Hum se Musaddad ne bayan kiya , unhon ne kaha hum se Abdul Warith ne bayan kiya , unhon ne Abul Tayyah ke wastay se bayan kiya , unhon ne Anas bin Malik raziyallahu anhu se , unhon ne kaha ke jab Nabi Karim salla Allahu alaihi wa sallam Madina tashreef laye to yahan ke buland hissay mein Bani Amr bin Awf ke yahan aap utray aur yahan chobis raaten qiyam farmaya . Phir aap salla Allahu alaihi wa sallam ne Banu Najjar ko bula bheja , to woh log talwaren latkaye hue aaye . Anas ne kaha , goya meri nazron ke samne Nabi Karim salla Allahu alaihi wa sallam apni sawari par tashreef farma hain , jabke Abu Bakr Siddiq raziyallahu anhu aap salla Allahu alaihi wa sallam ke peechay baithe hue hain aur Banu Najjar ke log aap salla Allahu alaihi wa sallam ke charon taraf hain . Yahan tak ke aap salla Allahu alaihi wa sallam Abu Ayyub ke ghar ke samne utray aur aap salla Allahu alaihi wa sallam yeh pasand karte thay ke jahan bhi namaz ka waqt aa jaye foran namaz ada kar len . Aap bakriyon ke baron mein bhi namaz parh lete thay , phir aap ne yahan masjid banane ke liye hukm farmaya . Chunanched Banu Najjar ke logon ko aap salla Allahu alaihi wa sallam ne bulwa kar farmaya ke aye Banu Najjar! tum apne is bagh ki qeemat mujh se le lo . Unhon ne jawab diya nahi ya Rasool Allah! is ki qeemat hum sirf Allah se mangte hain . Anas raziyallahu anhu ne bayan kiya ke mein jaisa ke tumhein bata raha tha yahan mushrikeen ki qabren thin , is bagh mein ek weeran jagah thi aur kuch khajoor ke darakht bhi thay pas Nabi Karim salla Allahu alaihi wa sallam ne mushrikeen ki qabron ko ukharwa diya weerana ko saaf aur barabar karwaya aur darakhton ko katwa kar un ki lakriyon ko masjid ke qibla ki janib bichha diya aur pattharon ke zariye unhein mazboot bana diya . Sahaba patthar uthate hue rajz parhte thay aur Nabi Karim salla Allahu alaihi wa sallam bhi un ke sath thay aur yeh keh rahe thay ke aye Allah! aakhir ke faida ke ilawa aur koi faida nahi pas Ansar wa Muhajireen ki maghfirat farmana .

Hum se Sulaiman bin Harb ne bayan kiya , unhon ne kaha hum se Shoba ne Abul Tayyah ke wastay se , unhon ne Anas bin Malik raziyallahu anhu se , unhon ne kaha ke Nabi Karim salla Allahu alaihi wa sallam bakriyon ke baron mein namaz parhte thay , Abul Tayyah ya Shoba ne kaha , phir mein ne Anas ko yeh kehte hue suna ke Nabi Karim salla Allahu alaihi wa sallam bakriyon ke baray mein masjid ki tameer se pehle namaz parha karte thay .

Hum se Siddiqa bin Fazl ne bayan kiya , unhon ne kaha hum se Sulaiman bin Hayyan ne , kaha hum se Ubaidullah ne Nafi ke wastay se , unhon ne kaha ke mein ne Ibn Umar raziyallahu anhuma ko apne oont ki taraf namaz parhte dekha aur unhon ne farmaya ke mein ne Nabi Karim salla Allahu alaihi wa sallam ko isi tarah parhte dekha tha .

Zuhri ne kaha ke mujhe Anas bin Malik raziyallahu anhu ne khabar pehnchai ke Nabi Karim salla Allahu alaihi wa sallam ne farmaya mere samne dozakh layi gayi aur is waqt mein namaz parh raha tha .

Hum se Abdullah bin Maslama ne bayan kiya , unhon ne Imam Malik ke wastay se bayan kiya , unhon ne Zaid bin Aslam se , unhon ne Ata bin Yasar se , unhon ne Abdullah bin Abbas raziyallahu anhuma se , unhon ne farmaya ke sooraj grahan hua to Nabi Karim salla Allahu alaihi wa sallam ne namaz parhi aur farmaya ke mujhe aaj dozakh dikhayi gayi , is se zyada bhayanak manzar mein ne kabhi nahi dekha .

Hum se Musaddad ne bayan kiya , unhon ne kaha hum se Yahya ne bayan kiya , unhon ne Ubaidullah bin Umar ke wastay se bayan kiya , unhon ne kaha ke mujhe Nafi ne Abdullah bin Umar raziyallahu anhuma ke wastay se khabar di ke Nabi Karim salla Allahu alaihi wa sallam ne farmaya apne gharon mein bhi namazen parha karo aur unhein bilkul maqbara na bana lo .

Ali raziyallahu anhu se manqool hai ke aap ne Babil ki dhansi hui jagah mein namaz ko makrooh samjha .

Hum se Ismail bin Abdullah ne bayan kiya , unhon ne kaha ke mujh se Imam Malik rahimahullah ne bayan kiya , unhon ne Abdullah bin Dinar ke wastay se bayan kiya , unhon ne Abdullah bin Umar raziyallahu anhuma se ke Rasool Allah salla Allahu alaihi wa sallam ne farmaya , un azab walon ke asar se agar tumhara guzar ho to rote hue guzro , agar tum is moqay par ro na sako to un se guzro hi nahi . Aisa na ho ke tum par bhi un ka sa azab aa jaye .

Aur Umar raziyallahu anhu ne kaha aye nasraniyo! hum aap ke girjaon mein is wajah se nahi jate ke wahan murtiyan hoti hain aur Abdullah bin Abbas raziyallahu anhuma girja mein namaz parh lete magar is girja mein na parhte jis mein murtiyan hoti thin .

Hum se Muhammad bin Salam Bekandi ne bayan kiya , unhon ne kaha hum ko Abdah bin Sulaiman ne khabar di , unhon ne Hisham bin Urwah se , unhon ne apne walid Urwah bin Zubair se , unhon ne Aisha raziyallahu anha se ke Umm Salama raziyallahu anha ne Nabi Karim salla Allahu alaihi wa sallam se ek girja ka zikr kiya jis ko unhon ne Habsh ke mulk mein dekha is ka naam Mariya tha . Is mein jo murtiyan dekhi thin woh bayan ki . Is par Rasool Allah salla Allahu alaihi wa sallam ne farmaya ke yeh aise log thay ke agar un mein koi neik banda ya yeh farmaya ke neik aadmi mar jata to us ki qabr par masjid banate aur is mein yeh butt rakhte . Yeh log Allah ke nazdeek sari makhlooqat se badtar hain .