Hum se Moosa bin Ismail ne bayan kiya , kaha hum se Juwayriya bin Asma ne Nafi se , unhon ne Abdullah bin Umar raziyallahu anhuma se , unhon ne kaha ke Nabi Karim salla Allahu alaihi wa sallam Baitullah ke andar tashreef le gaye aur Usama bin Zaid Usman bin Talha aur Bilal raziyallahu anhum bhi aap ke sath thay . Aap salla Allahu alaihi wa sallam der tak andar rahe . Phir bahar aaye . Aur mein sab logon se pehle aap salla Allahu alaihi wa sallam ke peechay hi wahan aaya . Mein ne Bilal raziyallahu anhu se poocha ke Nabi Karim salla Allahu alaihi wa sallam ne kahan namaz parhi thi . Unhon ne bataya ke aage ke do sutonon ke beech mein aap salla Allahu alaihi wa sallam ne namaz parhi thi .

Hum se Abdullah bin Yusuf Tinnisi ne bayan kiya , kaha humein Imam Malik bin Anas ne khabar di Nafi se , unhon ne Abdullah bin Umar raziyallahu anhuma se ke Nabi Karim salla Allahu alaihi wa sallam Kaaba ke andar tashreef le gaye aur Usama bin Zaid , Bilal aur Usman bin Talha Hajabi bhi aap salla Allahu alaihi wa sallam ke sath thay . Phir Usman raziyallahu anhu ne Kaaba ka darwaza band kar diya . Aur aap salla Allahu alaihi wa sallam is mein thehre rahe . Jab aap salla Allahu alaihi wa sallam bahar nikle to mein ne Bilal raziyallahu anhu se poocha ke Nabi Karim salla Allahu alaihi wa sallam ne andar kya kiya ? Unhon ne kaha ke aap ne ek sutun ko to bayen taraf chhora aur ek ko dayen taraf aur teen ko peechay aur is zamane mein Khanah Kaaba mein chhe sutun thay . Phir aap salla Allahu alaihi wa sallam ne namaz parhi . Imam Bukhari rahimahullah ne kaha ke hum se Ismail bin Abi Udris ne kaha , woh kehte hain ke mujh se Imam Malik ne yeh hadees yun bayan ki ke aap salla Allahu alaihi wa sallam ne apne dayen taraf do sutun chhore thay .

Hum se Ibrahim bin Al-Munzir ne bayan kiya , kaha ke hum se Abu Damra Anas bin Iyaz ne bayan kiya , kaha hum se Moosa bin Uqba ne bayan kiya unhon ne Nafi se ke Abdullah bin Umar raziyallahu anhuma jab Kaaba mein dakhil hote to sidhe munh ke samne chale jate . Darwaza peeth ki taraf hota aur aap aage barhte jab un ke aur samne ki deewar ka fasla qareeb teen hath ke reh jata to namaz parhte . Is tarah aap is jagah namaz parhna chahte thay jis ke mutalliq Bilal raziyallahu anhu ne aap ko bataya tha ke Nabi Karim salla Allahu alaihi wa sallam ne yahin namaz parhi thi . Aap farmate thay ke Baitullah mein jis kone mein hum chahen namaz parh sakte hain . Is mein koi qabahat nahi hai .

Hum se Muhammad bin Abi Bakr Muqaddami Basri ne bayan kiya , kaha ke hum se Mutamir bin Sulaiman ne bayan kiya Ubaidullah bin Umar se , woh Nafi se , unhon ne Abdullah bin Umar raziyallahu anhuma se , unhon ne Nabi Karim salla Allahu alaihi wa sallam se ke aap salla Allahu alaihi wa sallam apni sawari ko samne arz mein kar lete aur is ki taraf munh kar ke namaz parhte thay , Ubaidullah bin Umar ne Nafi se poocha ke jab sawari uchalne kodne lagti to is waqt aap kya kiya karte thay ? Nafi ne kaha ke aap is waqt kajawa ko apne samne kar lete aur is ke aakhri hissay ki jis par sawar tek lagata hai ek khari si lakri ki taraf munh kar ke namaz parhte aur Abdullah bin Umar raziyallahu anhuma bhi isi tarah kiya karte thay .

Hum se Usman bin Abi Shaiba ne bayan kiya , kaha hum se Jarir bin Abdul Hameed ne bayan kiya Mansoor bin Mutamir se , unhon ne Ibrahim Nakhai se , unhon ne Aswad bin Yazid se , unhon ne Aisha raziyallahu anha se aap ne farmaya tum logon ne hum auraton ko kutton aur gadhon ke barabar bana diya . Halanke mein charpayi par leti rehti thi . Aur Nabi Karim salla Allahu alaihi wa sallam tashreef laye aur charpayi ke beech mein aa jate ya charpayi ko apne aur qibla ke beech mein kar lete phir namaz parhte . Mujhe aap salla Allahu alaihi wa sallam ke samne para rehna bura maloom hota , is liye mein paenti ki taraf se khisak ke lihaf se bahar nikal jati .

Aur Abdullah bin Umar raziyallahu anhuma ne Kaaba mein jab ke aap tashahhud ke liye baithe hue thay rok diya tha aur agar woh guzarne wala larai par utar aaye to is se lare .

Hum se Abu Mamar ne bayan kiya , kaha hum se Abdul Warith ne bayan kiya , kaha ke hum se Yunus bin Ubaid ne Humaid bin Hilal ke wastay se bayan kiya , unhon ne Abu Saleh Dhakwan Saman se ke Abu Saeed Khudri raziyallahu anhu ne bayan kiya ke Nabi Karim salla Allahu alaihi wa sallam ne farmaya doosri sanad aur hum se Adam bin Abi Iyas ne bayan kiya , kaha hum se Sulaiman bin Mughira ne , kaha hum se Humaid bin Hilal Adwi ne , kaha hum se Abu Saleh Saman ne , kaha mein ne Abu Saeed Khudri raziyallahu anhu ko juma ke din namaz parhte hue dekha . Aap kisi cheez ki taraf munh kiye hue logon ke liye isay aar banaye hue thay . Abu Muait ke beton mein se ek jawan ne chaha ke aap ke samne se ho kar guzar jaye . Abu Saeed raziyallahu anhu ne is ke seene par dhakka de kar baz rakhna chaha . Jawan ne charon taraf nazar daurayi lekin koi rasta siwaye samne se guzarne ke na mila . Is liye woh phir isi taraf se nikalne ke liye lauta . Ab Abu Saeed raziyallahu anhu ne pehle se bhi zyada zor se dhakka diya . Isay Abu Saeed raziyallahu anhu se shikayat hui aur woh apni yeh shikayat Marwan ke pas le gaya . Is ke baad Abu Saeed raziyallahu anhu bhi tashreef le gaye . Marwan ne kaha aye Abu Saeed raziyallahu anhu aap mein aur aap ke bhatije mein kya muamla pesh aaya . Aap ne farmaya ke mein ne Nabi Karim salla Allahu alaihi wa sallam se suna hai aap salla Allahu alaihi wa sallam ne farmaya tha ke jab koi shakhs namaz kisi cheez ki taraf munh kar ke parhe aur is cheez ko aar bana raha ho phir bhi agar koi samne se guzre to isay rok dena chahiye . Agar ab bhi isay israr ho to isay larna chahiye . Kyunke woh shaitan hai .

Hum se Abdullah bin Yusuf Tinnisi ne bayan kiya , unhon ne kaha hum se Imam Malik ne Umar bin Ubaidullah ke ghulam Abu Nadr Salim bin Abi Umayya se khabar di . Unhon ne Busr bin Saeed se ke Zaid bin Khalid ne unhein Abu Juhaim Abdullah Ansari raziyallahu anhu ki khidmat mein un se yeh baat poochne ke liye bheja ke unhon ne namaz parhne wale ke samne se guzarne wale ke mutalliq Nabi Karim salla Allahu alaihi wa sallam se kya suna hai . Abu Juhaim ne kaha ke Rasool Allah salla Allahu alaihi wa sallam ne farmaya tha ke agar namazi ke samne se guzarne wala janta ke is ka kitna bara gunah hai to is ke samne se guzarne par chalis tak wahi khare rehne ko tarjeeh deta . Abul Nadr ne kaha ke mujhe yaad nahi ke Busr bin Saeed ne chalis din kaha ya mahina ya saal .

Aur Usman raziyallahu anhu ne na-pasand farmaya ke namazi ke samne munh kar ke baithe . Imam Bukhari rahimahullah ne farmaya ke yeh karahat jab hai ke namazi ka dil udhar lag jaye . Agar dil na lage to Zaid bin Thabit raziyallahu anhu ne kaha ke mujhe is ki parwa nahi . Is liye ke mard ki namaz ko mard nahi torta .

Hum se Ismail bin Khalil ne bayan kiya , kaha hum se Ali bin Musahhar ne bayan kiya Sulaiman Amash ke wastay se , unhon ne Muslim bin Subaih se , unhon ne Masrooq se , unhon ne Aisha raziyallahu anha se ke un ke samne zikr hua ke namaz ko kya cheezen tor deti hain , logon ne kaha ke kutta , gadha aur aurat bhi namaz ko tor deti hai . Jab samne aa jaye Aisha raziyallahu anha ne farmaya ke tum ne humein kutton ke barabar bana diya . Halanke mein janti hun ke Nabi Karim salla Allahu alaihi wa sallam namaz parh rahe thay . Mein aap salla Allahu alaihi wa sallam ke aur aap salla Allahu alaihi wa sallam ke qibla ke darmiyan samne charpayi par leti hui thi . Mujhe zaroorat pesh aati thi aur yeh bhi achha nahi maloom hota tha ke khud ko aap salla Allahu alaihi wa sallam ke samne kar dun . Is liye mein aahista se nikal aati thi . Amash ne Ibrahim se , unhon ne Aswad se , unhon ne Aisha se isi tarah yeh hadees bayan ki .