Hum se Ahmad bin Waqid ne bayan kiya ke , kaha hum se Hammad bin Zaid ne Thabit Banani ke wastay se , unhon ne Abu Rafe se , unhon ne Abu Hurairah raziyallahu anhu se ke ek aurat ya mard masjid mein jharoo diya karta tha . Abu Rafe ne kaha , mera khayal hai ke woh aurat hi thi . Phir unhon ne Nabi Karim salla Allahu alaihi wa sallam ki hadees naql ki ke aap salla Allahu alaihi wa sallam ne is ki qabr par namaz parhi .

Hum se Ishaq bin Ibrahim ne bayan kiya , unhon ne kaha hum se Rooh bin Ubada aur Muhammad bin Jafar ne Shoba ke wastay se bayan kiya , unhon ne Muhammad bin Ziyad se , unhon ne Abu Hurairah raziyallahu anhu se unhon ne Nabi Karim salla Allahu alaihi wa sallam se aap salla Allahu alaihi wa sallam ne farmaya ke guzarashta raat ek sarkash jinn achaanak mere pas aaya . Ya isi tarah ki koi baat aap ne farmayi , woh meri namaz mein khalal dalna chahta tha . Lekin Allah Tabarak wa Taala ne mujhe is par qabu de diya aur mein ne socha ke masjid ke kisi sutun ke sath isay bandh dun taake subah ko tum sab bhi isay dekho . Phir mujhe apne bhai Sulaiman ki yeh dua yaad aa gayi jo Surah Sad mein hai aye mere Rab! mujhe aisa mulk ata karna jo mere baad kisi ko hasil na ho . Raawi hadees Rooh ne bayan kiya ke Nabi Karim salla Allahu alaihi wa sallam ne is shaitan ko zaleel kar ke dhatkar diya .

Qazi Shuraib bin Harith Kindi Kufa ke qazi rahimahullah qarz daar ke mutalliq hukm diya karte thay ke isay masjid ke sutun se bandh diya jaye .

Hum se Abdullah bin Yusuf ne bayan kiya , unhon ne kaha hum se Layth bin Saad ne bayan kiya , unhon ne kaha mujh se Saeed bin Abi Saeed Maqburi ne , unhon ne Abu Hurairah raziyallahu anhu se suna ke Rasool Allah salla Allahu alaihi wa sallam ne kuch sawar Najd ki taraf bheje jo tadaad mein tees thay yeh log Banu Hanifa ke ek shakhs ko jis ka naam Thumama bin Uthal tha pakar kar laye . Unhon ne isay masjid ke ek sutun mein bandh diya . Phir Rasool Allah salla Allahu alaihi wa sallam tashreef laye . Aur teesre roz Thumama ki neik tabiyat dekh kar aap salla Allahu alaihi wa sallam ne farmaya ke Thumama ko chhor do . Rehai ke baad woh masjid Nabwi se qareeb ek khajoor ke bagh tak gaye . Aur wahan ghusl kiya . Phir masjid mein dakhil hue aur kaha ash-hadu an la ilaha illallah wa anna Muhammadan Rasool Allah mein gawahi deta hun ke Allah ke siwa koi mabood nahi aur yeh ke Muhammad Allah ke sachche Rasool hain .

Hum se Zakariya bin Yahya ne bayan kiya ke kaha hum se Abdullah bin Numair ne ke kaha hum se Hisham bin Urwah ne apne walid Urwah bin Zubair ke wastay se bayan kiya , unhon ne Aisha raziyallahu anha se aap ne farmaya ke ghazwa Khandaq mein Saad raziyallahu anhu ke bazu ki ek rag akhal mein zakhm aaya tha . Un ke liye Nabi Karim salla Allahu alaihi wa sallam ne masjid mein ek kheema nasb kara diya taake aap qareeb reh kar un ki dekh bhaal kiya karen . Masjid hi mein Bani Ghifar ke logon ka bhi ek kheema tha . Saad raziyallahu anhu ke zakhm ka khoon jo rag se bakasrat nikal raha tha beh kar jab un ke kheema tak pohancha to woh dar gaye . Unhon ne kaha ke aye kheema walo! tumhari taraf se yeh kaisa khoon hamare kheema tak aa raha hai . Phir unhein maloom hua ke yeh khoon Saad raziyallahu anhu ke zakhm se beh raha hai . Saad raziyallahu anhu ka isi zakhm ki wajah se intiqal ho gaya .

Abdullah bin Abbas raziyallahu anhuma ne farmaya ke Nabi Karim salla Allahu alaihi wa sallam ne apne oont par baith kar Baitullah ka tawaf kiya tha .

Hum se Abdullah bin Yusuf ne bayan kiya , kaha humein Imam Malik rahimahullah alaihi ne Muhammad bin Abdur Rahman bin Nawfal se khabar di , unhon ne Urwah bin Zubair se . Unhon ne Zainab bint Abi Salama se , unhon ne Umm ul Momineen Umm Salama se , woh kehti hain ke mein ne Rasool Allah salla Allahu alaihi wa sallam se Hajjat ul-Wada mein apni beemari ka shikwa kiya mein ne kaha ke mein paidal tawaf nahi kar sakti to aap salla Allahu alaihi wa sallam ne farmaya ke logon ke peechay reh aur sawar ho kar tawaf kar . Pas mein ne tawaf kiya aur Rasool Allah salla Allahu alaihi wa sallam is waqt Baitullah ke qareeb namaz mein ayat wal-toor wa kitab mastoor ki tilawat kar rahe thay .

Hum se Muhammad bin Musanna ne bayan kiya unhon ne kaha hum se Muaz bin Hisham ne bayan kiya , unhon ne kaha mujh se mere walid ne Qatada ke wastay se bayan kiya , kaha hum se Anas raziyallahu anhu ne bayan kiya ke do shakhs Nabi Karim salla Allahu alaihi wa sallam ke pas se nikle , ek Abbad bin Bishr aur doosre sahib mere khayal ke mutabiq Usaid bin Huzair thay . Raat tareek thi aur dono ashab ke pas roshan chiragh ki tarah koi cheez thi jis se un ke aage aage roshni phail rahi thi pas jab woh dono ashab ek doosre se juda hue to har ek ke sath ek ek chiragh reh gaya jo ghar tak sath raha .

Hum se Muhammad bin Sinan ne bayan kiya , ke kaha hum se Fulaih bin Sulaiman ne , kaha hum se Abu Nadr Salim bin Abi Umayya ne Ubaid bin Hunain ke wastay se , unhon ne Busr bin Saeed se , unhon ne Abu Saeed Khudri raziyallahu anhu se , unhon ne bayan kiya ke ek dafa Rasool Allah salla Allahu alaihi wa sallam ne khutba mein farmaya ke Allah Taala ne apne ek bande ko duniya aur aakhir ke rehne mein ikhtiyar diya ke woh jis ko chahe ikhtiyar kare bande ne woh pasand kiya jo Allah ke pas hai yani aakhir . Yeh sun kar Abu Bakr raziyallahu anhu rone lage , mein ne apne dil mein kaha ke agar Allah ne apne kisi bande ko duniya aur aakhir mein se kisi ko ikhtiyar karne ko kaha aur is bande ne aakhir pasand kar li to is mein un buzurg ke rone ki kya wajah hai . Lekin yeh baat thi ke bande se murad Rasool Allah salla Allahu alaihi wa sallam hi thay aur Abu Bakr raziyallahu anhu hum sab se zyada jaanne wale thay . Nabi Karim salla Allahu alaihi wa sallam ne un se farmaya . Abu Bakr aap roiye mat . Apni suhbat aur apni daulat ke zariye tamam logon se zyada mujh par ehsan karne wale aap hi hain aur agar mein kisi ko khaleel banata to Abu Bakr ko banata . Lekin jaani dosti to Allah ke siwa kisi se nahi ho sakti is ke badle mein Islam ki biradari aur dosti kafi hai . Masjid mein Abu Bakr raziyallahu anhu ki taraf ke darwaze ke siwa tamam darwaze band kar diye jayen .

Hum se Abdullah bin Muhammad Jafi ne bayan kiya , unhon ne kaha hum se Wahb bin Jarir ne bayan kiya , unhon ne kaha mujh se mere walid Jarir bin Hazim ne bayan kiya , unhon ne kaha mein ne Yala bin Hakim se suna , woh Ikrama se naql karte thay , woh Abdullah bin Abbas raziyallahu anhuma se , unhon ne bayan kiya ke Rasool Allah salla Allahu alaihi wa sallam apne marz wafat mein bahar tashreef laye . Sar par patti bandhi hui thi . Aap salla Allahu alaihi wa sallam minbar par baithe , Allah ki hamd wa sana ki aur farmaya , koi shakhs bhi aisa nahi jis ne Abu Bakr bin Abi Quhafa se zyada mujh par apni jaan wa maal ke zariye ehsan kiya ho aur agar mein kisi ko insano mein se jaani dost banata to Abu Bakr raziyallahu anhu ko banata . Lekin Islam ka taluq afzal hai . Dekho Abu Bakr raziyallahu anhu ki khirki chhor kar is masjid ki tamam khirkian band kar di jayen .