Hum se Adam bin Abi Iyas ne bayan kiya , kaha hum se Ibn Abi Zhayb ne bayan kiya , in se Saeed Muqbiri ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”tum se kisi shakhs ko is ka amal najat nahi dila sake ga .“ Sahabah ne arz ki aur Aap ko bhi nahi ya Rasool Allah ? Farmaya ”aur mujhe bhi nahi , siwa is ke ke Allah Ta'ala mujhe apni rahmat ke saye mein le le . Pas tum ko chahiye ke durusti ke saath amal karo aur miyana-rawi ikhtiyar karo . Subah aur shaam , isi tarah raat ko zhara sa chal liya karo aur aitidal ke saath chala karo manzil e maqsud ko pahunch jao ge .“

Hum se Abd-ul-Aziz bin Abdullah ne bayan kiya , kaha hum se Sulayman ne bayan kiya , in se Musa bin Uqbah ne , in se Abu Salamah bin Abd-ur-Rahman ne aur in se Aisha razi Allahu anha ne ke Rasool Allah salla Allahu alaihi wasallam ne farmaya ”darmiyani chaal ikhtiyar karo aur buland-parwazi na karo aur jaan lo , tum mein se kisi ka amal usay jannat mein nahi dakhil kar sake ga , Allah ke nazdeek sab se pasandida amal woh hai jis par hameshagi ki jaye khwah kam hi kyun na ho .“

Mujh se Muhammad bin Ar-ara ne bayan kiya , kaha hum se Shubah ne bayan kiya , in se Saad bin Ibrahim ne , in se Abu Salamah ne aur in se Aisha razi Allahu anha ne bayan kiya ke Nabi Karim salla Allahu alaihi wasallam se poochha gaya kaun sa amal Allah ke nazdeek zyada pasandida hai ? Farmaya ke jis par hameshagi ki jaye , khwah woh thori hi ho aur farmaya naik kaam karne mein itni hi takleef uthao jitni taqat hai (jo hamesha nibh sake) .

Mujh se Usman bin Abi Shaybah ne bayan kiya , unhon ne kaha hum se Jareer ne bayan kiya , in se Mansoor ne , in se Ibrahim Nakhai ne aur in se Alqama ne bayan kiya ke main ne Umm al-Momineen Aisha razi Allahu anha se poochha: Umm al-Momineen! Nabi Karim salla Allahu alaihi wasallam kyunkar ibadat kiya karte thay kya Aap ne kuch khaas din khaas kar rakkhe thay ? Batlaya ke nahi Nabi Karim salla Allahu alaihi wasallam ke amal mein hameshagi hoti thi aur tum mein kaun hai jo in amlon ki taqat rakhta ho jin ki Nabi Karim salla Allahu alaihi wasallam taqat rakhte thay .

Hum se Ali bin Abdullah ne bayan kiya , kaha hum se Muhammad bin Zabarqan ne , kaha hum se Musa bin Uqbah ne , in se Abu Salamah bin Abd-ur-Rahman ne , in se Aisha razi Allahu anha ne ke Nabi Karim salla Allahu alaihi wasallam ne farmaya ”dekho jo naik kaam karo theek taur se karo aur hadd se na barh jao balkay is ke qareeb raho (miyana-rawi ikhtiyar karo) aur khush raho aur yaad rakkho ke koi bhi apne amal ki wajah se jannat mein nahi jaye ga . Sahabah ne arz kiya: aur Aap bhi nahi ya Rasool Allah! Farmaya aur main bhi nahi . Siwa is ke ke Allah apni maghfirat wa rahmat ke saye mein mujhe dhaank le . Madini ne bayan kiya ke mera khayal hai ke Musa bin Uqbah ne yeh hadees Abu Salamah se Abu al-Nadr ke waaste se suni hai , Abu Salamah ne Aisha razi Allahu anha se . Aur Affan bin Muslim ne bayan kiya ke hum se Wuhaib ne bayan kiya , in se Musa bin Uqbah ne bayan kiya , kaha ke main ne Abu Salamah razi Allahu anhu se suna aur unhon ne Aisha razi Allahu anha se aur unhon ne Nabi Karim salla Allahu alaihi wasallam se ke Aap salla Allahu alaihi wasallam ne farmaya ”durusti ke saath amal karo aur khush raho .“ Aur Mujahid ne bayan kiya ke «sadaadan sadeedan» har do ke maani sidq ke hain .

Mujh se Ibrahim bin al-Munzhir ne bayan kiya , unhon ne kaha hum se Muhammad bin Falih ne bayan kiya , unhon ne kaha ke mujh se mere walid ne bayan kiya , in se Bilal bin Ali ne bayan kiya ke main ne Anas bin Malik razi Allahu anhu ko yeh kehte suna ke Rasool Allah salla Allahu alaihi wasallam ne hamain ek din namaz parhayi , phir mimbar par charhe aur apne hath se masjid ke qibla ki taraf isharah kiya aur farmaya ke is waqt jab main ne tumhein namaz parhayi to mujhe is diwar ki taraf jannat aur dozakh ki tasveer dikhayi gayi main ne (saari umr mein) aaj ki taraf na koi bahisht ki si khoobsurat cheez dekhi na dozakh ki si daraanay , main ne aaj ki tarah na koi bahisht jaisi khoobsurat cheez dekhi na dozakh jaisi daraanay cheez .

Aur Sufyan bin Uyaynah ne kaha ke Quran ki koi aayat mujh par itni sakht nahi guzri jitni (Surah al-Maida) ki yeh aayat hai «lastum alaa shay-in hat-taa tuqeemut-tauraata wal-injeela wa maa unzhila ilaikum-mir-rabbikum» ke ”Ae Paighambar ke aqarib walo! tumhara tareeq (mazhab) koi cheez nahi hai jab tak Tauraat aur Injeel aur in kitabon par jo tum par utri hain poora amal na karo .“

Hum se Qutaybah bin Saeed ne bayan kiya , unhon ne kaha hum se Yaqoob bin Abd-ul-Rahman ne bayan kiya , in se Amr bin Abi Amr ne bayan kiya , in se Saeed bin Abi Saeed Muqbiri ne aur in se Abu Hurairah razi Allahu anhu ne bayan kiya ke main ne Rasool Allah salla Allahu alaihi wasallam se suna , Aap salla Allahu alaihi wasallam ne farmaya ke Allah Ta'ala ne rahmat ko jis din banaya to is ke sau hisse kiye aur apne paas un mein se ninaanway rakkhe . Is ke baad tamam makhlooq ke liye sirf ek hissa rahmat ka bheja . Pas agar kafir ko woh tamam raham maloom ho jaye jo Allah ke paas hai to woh jannat se na-umeed na ho aur agar momin ko woh tamam azab maloom ho jayein jo Allah ke paas hain to dozakh se kabhi be-khauf na ho .

Aur Allah Ta'ala ne farmaya bilashubha sabr karne walon ko in ka sawab be-hisab diya jaye ga aur Umar razi Allahu anhu ne kaha ke hamain ne sab se umdah zindagi sabr hi mein paayi hai .

Hum se Abu al-Yaman ne bayan kiya , kaha hum ko Shuayb ne khabar di , in se Zuhri ne bayan kiya , kaha ke mujhe Ata bin Yazid Laysi ne khabar di aur unhein Abu Saeed razi Allahu anhu ne khabar di ke chand Ansari sahabah ne Rasool Allah salla Allahu alaihi wasallam se maanga aur jis ne bhi Nabi Karim salla Allahu alaihi wasallam se maanga Nabi Karim salla Allahu alaihi wasallam ne usay diya , yahan tak ke jo maal Aap ke paas tha woh khatm ho gaya . Jab sab kuch khatm ho gaya jo Nabi Karim salla Allahu alaihi wasallam ne apne donon hathon se diya tha to Aap salla Allahu alaihi wasallam ne farmaya ke jo bhi achhi cheez mere paas ho gi main usay tum se bacha ke nahi rakkhta hoon . Baat yeh hai ke jo tum mein (sawal se) bachta rahe ga Allah bhi usay ghaib se de ga aur jo shakhs dil par zor daal kar sabr kare ga Allah bhi usay sabr de ga aur jo be-parwa rehna ikhtiyar kare ga Allah bhi usay be-parwa kar de ga aur Allah ki koi neimat sabr se barh kar tum ko nahi mili .