothi banwayi. Jis par yeh kunda tha «Muhammadun Rasool-ullahi» . Goya is waqt Nabi Karim salla Allahu alaihi wasallam ki ungli ya Aap ki hatheli mein is ki chamak dekh raha hoon.

Hum se Muhammad bin Salam Baikandi ne bayan kiya, kaha hum ko Abdullah bin Numayr ne khabar di, unhein Ubaidullah Umri ne, unhein Nafi ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne chaandi ki ek angoothi banwayi. Woh angoothi Aap ke hath mein, is ke baad Umar razi Allahu anhu ke hath mein, is ke baad Usman razi Allahu anhu ke hath mein rehti thi lekin in ke zamana mein woh Areis ke kunwien mein gir gayi is ka naqsh «Muhammadun Rasool-ullahi» tha.

Hum se Abu Mamar ne bayan kiya, kaha hum se Abd-ul-Waris bin Saeed ne bayan kiya, kaha hum se Abd-ul-Aziz bin Suhayb ne bayan kiya, in se Anas razi Allahu anhu ne ke Rasool Allah salla Allahu alaihi wasallam ne ek angoothi banwayi aur farmaya ke hum ne ek angoothi banwayi hai is par lafz ( «Muhammadun Rasool-ullahi») kunda karaya hai is liye angoothi par koi shakhs yeh naqsh na kunda karaye. Anas ne bayan kiya ke jaise is angoothi ki chamak Nabi Karim salla Allahu alaihi wasallam ki chhngliyan mein ab bhi main dekh raha hoon.

Hum se Adam bin Abi Iyas ne bayan kiya, kaha hum se Shubah ne bayan kiya, in se Qatadah ne aur in se Anas bin Malik razi Allahu anhu ne bayan kiya ke jab Nabi Karim salla Allahu alaihi wasallam ne Room (ke badshah ko) khat likhwana chaha to Aap se kaha gaya ke agar Aap ke khat par mohar na hui to woh khat nahi parhte. Chunanche Aap salla Allahu alaihi wasallam ne chaandi ki ek angoothi banwayi is par lafz «Muhammadun Rasool-ullahi» kunda karaya. Jaise Nabi Karim salla Allahu alaihi wasallam ke hath mein is ki sufaidi ab bhi main dekh raha hoon.

Hum se Musa bin Ismail ne bayan kiya, kaha hum se Juwayriyah ne bayan kiya, in se Nafi ne aur in se Abdullah bin Umar razi Allahu anhuma ne bayan kiya ke Nabi Karim salla Allahu alaihi wasallam ne pehle ek sone ki angoothi banwayi aur pehnne mein Aap is ka rang andar ki taraf rakhte thay. Aap ki dekha-dekhi logon ne bhi sone ki angoothiyaan bana lein to Nabi Karim salla Allahu alaihi wasallam mimbar par tashreef laaye aur Allah ki hamd o sana ki aur farmaya main ne bhi sone ki angoothi banwayi thi. (hurmat nazil hone ke baad) Aap salla Allahu alaihi wasallam ne farmaya ke ab main usay nahi pehnoon ga. Phir Aap ne woh angoothi phenk di aur logon ne bhi apni sone ki angoothiyon ko phenk diya. Juwayriyah ne bayan kiya ke mujhe yahi yaad hai ke Nafi ne ”dahne hath mein“ bayan kiya.

Hum se Musaddad ne bayan kiya, unhon ne kaha hum se Hammad bin Zayd ne bayan kiya, in se Abd-ul-Aziz bin Suhayb ne aur in se Anas bin Malik razi Allahu anhu ne ke Rasool Allah salla Allahu alaihi wasallam ne chaandi ki ek angoothi banwayi aur is mein yeh naqsh khudwaya «Muhammadun Rasool-ullahi» aur logon se keh diya ke main ne chaandi ki ek angoothi banwa kar is par «Muhammadun Rasool-ullahi» naqsh karwaya hai. Is liye ab koi shakhs yeh naqsh apni angoothi par na khudwaye.

Imam Bukhari rahmahullah ne kaha ke mujh se Imam Ahmad bin Hanbal ne itna aur riwayat kiya, kaha mujh se Muhammad bin Abdullah Ansari ne, kaha ke mujh se mere walid ne, in se Sumama bin Abdullah ne aur in se Anas razi Allahu anhu ne bayan kiya ke Nabi Karim salla Allahu alaihi wasallam ki angoothi wafat tak Aap ke hath mein rahi. Aap ke baad Abu Bakr razi Allahu anhu ke hath mein aur Abu Bakr razi Allahu anhu ke baad Umar razi Allahu anhu ke hath mein rahi phir jab Usman razi Allahu anhu ki khilafat ka zamana aaya to woh Areis ke kunwien mein ek martaba baithe, bayan kiya ke phir angoothi nikaali aur usay ulatne palatne lage ke itne mein woh (kunwien mein) gir gayi. Anas razi Allahu anhu ne bayan kiya ke phir Usman razi Allahu anhu ke saath hum teen din tak usay dhoondte rahe aur kunwien ka saara pani bhi khainch dala lekin woh angoothi nahi mili.

Hum se Qutaybah bin Saeed ne bayan kiya, kaha hum se Layth bin Saad ne bayan kiya, in se Nafi ne, in se Abdullah bin Umar razi Allahu anhuma ne ke Rasool Allah salla Allahu alaihi wasallam ne sone ki ek angoothi banwayi aur Nabi Karim salla Allahu alaihi wasallam usay pehnte thay, is ka nageena hatheli ke hisse ki taraf rakhte thay. Phir logon ne bhi aaisi angoothiyaan banwa lein is ke baad ek din Nabi Karim salla Allahu alaihi wasallam mimbar par baithe aur apni angoothi utar di aur farmaya ke main usay pehnta tha aur is ka nageena andar ki jaanib rakhta thu, phir Aap salla Allahu alaihi wasallam ne usay utar kar phenk diya aur farmaya ke Allah ki qasam main ab usay kabhi nahi pehnoon ga. Pas logon ne bhi apni angoothiyaan utar kar phenk dein.

`Mujh se Muhammad bin Bashar ne bayan kiya, kaha hum se Ghandar ne bayan kiya, un se Shu'ba ne bayan kiya, kaha ke mein ne Qatada se suna, un se Anas bin Malik Radi Allahu Anhu ne bayan kiya ke jab Nabi Kareem صلی اللہ علیہ وسلم ne ahl-e-Room ko khat likhna chaha to sahabah ne kaha ke Roomi sirf mohr laga hua khat hi qabool karte hain. Nabi Kareem صلی اللہ علیہ وسلم ne chandi ki ek mohr banwayi goya mein is ki chamak ko is waqt bhi dekh raha hoon aur is par kalima «Muhammad Rasulullah» naqsh tha.