Hum se Abul Waleed ne bayan kiya , kaha hum se Shoba ne bayan kiya Awn bin Abi Juhaifa se , kaha mein ne apne walid Wahb bin Abdullah se suna ke Nabi Karim salla Allahu alaihi wa sallam ne logon ko Batha mein namaz parhayi . Aap salla Allahu alaihi wa sallam ke samne anza danda jis ke neechay phal laga hua ho gar diya gaya tha . Chunke aap salla Allahu alaihi wa sallam musafir thay is liye zuhr ki do rakat aur asr ki do rakaten ada ki . Aap salla Allahu alaihi wa sallam ke samne se auraten aur gadhe guzar rahe thay .

Hum se Amr bin Zurara ne bayan kiya , kaha ke hum se Abdul Aziz bin Abi Hazim ne apne walid Abu Hazim Salama bin Dinar se bayan kiya , unhon ne Sahl bin Saad se , unhon ne bayan kiya ke Nabi Karim salla Allahu alaihi wa sallam ke sajda karne ki jagah aur deewar ke darmiyan ek bakri ke guzar sakne ka fasla rehta tha .

Hum se Maki bin Ibrahim ne bayan kiya , kaha ke hum se Yazid bin Abi Ubaid ne , unhon ne Salama bin Akwa raziyallahu anhu se bayan kiya , unhon ne farmaya ke masjid ki deewar aur minbar ke darmiyan bakri ke guzar sakne ke fasle ke barabar jagah thi .

Hum se Musaddad bin Musarhad ne bayan kiya , kaha hum se Yahya bin Saeed Qattan ne Ubaidullah ke wastay se bayan kiya , kaha mujhe Nafi ne Abdullah bin Umar raziyallahu anhuma ke wastay se khabar di ke Nabi Karim salla Allahu alaihi wa sallam ke liye barchha gar diya jata aap salla Allahu alaihi wa sallam is ki taraf namaz parhte thay .

Hum se Adam bin Abi Iyas ne bayan kiya , kaha hum se Shoba ne bayan kiya , kaha ke hum se Awn bin Abi Juhaifa ne bayan kiya , kaha ke mein ne apne walid Abu Juhaifa Wahb bin Abdullah se suna unhon ne kaha ke Rasool Allah salla Allahu alaihi wa sallam dopahar ke waqt bahar tashreef laye . Aap salla Allahu alaihi wa sallam ki khidmat mein wudu ka pani pesh kiya gaya , jis se aap salla Allahu alaihi wa sallam ne wudu kiya . Phir humein aap salla Allahu alaihi wa sallam ne zuhr ki namaz parhayi aur asr ki , aap salla Allahu alaihi wa sallam ke samne anza gar diya gaya tha aur auraten aur gadhe par sawar log is ke peechay se guzar rahe thay .

Hum se Muhammad bin Hatim bin Bazee ne bayan kiya , kaha ke hum se Shazan bin Aamir ne Shoba bin Hajjaj ke wastay se bayan kiya , unhon ne Ata bin Abi Maimoona se , unhon ne kaha ke mein ne Anas bin Malik raziyallahu anhu se suna ke Nabi Karim salla Allahu alaihi wa sallam jab raf e hajat ke liye nikalte to mein aur ek aur larka aap salla Allahu alaihi wa sallam ke peechay peechay jate . Hamare sath akaza danda jis ke neechay lohe ka phal laga hua ho ya chhari ya anza hota . Aur hamare sath ek chhagal bhi hota tha . Jab Nabi Karim salla Allahu alaihi wa sallam hajat se farigh ho jate to hum aap salla Allahu alaihi wa sallam ko woh chhagal de dete thay .

Hum se Sulaiman bin Harb ne bayan kiya , kaha hum se Shoba ne Hukm bin Uyaynah se , unhon ne Abu Juhaifa se , unhon ne kaha ke Nabi Karim salla Allahu alaihi wa sallam hamare pas dopahar ke waqt tashreef laye aur aap salla Allahu alaihi wa sallam ne Batha mein zuhr aur asr ki do do rakaten parhin . Aap salla Allahu alaihi wa sallam ke samne anza gar diya gaya tha aur jab aap salla Allahu alaihi wa sallam ne wudu kiya to log aap salla Allahu alaihi wa sallam ke wudu ke pani ko apne badan par laga rahe thay .

Aur Umar raziyallahu anhu ne farmaya ke namaz parhne wale sutonon ke un logon se zyada mustahiq hain jo is par tek laga kar batein karte hain . Umar raziyallahu anhu ne ek shakhs ko do sutonon ke beech mein namaz parhte dekha to isay sutun ke pas kar diya aur kaha ke is ki taraf namaz parh .

Hum se Maki bin Ibrahim ne bayan kiya , kaha hum se Yazid bin Abi Ubaid ne bayan kiya , kaha ke mein Salama bin Akwa raziyallahu anhu ke sath masjid Nabwi mein hazir hua karta tha . Salama raziyallahu anhu hamesha is sutun ko samne kar ke namaz parhte jahan Quran Shareef rakha rehta tha . Mein ne un se kaha ke aye Abu Muslim! mein dekhta hun ke aap hamesha isi sutun ko samne kar ke namaz parhte hain . Unhon ne farmaya ke mein ne Nabi Karim salla Allahu alaihi wa sallam ko dekha aap salla Allahu alaihi wa sallam khas tor se isi sutun ko samne kar ke namaz parha karte thay .

Hum se Qabisa bin Uqba ne bayan kiya , kaha hum se Sufyan Thauri ne Amr bin Aamir se bayan kiya , unhon ne Anas bin Malik raziyallahu anhu se , unhon ne kaha ke mein ne Nabi Karim salla Allahu alaihi wa sallam ke bare bare sahaba ridwan Allah alaihim ajmaeen ko dekha ke woh maghrib ki azan ke waqt sutonon ki taraf lapakte . Aur Shoba ne Amr bin Aamir se unhon ne Anas raziyallahu anhu se is hadees mein yeh zyadti ki hai . Yahan tak ke Nabi Karim salla Allahu alaihi wa sallam hijra se bahar tashreef late .