Hum se Yahya bin Sulayman ne byaan kiya , kaha ke mujh se Abdullah bin Wahb ne byaan kiya , kaha ke mujhe Amr bin al-Harith ne khabar di , un se Abdur Rahman bin Qasim ne byaan kiya , un se un ke walid Qasim ne aur un se Aisha razi Allahu anha ne ke mera haar Maqam e Bayda mein gum ho gaya tha . Hum Madinah wapas aa rahe thay , Nabi Karim salla Allahu alaihi wasallam ne wahin apni sawari rok di aur utar gaye , phir Nabi Karim salla Allahu alaihi wasallam sar mubarak meri god mein rakh kar so rahe thay ke Abu Bakr razi Allahu anhu andar aa gaye aur mere seene par zor se hath maar kar farmaya ke ek haar ke liye tum ne Nabi Karim salla Allahu alaihi wasallam ko rok liya lekin Nabi Karim salla Allahu alaihi wasallam ke aaram ke khayal se main be-hiss o harakat baithi rahi haalan ke mujhe takleef hui thi . Phir Nabi Karim salla Allahu alaihi wasallam bedar huay aur subah ka waqt hua aur pani ki talash hui lekin kahin pani ka naam o nishan na tha . Isi waqt yeh aayat utri «ya ayyuhallazhina aamanu izha qumtum ilassalati» al-kh . Usayd bin Huzayr razi Allahu anhu ne kaha: Ae Aal e Abi Bakr! Tumhein Allah Ta'ala ne logon ke liye bais e barkat banaya hai . Yaqeenan tum logon ke liye bais e barkat ho . Tumhara haar gum hua Allah ne is ki wajah se tayammum ki aayat nazil farma di jo qayamat tak Musalmanon ke liye aasani aur barkat hai .