«al-mukhtalu» aur «khattalu» ka maani ek hai yani ghuroor karne aur akarnay wala . «natmisa wujoohahum» ka matlab yeh hai ke hum un ke chehron ko mait kar gadhe ki tarah sapaat kar dein ge , yeh «tamsul kitabi» se nikla hai yani likha hua mait diya . Lafz «saeeran» bamaani eendhan ke hai .

Hum se Sadaqah bin Fadl ne byaan kiya , kaha hum ko Yahya bin Saeed Qattan ne khabar di , unhein Sufyan Sawri ne , unhein Sulayman ne , unhein Ibrahim ne , unhein Ubaydah ne aur unhein Abdullah bin Masood razi Allahu anhu ne , Yahya ne byaan kiya ke hadees ka kuch hissa Amr bin Murrah se hai (ba-wasta Ibrahim) ke Abdullah bin Masood razi Allahu anhu ne byaan kiya ke mujh se Nabi Karim salla Allahu alaihi wasallam ne farmaya ke mujhe Quran parh kar sunao . Main ne arz kiya , Nabi salla Allahu alaihi wasallam ko main parh ke sunaon ? Woh to Aap salla Allahu alaihi wasallam par hi nazil hota hai . Aap salla Allahu alaihi wasallam ne farmaya ke main doosre se sunna chahta hoon . Chunanche main ne Aap ko Surah Nisa sunani shuru ki , jab main «fakaifa izha ji'na min kulli ummatin bishaheedin wa ji'na bika ala ha-ula-i shaheeda» par pahuncha to Aap salla Allahu alaihi wasallam ne farmaya ke thehar jao . Main ne dekha to Aap salla Allahu alaihi wasallam ki aankhon se aansu beh rahe thay .