Hum se Qutaibah bin Sa'id ne bayan kiya, in se Malik ne, in se Abdur Rahman bin Qasim ne bayan kiya, in se in ke walid ne bayan kiya aur in se Aisha Radi Allahu Anha ne bayan kiya ke ek safar mein hum Rasoolullah Sallallahu Alaihi Wa Sallam ke sath chale jab hum Maqam-e-Baida ya Maqam-e-Dhat al-Jaish par pahunche to mera ek haar toot kar gir gaya, is liye Nabi Kareem Sallallahu Alaihi Wa Sallam is ki talash ke liye wahan thehar gaye aur Sahaba bhi Aap ke sath thehar gaye lekin na is jagah pani tha aur na in ke pas pani tha. Log Abu Bakr Radi Allahu Anhu ke pas aa kar kehne lage ke Aap mulahiza nahi farmate, Aisha Radi Allahu Anha ne kya kiya, Nabi Kareem Sallallahu Alaihi Wa Sallam ko yahin rok liya hai. Itne Sahaba Aap ke sath hain. Na to yahan pani hai aur na log apne sath (pani) liye hue hain. Is ke baad Abu Bakr Radi Allahu Anhu andar aaye. Rasoolullah Sallallahu Alaihi Wa Sallam is waqt apna sar mubarak meri raan par rakkhe hue so rahe thay. Woh kehne lage, tumhari wajah se Aap Sallallahu Alaihi Wa Sallam ko aur sab logon ko rukna para. Ab na yahan kahin pani hai aur na logon ke pas pani hai. Aisha Radi Allahu Anha ne bayan kiya ke Abu Bakr Radi Allahu Anhu ne mujh par ghussa kiya aur jo kuch Allah ko manzoor tha unhon ne kaha aur apne hath se meri kokh mein kachoke lagane lage. Mein zaroor tarap uthti magar Aap Sallallahu Alaihi Wa Sallam ka sar mubarak meri raan par tha. Aap Sallallahu Alaihi Wa Sallam soye rahe. Jab subah hui to pani nahi tha aur isi mauqay par Allah Ta'ala ne tayammum ka hukm nazil farmaya aur sab ne tayammum kiya. Is par Usaid bin Hudair Radi Allahu Anhu ne kaha ke Ae Aal-e-Abu Bakr! Yeh tumhari koi pehli barkat nahi hai. Aisha Radi Allahu Anha ne bayan kiya ke phir hum ne jab is ont ko uthaya jis par mein sawar thi to haar isi ke neeche humein mila.