Aur Aap ke baad jo Khalifa hue unhon ne ye cheezain istemal keen un ko taqseem nahi kiya aur Aap (Sallallahu Alaihi Wasallam) ke moe mubarak aur nalain aur bartanon ka bayan jin ko Aap (Sallallahu Alaihi Wasallam) ke ashab waghera ne Aap ki wafat ke baad (tareekhi taur par) mutabarrak samjha
.

Hum se Muhammad Bin Abdullah Ansari ne bayan kiya, kaha ke mujh se mere walid Abdullah ne bayan kiya, un se Sumama ne aur un se Anas (Radi Allahu Anhu) ne ke jab Abu Bakr (Radi Allahu Anhu) Khalifa hue to unhon ne un ko (yaani Anas Radi Allahu Anhu ko) Bahrain (aamil bana kar) bheja aur ek parwana likh kar un ko diya aur is par Nabi Kareem (Sallallahu Alaihi Wasallam) ki angoothi ki mohr lagayi, mohr mubarak par teen satrain kanda theen, ek satar mein "Muhammad" doosri mein "Rasul" teesri mein "Allah" kanda tha
.

Mujh se Abdullah Bin Muhammad ne bayan kiya, kaha hum se Muhammad Bin Abdullah Asadi ne bayan kiya, un se Isa Bin Tahman ne bayan kiya, unhon ne kaha ke Anas Bin Malik (Radi Allahu Anhu) ne humein do purane joote nikal kar dikhaye jin mein do tasme lage hue thay, is ke baad phir Sabit Banani ne mujh se Anas (Radi Allahu Anhu) se bayan kiya ke wo dono joote Nabi Kareem (Sallallahu Alaihi Wasallam) ke thay
.

Mujh se Muhammad Bin Bashar ne bayan kiya, kaha hum se Abdul Wahhab Saqafi ne bayan kiya, kaha hum se Ayub Sakhtiyani ne bayan kiya, un se Humaid Bin Hilal ne aur un se Abu Burdah Bin Abu Musa ne bayan kiya kaha Aisha (Radi Allahu Anha) ne humein ek paiwand lagi hui chadar nikal kar dikhayi aur batlaya ke isi kapde mein Nabi Kareem (Sallallahu Alaihi Wasallam) ki rooh qabz hui thi. Aur Sulaiman Bin Mugheera ne Humaid se bayan kiya, unhon ne Abu Burdah se itna zyada bayan kiya ke Aisha (Radi Allahu Anha) ne Yemen ki bani hui ek moti izar (tehmad) aur ek kambal unhein kambalon mein se jin ko tum malba (aur mota paiwand-dar kehte ho) humein nikal kar dikhayi
.

Hum se Abdan ne bayan kiya, un se Abu Hamza ne, un se Asim ne, un se Ibn Sireen ne aur un se Anas Bin Malik (Radi Allahu Anhu) ne ke Nabi Kareem (Sallallahu Alaihi Wasallam) ka pani peene ka pyala toot gaya to Aap (Sallallahu Alaihi Wasallam) ne tooti hui jaghon ko chandi ki zanjeeron se jadwa liya. Asim kehte hain ke mein ne wo pyala dekha hai. Aur is mein mein ne pani bhi piya hai
.

Hum se Said Bin Muhammad Jarmi ne bayan kiya, kaha hum se Yaqub Bin Ibrahim ne bayan kiya, kaha hum se mere walid ne bayan kiya, un se Waleed Bin Kaseer ne, un se Muhammad Bin Amr Bin Halhala Douli ne, un se Ibn Shihab ne, un se Ali Bin Husain (Zain-ul-Abidin Rahimahullah) ne bayan kiya ke jab hum sab hazrat Husain Bin Ali (Radi Allahu Anhuma) ki shahadat ke baad Yazid Bin Muawiyah ke yahan se Madinah Munawwarah tashreef laye to Miswar Bin Makhrama (Radi Allahu Anhu) ne Aap se mulaqat ki, aur kaha agar Aap ko koi zaroorat ho to mujhe hukm farma dijiye. (Zain-ul-Abidin ne bayan kiya ke) mein ne kaha, mujhe koi zaroorat nahi hai. Phir Miswar (Radi Allahu Anhu) ne kaha to kya Aap mujhe Rasul Allah (Sallallahu Alaihi Wasallam) ki talwar inayat farmayenge? Kyunke mujhe khauf hai ke kuch log (Banu Umayya) ise Aap se na chheen lein aur Allah ki qasam! Agar wo talwar Aap mujhe inayat farma dein to koi shakhs bhi jab tak meri jaan baqi hai ise chheen nahi sakega. Phir Miswar (Radi Allahu Anhu) ne ek qissa bayan kiya ke Ali Bin Abi Talib (Radi Allahu Anhu) ne Fatima (Radi Allahu Anha) ki maujoodgi mein Abu Jahl ki ek beti (Jameela nami Radi Allahu Anha) ko paigham-e-nikah de diya tha. Mein ne khud suna ke isi masle par Rasul Allah (Sallallahu Alaihi Wasallam) ne apne isi mimbar par khade ho kar Sahaba ko khitab farmaya. Mein is waqt baligh tha. Aap (Sallallahu Alaihi Wasallam) ne khutba mein farmaya ke Fatima mujh se hai. Aur mujhe darr hai ke kahin wo (is rishte ki wajah se) kisi gunah mein na par jaye ke apne deen mein wo kisi fitne mein mubtala ho. Is ke baad Aap (Sallallahu Alaihi Wasallam) ne khandan-e-Bani Abd-e-Shams ke ek apne damad (Aas Bin Rabia) ka zikr kiya aur damadi se mutaliq Aap ne un ki tareef ki, Aap ne farmaya ke unhon ne mujh se jo baat kahi sach kahi, jo waada kiya, ise poora kiya. Mein kisi halal (yaani nikah-e-sani) ko haram nahi kar sakta aur na kisi haram ko halal banata hoon. Lekin Allah ki qasam! Rasul Allah ki beti aur Allah ke dushman ki beti ek sath jama nahi hongi
.

Hum se Qutaiba Bin Said ne bayan kiya, kaha hum se Sufyan Bin Uyaina ne bayan kiya, un se Muhammad Bin Sauqa ne, un se Munzir Bin Ya'la ne aur un se Muhammad Bin Hanafiyya ne, unhon ne kaha ke agar Ali (Radi Allahu Anhu), Usman (Radi Allahu Anhu) ko bura kehne wale hote to is din hote jab kuch log Usman (Radi Allahu Anhu) ke aamilon ki (jo zakat wasool karte thay) shikayat karne un ke paas aaye. Unhon ne mujh se kaha Usman (Radi Allahu Anhu) ke paas ja aur ye zakat ka parwana le ja. Un se kehna ke ye parwana Aap (Sallallahu Alaihi Wasallam) ka likhwaya hua hai. Tum apne aamilon ko hukm do ke wo isi ke mutabiq amal karein. Chunanche mein ise le kar Usman (Radi Allahu Anhu) ki khidmat mein hazir hua aur unhein paigham pahuncha diya, lekin unhon ne farmaya ke humein is ki koi zaroorat nahi (kyunke hamare paas is ki naql maujood hai) mein ne ja kar Ali (Radi Allahu Anhu) se ye waqiya bayan kiya, to unhon ne farmaya ke accha, phir is parwane ko jahan se uthaya hai wahin rakh do
.

Humaidi ne bayan kiya, unhon ne kaha hum se Sufyan ne bayan kiya, unhon ne kaha hum se Muhammad Bin Sauqa ne kaha ke mein ne Munzir Thauri se suna, wo Muhammad Bin Hanafiyya se bayan karte thay ke mere walid (Ali Radi Allahu Anhu) ne mujh ko kaha ke ye parwana Usman (Radi Allahu Anhu) ko le ja kar de ao, is mein zakat se mutaliq Rasul Allah (Sallallahu Alaihi Wasallam) ke bayan karda ahkamat darj hain
.