Hum se Abdullah bin Yusuf ne byaan kiya, kaha hum se Imam Malik ne khabar di, unhein Ibn Shihab ne, unhein Aaraj ne aur un se Abu Hurairah razi Allahu anhu ne byaan kiya ke walima ka woh khana bad-tareen khana hai jis mein sirf maldaron ko is ki taraf dawat di jaye aur muhtajon ko na khilaya jaye aur jis ne walima ki dawat qabool karne se inkar kiya us ne Allah aur us ke Rasool ki nafarmani ki.

Hum se Abdan ne byaan kiya, un se Abu Hamzah ne, un se Aamash ne, un se Abu Hazim ne aur un se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ke agar mujhe bakri ke khur ki dawat di jaye to main usay bhi qabool karoon ga aur agar mujhe woh khur bhi hadiya mein diye jayein to main usay qabool karoon ga.

Hum se Ali bin Abdullah bin Ibrahim ne byaan kiya, unhon ne kaha hum se Hajjaj bin Muhammad Awar ne byaan kiya, unhon ne kaha ke Ibn Jurayj ne kaha ke mujhko Musa bin Uqbah ne khabar di, unhein Nafi ne, unhon ne kaha ke main ne Abdullah bin Umar razi Allahu anhuma se suna, unhon ne byaan kiya ke Rasool Allah salla Allahu alaihi wasallam ne farmaya ke is walima ki jab tumhein dawat di jaye to qabool karo. Byaan kiya ke Abdullah bin Umar razi Allahu anhuma agar roze se hote jab bhi walima ki dawat ya kisi doosri dawat mein shirkat karte thay.

Hum se Abdur Rahman bin al-Mubarak ne byaan kiya, kaha hum se Abdul Waris ne byaan kiya, kaha hum se Abdul Aziz bin Suhayb ne byaan kiya, un se Anas bin Malik razi Allahu anhu ne byaan kiya ke Nabi Karim salla Allahu alaihi wasallam ne auraton aur bachon ko kisi shadi se aate huay dekha to Aap salla Allahu alaihi wasallam khushi ke maarey jaldi se kharay ho gaye aur farmaya: ya Allah! (tu gawah reh) tum log sab logon se zyada mujhko mahboob ho.

Aur Ibn Masood razi Allahu anhu ne (walime wale ghar mein) ek tasveer dekhi to woh wapas aa gaye. Ibn Umar razi Allahu anhuma ne ek martaba Abu Ayub razi Allahu anhu ki dawat ki (Abu Ayub razi Allahu anhu ne) un ke ghar mein diwar par parda para hua dekha. Ibn Umar razi Allahu anhuma ne (mazrat karte huay) kaha ke auraton ne hamain ko majboor kar diya hai. Is par Abu Ayub razi Allahu anhu ne kaha ke aur logon ke mutalliq to mujhe is ka khatra thu lekin tumhare mutalliq mera yeh khayal nahi thu (ke tum bhi aisa karo ge) wallah! Main tumhare yahan khana nahi khaoon ga chunanche woh wapas aa gaye.

Hum se Ismail bin Abi Oways ne byaan kiya, kaha ke mujh se Imam Malik ne byaan kiya, un se Nafi ne, un se Qasim bin Muhammad ne aur unhein Nabi Karim salla Allahu alaihi wasallam ki zauja mutahhara Aisha razi Allahu anha ne khabar di ke unhon ne ek chhota sa gadda khareeda jis mein tasveerein bani hui thien. Jab Nabi Karim salla Allahu alaihi wasallam ne usay dekha to darwaze par kharay ho gaye aur andar nahi aaye. Main ne Nabi Karim salla Allahu alaihi wasallam ke chehre par khafgi ke aasaar dekh liye aur arz kiya: ya Rasool Allah! Main Allah aur us ke Rasool se tauba karti hoon, main ne kya ghalati ki hai? Nabi Karim salla Allahu alaihi wasallam ne farmaya ke yeh gadda yahan kaise aaya? Byaan kiya ke main ne arz kiya main ne hi usay khareeda hai taake Aap is par baithein aur is par taik lagayein Nabi Karim salla Allahu alaihi wasallam ne farmaya ke in tasveeron ke (banane walon ko) Qayamat ke din azab diya jaye ga aur in se kaha jaye ga ke jo tum ne tasveer saazi ki hai usay zinda bhi karo? Aur Nabi Karim salla Allahu alaihi wasallam ne farmaya ke jin gharon mein tasveerein hoti hain un mein (rahmat ke) farishte nahi aate.

Hum se Saeed bin Abi Maryam ne byaan kiya, kaha hum se Abu Ghassan Muhammad bin Mutarrif ne byaan kiya, kaha ke mujh se Abu Hazim (Salamah bin Dinar) ne byaan kiya, un se Sahl bin Saad Saadi razi Allahu anhu ne byaan kiya ke jab Abu Usayd Saadi razi Allahu anhu ne shadi ki to unhon ne Nabi Karim salla Allahu alaihi wasallam aur Aap ke sahabah ko dawat di, is mauqa par khana in ki dulhan Umm Usayd hi ne tayyar kiya tha aur unhon ne hi mardon ke samne khana rakkha. Unhon ne patthar ke ek bare piyale mein raat ke waqt khajoorein bhigo di ku aur jab Nabi Karim salla Allahu alaihi wasallam khane se farigh huay to unhon ne hi is ka sharbat banaya aur Nabi Karim salla Allahu alaihi wasallam ke samne (tuhfa ke taur par) peene ke liye pesh kiya.

Hum se Yahya bin Bukayr ne byaan kiya, kaha hum se Yaqoob bin Abdur Rahman al-Qari ne byaan kiya, un se Abu al-Hazim ne, kaha ke main ne Sahl bin Saad razi Allahu anhu se suna ke Abu Usayd Saadi ne apni shadi ke mauqa par Rasool Allah salla Allahu alaihi wasallam ko dawat di. Is din in ki biwi hi sab ki khidmat kar rahi thien, haalan ke woh dulhan thien biwi ne kaha ya Sahl ne (rawi ko shak tha) ke tumhein maloom hai ke main ne Nabi Karim salla Allahu alaihi wasallam ke liye kiya tayyar kiya tha? Main ne Aap ke liye ek bare piyale mein raat ke waqt se khajoor ka sharbat tayyar kiya tha.

Aur Nabi Karim salla Allahu alaihi wasallam ka yeh farmana ke aurat pasli ki tarah hai.

Hum se Abdul Aziz bin Abdullah ne byaan kiya, ke hum se Imam Malik ne byaan kiya, un se Abu al-Zinad ne, un se Aaraj ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke aurat misl pasli ke hai, agar tum usay seedha karna chaho ge to torr do ge aur agar is se faida haasil karna chaho ge to is ki teerh ke saath hi faida haasil karo ge.