Aur Allah Ta'ala ne (Surah Al-Mumtahina mein) farmaya «la tthzw edwy wedwkm awlyae» "Musalmano! Mere aur apne dushmanon ko dost na banao." Lafz jasoos tajassus se nikla hai yani kisi baat ko khod kar nikalna
.

Hum se Ali Bin Abdullah ne bayan kiya ‘ kaha hum se Sufyan Bin Uyainah ne bayan kiya ‘ kaha hum se Amr Bin Dinar ne bayan kiya ‘ Sufyan ne ye hadees Amr Bin Dinar se do martaba suni thi. Unhon ne bayan kiya ke mujhe Hasan Bin Muhammad ne khabar di ‘ kaha ke mujhe Ubaidullah Bin Abi Rafi ne khabar di ‘ kaha ke mein ne Ali (Radi Allahu Anhu) se suna ‘ aap bayan karte thay ke Rasul Allah (Sallallahu Alaihi Wasallam) ne mujhe, Zubair aur Miqdad Bin Aswad (Radi Allahu Anhum) ko ek muhim par bheja aur Aap (Sallallahu Alaihi Wasallam) ne farmaya ke jab tum log Rauda-e-Khakh (jo Madinah se barah mil ke fasle par ek jagah ka naam hai) par pahunch jao to wahan ek burhiya aurat tumhein oont par sawar mile gi aur us ke paas ek khat ho ga ‘ tum log us se wo khat le lena. Hum rawana hue aur hamare ghore humein tezi ke sath liye ja rahe thay. Aakhir hum Rauda-e-Khakh par pahunch gaye aur wahan waqayi ek boorhi aurat maujood thi jo oont par sawar thi. Hum ne us se kaha ke khat nikal. Us ne kaha ke mere paas to koi khat nahi. Lekin jab hum ne use dhamki di ke agar tu ne khat na nikala to tumhare kapre hum khud utaar dein ge. Is par us ne apni gandhi hui chhoti ke andar se khat nikal kar diya ‘ aur hum ise Rasul Allah (Sallallahu Alaihi Wasallam) ki khidmat mein le kar hazir hue ‘ is ka mazmoon ye tha ‘ Hatib Bin Abi Balta'a ki taraf se mushrikeen-e-Makkah ke chand aadmiyon ki taraf ‘ is mein unhon ne Rasul Allah (Sallallahu Alaihi Wasallam) ke baaz bhedon ki khabar di thi. Aap (Sallallahu Alaihi Wasallam) ne farmaya: Ae Hatib! Ye kya waqea hai? Unhon ne arz kiya: ya Rasul Allah! Mere bare mein ajlat se kaam na lijaiye. Meri haisiyat (Makkah mein) ye thi ke Quraish ke sath mein ne rehna sehna ikhtiyar kar liya tha ‘ un se rishta nata mera kuch bhi na tha. Aap ke sath jo doosre muhajireen hain un ki to Makkah mein sab ki rishtedari hai aur Makkah wale isi wajah se un ke azeezon ki aur un ke maalon ki hifazat o himayat karein ge magar Makkah walon ke sath mera koi nasbi talluq nahi hai ‘ is liye mein ne socha ke un par koi ihsan kar doon jis se asar le kar wo mere bhi azeezon ki Makkah mein hifazat karein ge. Mein ne ye kaam kufr ya irtidad ki wajah se hargiz nahi kiya hai aur na Islam ke baad kufr se khush ho kar. Rasul Allah (Sallallahu Alaihi Wasallam) ne sun kar farmaya ke Hatib ne sach kaha hai. Umar (Radi Allahu Anhu) ne kaha: ya Rasul Allah! Ijazat dijaiye mein is munafiq ka sar ura doon ‘ Aap (Sallallahu Alaihi Wasallam) ne farmaya "Nahi ‘ ye Badr ki larayi mein (musalmanon ke sath mil kar) lare hain aur tumhein maloom nahi ‘ Allah Ta'ala mujahideen-e-Badr ke ahwal (maut tak ke) pehle hi se janta tha ‘ aur wo khud hi farma chuka hai ke tum jo chaho karo mein tumhein maaf kar chuka hoon." Sufyan Bin Uyainah ne kaha ke hadees ki ye sanad bhi kitni umdah hai
.