Hum se Yahya bin Bukair ne bayan kiya , unhon ne kaha hum se Layth bin Saad ne Aqeel ke wastay se bayan kiya , unhon ne Ibn Shihab Zuhri se , unhon ne kaha mujhe Urwah bin Zubair ne khabar di ke Nabi Karim salla Allahu alaihi wa sallam ki zauja mutahhara Umm ul Momineen Aisha raziyallahu anha ne batlaya ke mein ne jab se hosh sambhala to apne maan baap ko muslim hi paya aur hum par koi din aisa nahi guzra jis mein Rasool Allah salla Allahu alaihi wa sallam subah wa sham din ke dono waqt hamare ghar tashreef na laye hun . Phir Abu Bakr raziyallahu anhu ki samajh mein ek tarteeb aayi to unhon ne ghar ke samne ek masjid bana li , woh is mein namaz parhte aur Quran Majeed ki tilawat karte . Mushrikeen ki auraten aur un ke bache wahan taajjub se sunte aur khare ho jate aur aap ki taraf dekhte rehte . Abu Bakr raziyallahu anhu bare rone wale aadmi thay . Jab Quran Kareem parhte to aansuon par qabu na rehta , Quraish ke mushrik sardar is surat e haal se ghabra gaye .

Aur Abdullah bin Awn ne ek aise ghar ki masjid mein namaz parhi jis ke darwaze aam logon par band kiye gaye thay .

Hum se Musaddad ne bayan kiya , kaha hum se Abu Muawiya ne Amash ke wastay se , unhon ne Abu Saleh Dhakwan se , unhon ne Abu Hurairah raziyallahu anhu se , unhon ne Rasool Allah salla Allahu alaihi wa sallam se ke aap salla Allahu alaihi wa sallam ne farmaya , jamaat ke sath namaz parhne mein ghar ke andar ya bazaar dukan waghera mein namaz parhne se pachees guna sawab zyada milta hai . Kyunke jab koi shakhs tum mein se wudu kare aur is ke aadab ka lihazz rakhe phir masjid mein sirf namaz ki gharz se aaye to is ke har qadam par Allah Taala ek darja is ka buland karta hai aur ek gunah is se maaf karta hai . Is tarah woh masjid ke andar aaye ga . Masjid mein aane ke baad jab tak namaz ke intizar mein rahe ga . Isay namaz hi ki halat mein shumar kiya jaye ga aur jab tak is jagah baitha rahe ga jahan is ne namaz parhi hai to farishtay is ke liye rehmat khudawandi ki duayen karte hain Allahumma ighfir lahu , Allahumma irhamhu aye Allah! is ko bakhsh de , aye Allah! is par reham kar . Jab tak ke riyah kharij kar ke woh farishton ko takleef na de .

Hum se Hamid bin Umar ne Bishr bin Mufaddal ke wastay se bayan kiya , kaha hum se Aasim bin Muhammad ne , kaha hum se Waqid bin Muhammad ne apne walid Muhammad bin Zaid ke wastay se , unhon ne Abdullah bin Umar ya Abdullah bin Amr bin Aas raziyallahu anhum se ke Nabi Karim salla Allahu alaihi wa sallam ne apni ungliyon ko ek doosre mein dakhil kiya .

Hum se Hamid bin Umar ne Bishr bin Mufaddal ke wastay se bayan kiya , kaha hum se Aasim bin Muhammad ne , kaha hum se Waqid bin Muhammad ne apne walid Muhammad bin Zaid ke wastay se , unhon ne Abdullah bin Umar ya Abdullah bin Amr bin Aas raziyallahu anhum se ke Nabi Karim salla Allahu alaihi wa sallam ne apni ungliyon ko ek doosre mein dakhil kiya .

Aur Aasim bin Ali ne kaha , hum se Aasim bin Muhammad ne bayan kiya ke mein ne is hadees ko apne walid Muhammad bin Zaid se suna . Lekin mujhe hadees yaad nahi rahi thi . To mere bhai Waqid ne is ko durusti se apne walid se riwayat kar ke mujhe bataya . Woh kehte hain ke Abdullah bin Amr bin Aas raziyallahu anhuma se Rasool Allah salla Allahu alaihi wa sallam ne farmaya ke Abdullah bin Amr tumhara kya haal ho ga jab tum bure logon mein reh jao ge is tarah yani aap salla Allahu alaihi wa sallam ne ek hath ki ungliyan doosre hath mein kar ke dikhlayen .

Hum se Khalad bin Yahya ne bayan kiya , kaha hum se Sufyan Thauri ne Abi Burda bin Abdullah bin Abi Burda se , unhon ne apne dada Abu Burda se , unhon ne Abu Moosa Ashari raziyallahu anhu se . Unhon ne Nabi Karim salla Allahu alaihi wa sallam se ke aap salla Allahu alaihi wa sallam ne farmaya ek momin doosre momin ke liye imarat ki tarah hai ke is ka ek hissa doosre hissay ko quwwat pehnchata hai . Aur aap salla Allahu alaihi wa sallam ne ek hath ki ungliyon ko doosre hath ki ungliyon mein dakhil kiya .

Hum se Ishaq bin Mansoor ne bayan kiya , kaha hum se Nadr bin Shumail ne , unhon ne kaha ke humein Abdullah Ibn Awn ne khabar di , unhon ne Muhammad bin Sireen se , unhon ne Abu Hurairah raziyallahu anhu se , unhon ne kaha ke Rasool Allah salla Allahu alaihi wa sallam ne humein dopahar ke baad ki do namazon mein se koi namaz parhayi . Zuhar ya Asr ki Ibn Sireen ne kaha ke Abu Hurairah raziyallahu anhu ne is ka naam to liya tha . Lekin mein bhool gaya . Abu Hurairah raziyallahu anhu ne batlaya ke aap salla Allahu alaihi wa sallam ne humein do rakat namaz parha kar salam pher diya . Is ke baad ek lakri ki lathi se jo masjid mein rakhi hui thi aap salla Allahu alaihi wa sallam tek laga kar khare ho gaye . Aisa maloom hota tha ke jaisay aap bohot hi khafa hain aur aap salla Allahu alaihi wa sallam ne apne dayen hath ko bayen hath par rakha aur un ki ungliyon ko ek doosre mein dakhil kiya aur aap ne apne dayen rukhsaar mubarak ko bayen hath ki hathaili se sahara diya . Jo log namaz parh kar jaldi nikal jaya karte thay woh masjid ke darwazon se paar ho gaye . Phir log kehne lage ke kya namaz kam kar di gayi hai . Hazireen mein Abu Bakr aur Umar raziyallahu anhuma bhi mojood thay . Lekin unhein bhi aap se bolne ki himmat na hui . Unhein mein ek shakhs thay jin ke hath lambe thay aur unhein Dhul Yadain kaha jata tha . Unhon ne poocha ya Rasool Allah! kya aap salla Allahu alaihi wa sallam bhool gaye ya namaz kam kar di gayi hai . Aap salla Allahu alaihi wa sallam ne farmaya ke na mein bhoola hun aur na namaz mein koi kami hui hai . Phir aap salla Allahu alaihi wa sallam ne logon se poocha . Kya Dhul Yadain sahih keh rahe hain . Hazireen bole ke ji haan! yeh sun kar aap salla Allahu alaihi wa sallam aage barhe aur baqi rakaten parhin . Phir salam phera phir takbeer kahi aur sahu ka sajda kiya . Mamool ke mutabiq ya is se bhi lamba sajda . Phir sar uthaya aur takbeer kahi . Phir takbeer kahi aur doosra sajda kiya . Mamool ke mutabiq ya is se bhi taweel phir sar uthaya aur takbeer kahi , logon ne bar bar Ibn Sireen se poocha ke kya phir salam phera to woh jawab dete ke mujhe khabar di gayi hai ke Imran bin Husain kehte thay ke phir salam phera .

Hum se Muhammad bin Abi Bakr Muqaddami ne bayan kiya kaha hum se Fudail bin Sulaiman ne , kaha hum se Moosa bin Uqba ne , kaha mein ne Salim bin Abdullah bin Umar raziyallahu anhuma ko dekha ke woh Madina se Makka tak raste mein kai jagahon ko dhondh kar wahan namaz parhte aur kehte ke un ke walid Abdullah bin Umar raziyallahu anhuma bhi un maqamat par namaz parha karte thay . Aur unhon ne Rasool Allah salla Allahu alaihi wa sallam ko un maqamat par namaz parhte hue dekha hai aur Moosa bin Uqba ne kaha ke mujh se Nafi ne Ibn Umar raziyallahu anhuma ke mutalliq bayan kiya ke woh un maqamat par namaz parha karte thay . Aur mein ne Salim se poocha to mujhe khoob yaad hai ke unhon ne bhi Nafi ke bayan ke mutabiq hi tamam maqamat ka zikr kiya . Faqat maqam Sharaf Ruha ki masjid ke mutalliq dono ne ikhtilaf kiya .

Hum se Ibrahim bin Al-Munzir Hizami ne bayan kiya , kaha hum se Anas bin Iyaz ne , kaha hum se Moosa bin Uqba ne Nafi se , un ko Abdullah bin Umar raziyallahu anhuma ne khabar di ke Nabi Karim salla Allahu alaihi wa sallam jab umrah ke qasd se tashreef le gaye aur Hajjat ul-Wada ke moqa par jab hajj ke liye nikle to aap salla Allahu alaihi wa sallam ne Dhul Hulaifa mein qiyam farmaya . Dhul Hulaifa ki masjid ke qareeb aap salla Allahu alaihi wa sallam ek babul ke darakht ke neechay utray aur jab aap kisi jihad se wapas hote aur rasta Dhul Hulaifa se ho kar guzarta ya hajj ya umrah se wapasi hoti to aap wadi Atiq ke nashebi ilaqa mein utarte , phir jab wadi ke nasheeb se upar charhte to wadi ke balai kinare ke is mashriqi hissay par padao hota jahan kankriyon aur ret ka kushada nala hai . Yani Batha mein yahan aap salla Allahu alaihi wa sallam raat ko subah tak aaram farmate . Yeh maqam is masjid ke qareeb nahi hai jo pattharon ki bani hai , aap is tele par bhi nahi hote jis par masjid bani hui hai . Wahan ek gehra nala tha Abdullah bin Umar raziyallahu anhuma wahi namaz parhte . Is ke nasheeb mein ret ke tele thay aur Rasool Allah salla Allahu alaihi wa sallam wahan namaz parha karte thay . Kankriyon aur ret ke kushada nala ki taraf se sailab ne aa kar is jagah ke asar wa nishanat ko paat diya hai , jahan Abdullah bin Umar raziyallahu anhuma namaz parha karte thay .