Hum se Abdullah Bin Muhammad Musnadi ne bayan kiya ‘ kaha hum se Ibn Uyainah ne bayan kiya ‘ in se Amr Bin Dinar ne ‘ unhon ne Jabir Bin Abdullah (Radi Allahu Anhuma) se suna ‘ unhon ne bayan kiya ke Badr ki larayi se qaidi (mushrikeen-e-Makkah) laye gaye. Jin mein Abbas (Radi Allahu Anhu) bhi thay. Un ke badan par koi kapre nahi tha. Nabi Kareem (Sallallahu Alaihi Wasallam) ne un ke liye qamees talash karwayi. (Wo lambe qad ke thay) is liye Abdullah Bin Ubayy (munafiq) ki qamees hi un ke badan par aa saki aur Nabi Kareem (Sallallahu Alaihi Wasallam) ne unhein wo qamees pehna di. Nabi Kareem (Sallallahu Alaihi Wasallam) ne (Abdullah Bin Ubayy ki maut ke baad) apni qamees utaar kar ise pehnayi thi. Ibn Uyainah ne kaha ke Nabi Kareem (Sallallahu Alaihi Wasallam) par jo is ka ihsan tha ‘ Aap (Sallallahu Alaihi Wasallam) ne chaha ke ise ada kar dein
.