Ibrahim bin Tahman ne kaha , Abdul Aziz bin Suhaib se , unhon ne Anas raziyallahu anhu se riwayat kiya ke Nabi Karim salla Allahu alaihi wa sallam ke pas Bahrain se raqam aayi . Aap salla Allahu alaihi wa sallam ne farmaya ke isay masjid mein daal do aur yeh raqam is tamam raqam se zyada thi jo ab tak aap salla Allahu alaihi wa sallam ki khidmat mein aa chuki thi . Phir aap salla Allahu alaihi wa sallam namaz ke liye tashreef laye aur is ki taraf koi tawajjuh nahi farmayi , jab aap salla Allahu alaihi wa sallam namaz poori kar chukay to aa kar maal raqam ke pas baith gaye aur isay taqseem karna shuru farma diya . Is waqt jisay bhi aap salla Allahu alaihi wa sallam dekhte usay ata farma dete . Itne mein Abbas raziyallahu anhu hazir hue aur bole ke ya Rasool Allah! mujhe bhi ata kijiye kyunke mein ne ghazwa Badr mein apna bhi fidya diya tha aur Aqeel ka bhi is liye mein zair bar hun Rasool Allah salla Allahu alaihi wa sallam ne farmaya ke le lijiye . Unhon ne apne kapre mein rupaya bhar liya aur isay uthane ki koshish ki lekin wazan ki zyadti ki wajah se woh na utha sakay aur kehne lage ya Rasool Allah! kisi ko farmaye ke woh uthane mein meri madad kare . Aap salla Allahu alaihi wa sallam ne farmaya nahi yeh nahi ho sakta unhon ne kaha ke phir aap hi uthwa dijiye . Aap salla Allahu alaihi wa sallam ne is par bhi inkar kiya , tab Abbas raziyallahu anhu ne is mein se thora sa gira diya aur baqi ko uthane ki koshish ki , lekin ab bhi na utha sakay phir farmaya ke ya Rasool Allah! kisi ko meri madad karne ka hukm dijiye . Aap salla Allahu alaihi wa sallam ne inkar farmaya to unhon ne kaha ke phir aap hi uthwa dijiye . Lekin aap salla Allahu alaihi wa sallam ne is se bhi inkar kiya , tab unhon ne is mein se thora sa rupaya gira diya aur isay utha kar apne kandhe par rakh liya aur chalne lage , Rasool Allah salla Allahu alaihi wa sallam ko un ki is hirs par itna taajjub hua ke aap salla Allahu alaihi wa sallam is waqt tak un ki taraf dekhte rahe jab tak woh hamari nazron se ghaib nahi ho gaye aur aap salla Allahu alaihi wa sallam bhi wahan se is waqt tak na uthay jab tak ke ek chooni bhi baqi rahi .

Hum se Abdullah bin Yusuf ne bayan kiya , kaha hum se Malik ne Ishaq bin Abdullah se unhon ne Anas raziyallahu anhu se suna , woh kehte hain ke mein ne Rasool Allah salla Allahu alaihi wa sallam ko masjid mein paya , aap salla Allahu alaihi wa sallam ke pas aur bhi kai log thay . Mein khara ho gaya to Nabi Karim salla Allahu alaihi wa sallam ne mujh se poocha ke kya tujhe Abu Talha ne bheja hai ? Mein ne kaha ji haan aap salla Allahu alaihi wa sallam ne poocha khane ke liye ? blaya hai mein ne arz ki ke ji haan! tab aap salla Allahu alaihi wa sallam ne apne qareeb mojood logon se farmaya ke chalo , sab hazrat chalne lage aur mein un ke aage aage chal raha tha .

Hum se Yahya bin Moosa ne bayan kiya , kaha hum se Abdur Razzaq ne , kaha hum ko Ibn Juraij ne , kaha humein Ibn Shihab ne Sahl bin Saad Saidi se ke ek shakhs ne kaha , ya Rasool Allah! is shakhs ke baray mein farmaye jo apni biwi ke sath kisi ghair mard ko badfeeli karte hue dekhta hai , kya usay maar daale ? aakhir is mard ne apni biwi ke sath masjid mein lian kiya aur is waqt mein mojood tha .

Hum se Abdullah bin Maslama Qanabi ne bayan kiya , unhon ne kaha hum se Ibrahim bin Saad ne Ibn Shihab ke wastay se bayan kiya , unhon ne Mahmood bin Rabia se unhon ne Itban bin Malik se jo nabina thay ke Nabi Karim salla Allahu alaihi wa sallam un ke ghar tashreef laye . Aap salla Allahu alaihi wa sallam ne poocha ke tum apne ghar mein kahan pasand karte ho ke tumhare liye namaz parhun . Itban ne bayan kiya ke mein ne ek jagah ki taraf ishara kiya . Phir Nabi Karim salla Allahu alaihi wa sallam ne takbeer kahi aur hum ne aap salla Allahu alaihi wa sallam ke peechay saff bandhi phir aap salla Allahu alaihi wa sallam ne do rakat namaz nafl parhayi .

Aur Bara bin Azib raziyallahu anhu ne apne ghar ki masjid mein jamaat se namaz parhi .

Hum se Saeed bin Ufair ne bayan kiya , unhon ne kaha hum se Layth bin Saad ne bayan kiya , unhon ne kaha ke mujh se Aqeel ne Ibn Shihab ke wastay se bayan kiya ke mujhe Mahmood bin Rabia Ansari ne ke Itban bin Malik Ansari raziyallahu anhu Rasool Allah salla Allahu alaihi wa sallam ke sahaba aur ghazwa Badr ke hazir hone walon mein se thay , woh Nabi Karim salla Allahu alaihi wa sallam ki khidmat mein hazir hue aur kaha ya Rasool Allah! meri beenai mein kuch farq aa gaya hai aur mein apni qoum ke logon ko namaz parhaya karta hun lekin jab barsaat ka mausam aata hai to mere aur meri qoum ke darmiyan jo wadi hai woh bhar jati hai aur behne lag jati hai aur mein unhein namaz parhane ke liye masjid tak nahi ja sakta ya Rasool Allah! meri khwahish hai ke aap mere ghar tashreef layen aur kisi jagah namaz parh den taake mein isay namaz parhne ki jagah bana lun . Raawi ne kaha ke Rasool Allah salla Allahu alaihi wa sallam ne Itban se farmaya , insha Allah Taala mein tumhari is khwahish ko poora karun ga . Itban ne kaha ke doosre din Rasool Allah salla Allahu alaihi wa sallam aur Abu Bakr Siddiq raziyallahu anhu jab din charha to dono tashreef le aaye aur Rasool Allah salla Allahu alaihi wa sallam ne andar aane ki ijazat chahi , mein ne ijazat de di . Jab aap ghar mein tashreef laye to baithe bhi nahi aur poocha ke tum apne ghar ke kis hissay mein mujh se namaz parhne ki khwahish rakhte ho . Itban ne kaha ke mein ne ghar mein ek kone ki taraf ishara kiya , to Rasool Allah salla Allahu alaihi wa sallam is jagah kharay hue aur takbeer kahi hum bhi aap ke peechay kharay ho gaye aur saff bandhi pas aap ne do rakat nafl namaz parhayi phir salam phera . Itban ne kaha ke hum ne aap ko thori der ke liye roka aur aap ki khidmat mein haleem pesh kiya jo aap hi ke liye tayyar kiya gaya tha . Itban ne kaha ke mohalla walon ka ek majma ghar mein lag gaya aur majma mein se ek shakhs bola ke Malik bin Dukshn ya yeh kaha Ibn Dukshn dikhai nahi deta . Is par kisi doosre ne keh diya ke woh to munafiq hai jisay Allah aur Rasool se koi mohabbat nahi Rasool Allah salla Allahu alaihi wa sallam ne yeh sun kar farmaya aisa mat kaho , kya tum dekhte nahi ke is ne la ilaha illallah kaha hai aur is se maqsood khalis Allah ki raza mandi hasil karna hai . Tab munafiqat ka ilzam lagane wala bola ke Allah aur us ke Rasool ko zyada ilm hai hum to bazahir is ki tawajjuhat aur dosti munafiqon hi ke sath dekhte hain . Rasool Allah salla Allahu alaihi wa sallam ne farmaya ke Allah Taala ne la ilaha illallah kehne wale par agar is ka maqsid khalis Allah ki raza hasil karna ho dozakh ki aag haram kar di hai . Ibn Shihab ne kaha ke phir mein ne Mahmood se sun kar Husain bin Muhammad Ansari se jo Bani Salim ke sharif logon mein se hain is hadees ke mutalliq poocha to unhon ne is ki tasdeeq ki aur kaha ke Mahmood sachcha hai .

Abdullah bin Umar raziyallahu anhuma masjid mein dakhil hone ke liye pehle dayan paon rakhte aur nikalne ke liye bayan paon pehle nikalte .

Hum se Sulaiman bin Harb ne bayan kiya , kaha hum ko Shoba ne khabar di Ashath bin Sulaim ke wastay se , unhon ne Masrooq se , unhon ne Aisha raziyallahu anha se , aap farmati hain ke Rasool Allah salla Allahu alaihi wa sallam apne tamam kamon mein jahan tak mumkin hota dayen taraf se shuru karne ko pasand farmate thay . Taharat ke waqt bhi , kanghi karne aur joota pehnne mein bhi .

Kyunke Nabi Karim salla Allahu alaihi wa sallam ne farmaya ke Allah yahoodiyon par lanat kare ke unhon ne apne anbiya ki qabron ko masjid bana liya aur qabron mein namaz makrooh hone ka bayan . Umar bin Khattab raziyallahu anhu ne Anas bin Malik raziyallahu anhu ko ek qabr ke qareeb namaz parhte dekha to farmaya ke qabr hai qabr! aur aap ne un ko namaz lotane ka hukm nahi diya .

Hum se Muhammad bin Musanna ne bayan kiya , kaha hum se Yahya bin Saeed Qattan ne Hisham bin Urwah ke wastay se bayan kiya , kaha ke mujhe mere walid ne Aisha raziyallahu anha se yeh khabar pehnchai ke Umm Habiba aur Umm Salama raziyallahu anhuma dono ne ek kalisa ka zikr kiya jisay unhon ne Habsha mein dekha to is mein murtiyan tasweeren thin . Unhon ne is ka tazkira Nabi Karim salla Allahu alaihi wa sallam se bhi kiya . Aap salla Allahu alaihi wa sallam ne farmaya ke un ka yeh qaeda tha ke agar un mein koi naikokar neik shakhs mar jata to woh log us ki qabr par masjid banate aur is mein yahi murtiyan tasweeren bana dete pas yeh log Allah ki dargah mein qiyamat ke din tamam makhlooq mein buray honge .