Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se Riwayat kiya ke Qiyamat ki nishaniyon mein se ek ye bhi hai ke londi apne malik ko jane
.

Hum se Abu Al-Yaman ne bayan kiya, kaha hum ko Shoaib ne khabar di, un se Zuhri ne bayan kiya, un se Urwah Bin Zubair ne bayan kiya ke Aisha (Radi Allahu Anha) ne farmaya Utba Bin Abi Waqas ne apne bhai Saad Bin Abi Waqas (Radi Allahu Anhu) ko wasiyat ki thi ke Zama ki bandi ke bacche ko apne qabze mein le lein. Us ne kaha tha ke wo larka mera hai. Phir jab Fatah Makkah ke moqa par Rasul Allah (Sallallahu Alaihi Wasallam) (Makkah) tashreef laye, to Saad (Radi Allahu Anhu) ne Zama ki bandi ke larke ko le liya aur Rasul Allah (Sallallahu Alaihi Wasallam) ki khidmat mein hazir hue, Abd Bin Zama bhi sath thay. Saad (Radi Allahu Anhu) ne arz kiya, Ya Rasul Allah! ye mere bhai ka larka hai, unhon ne mujhe wasiyat ki thi ke ye unhein ka larka hai. Lekin Abd Bin Zama ne arz kiya. Ya Rasul Allah! ye mera bhai hai. Jo Zama (mere walid) ki bandi ka larka hai. Unhein ke "firash" par paida hua hai. Rasul Allah (Sallallahu Alaihi Wasallam) ne Zama ki bandi ke larke ko dekha to waqai wo Utba ki soorat par tha. Lekin Aap (Sallallahu Alaihi Wasallam) ne farmaya, Ae Abd Bin Zama! ye tumhari parwarish mein rahe ga. Kyunke baccha tumhare walid hi ke "farsh" par paida hua hai. Aap (Sallallahu Alaihi Wasallam) ne sath hi ye bhi farma diya ke "Ae Sauda Bint Zama! is se parda kiya kar" ye hidayat Aap (Sallallahu Alaihi Wasallam) ne is liye ki thi ke bacche mein Utba ki shabahat dekh li thi. Sauda (Radi Allahu Anha) Aap (Sallallahu Alaihi Wasallam) ki biwi theen
.