Aur jo khat Hatib bin Abi Balta'ah ne ahl e Makkah ko Nabi Karim salla Allahu alaihi wasallam ke ghazwa ke irada se aagah karne ke liye bheja tha us ka byaan .

Hum se Qutaybah bin Saeed ne byaan kiya ‘ kaha hum se Sufyan bin Uyaynah ne byaan kiya ‘ un se Amr bin Dinar ne byaan kiya ‘ unhein Hasan bin Muhammad bin Ali ne khabar di aur unhon ne Ubaydullah bin Rafi se suna ‘ unhon ne byaan kiya ke main ne Ali razi Allahu anhu se suna ‘ unhon ne byaan kiya ke mujhe , Zubayr aur Miqdad razi Allahu anhum ko Rasool Allah salla Allahu alaihi wasallam ne rawana kiya aur hidayat ki ke (Makkah ke raste par) chale jana jab tum maqam Rawdah Khakh par pahuncho to wahan tumhein hawdaj mein ek aurat mile gi . Woh ek khat liye huay hai ‘ tum us se woh le lena . Unhon ne kaha ke hum rawana huay . Hamare ghore hamain tezi ke saath liye ja rahe thay . Jab hum Rawdah Khakh par pahunche to waqayi wahan hamain ek aurat hawdaj mein sawar mili (jis ka naam Sara ya Kunad hai) hum ne us se kaha ke khat nikal . Woh kehne lagi ke mere paas to koi khat nahi hai lekin jab hum ne us se yeh kaha ke agar tu ne khud se khat nikal kar hamain nahi diya to hum tera kapra utaar kar (talashi lain ge) tab us ne apni choti mein se woh khat nikala . Hum woh khat le kar Nabi Karim salla Allahu alaihi wasallam ki khidmat mein wapas huay . Is mein yeh likha tha ke Hatib bin Abi Balta'ah ki taraf se chand mushrikeen e Makkah ke naam (Safwan bin Umayyah aur Suhayl bin Amr aur Ikrimah bin Abu Jahl) phir unhon ne is mein mushrikeen ko Nabi Karim salla Allahu alaihi wasallam ke baaz bhedon ki khabar bhi di thi . (Aap fauj le kar aana chahte hain) Nabi Karim salla Allahu alaihi wasallam ne daryaft farmaya ke ae Hatib! Tu ne yeh kya kiya ? Unhon ne arz kiya ya Rasool Allah! Mere baare mein faisla karne mein Aap jaldi na farmayen ‘ main is ki wajah arz karta hoon . Baat yeh hai ke main doosre Muhajireen ki tarah Quraysh ke khandan se nahi hoon ‘ sirf un ka haleef ban kar un se jurr gaya hoon aur doosre Muhajireen ke wahan azeez o aqriba hain jo un ke ghar baar maal o asbab ki nigrani karte hain . Main ne chaha ke khair jab main khandan ki roo se un ka shareek nahi hoon to kuch ihsan hi un par aisa kar doon jis ke khayal se woh mere kunba walon ko na satayen . Main ne yeh kaam apne deen se phir kar nahi kiya aur na Islam lane ke baad mere dil mein kufr ki himayat ka jazba hai . Is par Nabi Karim salla Allahu alaihi wasallam ne farmaya ke waqayi unhon ne tumhare samne sachi baat keh di hai . Umar razi Allahu anhu ne arz kiya: ya Rasool Allah! Ijazat ho to main is munafiq ki gardan ura doon lekin Nabi Karim salla Allahu alaihi wasallam ne farmaya ke yeh Ghazwa Badr mein shareek rahe hain aur tumhein kya maloom Allah Ta'ala jo Ghazwa Badr mein shareek hone walon ke kaam se waqif hai Surah al-Mumtahanah mein us ne un ke mutalliq khud farma diya hai ke ”jo chaho karo main ne tumhare gunah maaf kar diye“ is par Allah Ta'ala ne yeh aayat nazil ki «ya ayyuhallazhina aamanu la tattakhizhू 'aduwwi wa 'aduwwakum awliya'a tulquna ilayhim bil mawaddati» ”ae woh logo jo iman la chuke ho! Mere aur apne dushmanon ko dost na banao ke un se tum apni mohabbat ka izhaar karte raho . Aayat «faqad dhalla sawa'as sabeel» tak .