«saeedan» zameen ki zahiri satah ko kehte hain . Jabir ne kaha ke taghoot bare zalim mushrik qism ke sardar log jin ke yahan jahiliyat mein log muqadmaat le jate thay . Ek aisa sardar qabila Juhayna mein tha , ek qabila Aslam mein tha aur har qabile mein hi ek aisa taghoot hota tha . Yeh wahi kahin thay jin ke paas Shaytan (ghaib ki khabrein le kar) aaya karte thay . Umar bin Khattab razi Allahu anhu ne kaha ke «al-jibtu» se murad jadoo hai aur «at-taghootu» se murad Shaytan hai aur Ikrimah ne kaha ke «al-jibtu» Habshi zaban mein Shaytan ko kehte hain aur «at-taghootu» bamaani kahin ke aata hai .

Hum se Muhammad bin Salam Baykandi ne byaan kiya , kaha hum ko Abdah bin Sulayman ne khabar di , unhein Hisham bin Urwah ne , unhein un ke walid ne aur un se Aisha razi Allahu anha ne byaan kiya ke (mujh se) Asma razi Allahu anha ka ek haar gum ho gaya to Rasool Allah salla Allahu alaihi wasallam ne chand sahabah razi Allahu anhum ko usay talash karne ke liye bheja . Idhar namaz ka waqt ho gaya , na log wuzu se thay aur na pani maujood tha . Is liye wuzu ke baghair namaz parhi gayi is par Allah Ta'ala ne tayammum ki aayat nazil ki .