Hum se Abdullah Bin Muhammad ne bayan kiya, kaha ke hum se Sufyan ne bayan kiya, un se Zuhri ne, un se Urwah ne aur un se Aisha (Radi Allahu Anha) ne ke Zama ki ek bandi ke larke ke baare mein Abd Bin Zama (Radi Allahu Anhu) aur Saad Bin Abi Waqqas (Radi Allahu Anhu) apna jhagrah Rasul Allah (Sallallahu Alaihi Wasallam) ki khidmat mein lay kar gaye. Saad (Radi Allahu Anhu) ne kaha: Ya Rasul Allah! mere bhai ne mujh ko wasiyat ki thi ke jab mein (Makkah) aaon aur Zama ki bandi ke larke ko dekhoon to ise apni parwarish mein lay loon. Kyunke wo unhein ka larka hai. Aur Abd Bin Zama ne kaha ke wo mera bhai hai aur mere baap ki bandi ka larka hai. Mere walid hi ke ”farash“ mein is ki paidaish hui hai. Nabi Kareem (Sallallahu Alaihi Wasallam) ne bacche ke andar (Utbah ki) wazeh mushabihat dekhi. Lekin farmaya ke ay Abd Bin Zama! larka to tumhari hi parwarish mein rahega kyunke larka ”farash“ ke tabe hota hai aur Saudah to is larke se parda kiya kar
.