Hum se Khalad bin Yahya ne bayan kiya , kaha hum se Misar ne , kaha hum se Muharib bin Dithar ne Jabir bin Abdullah ke wastay se , woh kehte hain ke mein Nabi Karim salla Allahu alaihi wa sallam ki khidmat mein hazir hua . Aap salla Allahu alaihi wa sallam is waqt masjid mein tashreef farma thay . Misar ne kaha mera khayal hai ke Muharib ne chasht ka waqt bataya tha . Nabi Karim salla Allahu alaihi wa sallam ne farmaya ke pehle do rakat namaz parh aur mera Nabi Karim salla Allahu alaihi wa sallam par kuch qarz tha . Jisay aap salla Allahu alaihi wa sallam ne ada kiya aur zyada hi diya .

Hum se Abdullah bin Yusuf ne bayan kiya unhon ne kaha ke humein Imam Malik ne Aamir bin Abdullah bin Zubair se yeh khabar pehnchai , unhon ne Amr bin Sulaim Zurqi ke wastay se bayan kiya , unhon ne Abu Qatada Salmi raziyallahu anhu se ke Rasool Allah salla Allahu alaihi wa sallam ne farmaya jab tum mein se koi shakhs masjid mein dakhil ho to baithne se pehle do rakat namaz parh lay .

Hum se Abdullah bin Yusuf ne bayan kiya ke kaha humein Malik ne Abul Zinad se , unhon ne Araj se , unhon ne Abu Hurairah raziyallahu anhu se ke Rasool Allah salla Allahu alaihi wa sallam ne farmaya jab tak tum apne musalle par jahan tum ne namaz parhi thi , baithe raho aur riyah kharij na karo to malaika tum par barabar darood bhejte rehte hain . Kehte hain Allahumma ighfir lahu Allahumma irhamhu aye Allah! is ki maghfirat kijiye , aye Allah! is par reham kijiye .

Abu Saeed ne kaha ke masjid Nabwi ki chhat khajoor ki shakhon se banayi gayi thi . Umar raziyallahu anhu ne masjid ki tameer ka hukm diya aur farmaya ke mein logon ko barish se bachana chahta hun aur masjidon par surkh laal , zard rang , mat karo kyunke is se log fitna mein par jayenge . Anas raziyallahu anhu ne farmaya ke is tarah pukhta banwane se log masajid par fakhr karne lagenge . Magar un ko aabad bohot kam log karenge . Ibn Abbas raziyallahu anhuma ne farmaya ke tum bhi masajid ki isi tarah zibayish karoge jis tarah yahood wa nasara ne ki .

Hum se Ali bin Abdullah ne bayan kiya , unhon ne kaha hum se Yaqoob bin Ibrahim bin Saeed ne bayan kiya , unhon ne kaha mujh se mere walid Ibrahim bin Saeed ne Saleh bin Kaisan ke wastay se , hum se Nafi ne , Abdullah bin Umar raziyallahu anhuma ke wastay se khabar di ke Nabi Karim salla Allahu alaihi wa sallam ke zamane mein masjid Nabwi kachi eenton se banayi gayi thi . Is ki chhat khajoor ki shakhon ki thi aur sutun isi ki kariyon ke . Abu Bakr raziyallahu anhu ne is mein kisi qisam ki zyadti nahi ki . Albatta Umar raziyallahu anhu ne isay barhaya aur is ki tameer Rasool Allah salla Allahu alaihi wa sallam ki banayi hui bunyadon ke mutabiq kachi eenton aur khajooron ki shakhon se ki aur is ke sutun bhi kariyon hi ke rakhe . Phir Usman raziyallahu anhu ne is ki imarat ko badal diya aur is mein bohot si zyadti ki . Is ki deewaren munqash pattharon aur gach se banaye . Is ke sutun bhi munqash pattharon se banwaye aur chhat sagwan se banayi .

Aur Allah Taala ka irshad hai . Mashrikeen ke liye layiq nahi ke Allah Taala ki masjidon ki tameer mein hissa len al-ayah .

Hum se Musaddad ne bayan kiya , kaha ke hum se Abdul Aziz bin Mukhtar ne bayan kiya , kaha ke hum se Khalid Haza ne Ikrama se , unhon ne bayan kiya ke mujh se aur apne sahbzaday Ali se Ibn Abbas raziyallahu anhuma ne kaha ke Abu Saeed Khudri raziyallahu anhu ki khidmat mein jao aur un ki ahadees suno . Hum gaye . Dekha ke Abu Saeed raziyallahu anhu apne bagh ko durust kar rahe thay . Hum ko dekh kar aap ne apni chadar sambhali aur got maar kar baith gaye . Phir hum se hadees bayan karne lage . Jab masjid Nabwi ke banane ka zikr aaya to aap ne bataya ke hum to masjid ke banane mein hissa lete waqt ek ek eent uthate . Lekin Ammar do do eenten utha rahe thay . Nabi Karim salla Allahu alaihi wa sallam ne unhein dekha to un ke badan se mitti jharne lage aur farmaya , afsos! Ammar ko ek baghi jamaat qatl kare gi . Jisay Ammar jannat ki dawat denge aur woh jamaat Ammar ko jahannam ki dawat de rahi ho gi . Abu Saeed Khudri raziyallahu anhu ne bayan kiya ke Ammar raziyallahu anhu kehte thay ke mein fitnon se Allah ki panah mangta hun .

Hum se Qutaiba bin Saeed ne bayan kiya ke kaha hum se Abdul Aziz ne Abu Hazim ke wastay se , unhon ne Sahl raziyallahu anhu se ke Nabi Karim salla Allahu alaihi wa sallam ne ek aurat ke pas ek aadmi bheja ke woh apne barhayi ghulam se kahe ke mere liye lakriyon ke takhton se minbar bana de jin par mein baitha karun .

Hum se Khalad bin Yahya ne bayan kiya , unhon ne kaha ke hum se Abdul Wahid bin Ayman ne apne walid ke wastay se bayan kiya , unhon ne Jabir bin Abdullah raziyallahu anhuma se ke ek aurat ne kaha ya Rasool Allah salla Allahu alaihi wa sallam! kya mein aap ke liye koi aisi cheez na bana dun jis par aap salla Allahu alaihi wa sallam baitha karen . Mera ek barhayi ghulam bhi hai . Aap salla Allahu alaihi wa sallam ne farmaya agar tu chahe to minbar banwa de .

Hum se Yahya bin Sulaiman ne bayan kiya unhon ne kaha ke hum se Abdullah bin Wahb ne bayan kiya , unhon ne kaha ke mujh se Amr bin Harith ne bayan kiya , unhon ne kaha hum se Bukair bin Abdullah ne bayan kiya , un se Aasim bin Amr bin Qatada ne bayan kiya , unhon ne Ubaidullah bin Aswad Khawlani se suna , unhon ne Usman bin Affan raziyallahu anhu se suna ke masjid Nabwi ki tameer ke mutalliq logon ki baton ko sun kar aap ne farmaya ke tum logon ne bohot zyada batein ki hain . Halanke mein ne Nabi Karim salla Allahu alaihi wa sallam se suna hai ke jis ne masjid banayi Bukair raawi ne kaha mera khayal hai ke aap ne yeh bhi farmaya ke is se maqsood Allah Taala ki raza ho , to Allah Taala aisa hi ek makaan jannat mein is ke liye banaye ga .