Hum se Abdullah Bin Muslimah Qabni ne bayan kiya ' kaha hum se Imam Malik ne Ibn Shihab se ' wo Urwah Bin Zubair se aur un se Nabi Kareem (Sallallahu Alaihi Wasallam) ki zauja-e-mutahharah Aisha (Radi Allahu Anha) ne bayan kiya ke Utbah Bin Abi Waqqas ne marte waqt apne bhai Saad Bin Abi Waqqas (Radi Allahu Anhu) ko wasiyat ki thi ke Zamah ki bandi ka larka mera hai ' is liye tum ise le lena chunancha Fatah Makkah ke moqa par Saad (Radi Allahu Anhu) ne ise le liya aur kaha ke mere bhai ka larka hai. Unhon ne is baare mein mujhe is ki wasiyat ki thi. Phir Abd Bin Zamah (Radi Allahu Anhu) uthe aur kehne lage ke ye to mera bhai hai mere baap ki laundi ne is ko jina hai aur mere baap ke bistar par paida hua hai. Phir ye dono Nabi Kareem (Sallallahu Alaihi Wasallam) ki khidmat mein hazir hue. Saad Bin Abi Waqqas (Radi Allahu Anhu) ne arz kiya ya Rasul Allah! Ye mere bhai ka larka hai ' mujhe us ne wasiyat ki thi. Lekin Abd Bin Zamah (Radi Allahu Anhu) ne arz kiya ke ye mera bhai aur mere walid ki bandi ka larka hai. Nabi Kareem (Sallallahu Alaihi Wasallam) ne faisla ye farmaya ke larka tumhara hi hai Abd Bin Zamah! Baccha farash ke tehat hota hai aur zani ke hisse mein patthar hain lekin Aap (Sallallahu Alaihi Wasallam) ne Saudah Bint-e-Zamah (Radi Allahu Anha) se farmaya ke is larke se parda kar kyunke Aap (Sallallahu Alaihi Wasallam) ne Utbah ki mushabihat is larke mein saaf payi thi. Chunancha is ke baad is larke ne Saudah (Radi Allahu Anha) ko kabhi na dekha ta-aan-ke aap Allah Ta'ala se ja milein
.