Hum se Abu Aasim ne byaan kiya , in se Ibn Jurayj ne (doosri sanad) Imam Bukhari rahmahullah ne kaha aur mujh se Muhammad bin Muqatil ne byaan kiya , kaha hum ko Abdullah bin Mubarak ne khabar di , unhein Ibn Jurayj ne khabar di , kaha ke mujhe Yahya bin Abdullah bin Sayfi ne khabar di , unhein Ikrimah bin Abdur Rahman bin Haris ne khabar di aur unhein Umm Salamah razi Allahu anha ne khabar di ke Nabi Karim salla Allahu alaihi wasallam ne (ek waqia ki wajah se) qasam khayi ke apni baaz azwaj ke yahan ek mahina tak nahi jayein ge . Phir jab untees din guzar gaye to Nabi Karim salla Allahu alaihi wasallam in ke paas subah ke waqt gaye ya shaam ke waqt Nabi Karim salla Allahu alaihi wasallam se arz kiya gaya ke Aap ne to qasam khayi ku ke ek mahina tak nahi aayein ge ? Aap ne farmaya ke mahina untees din ka bhi hota hai .

Hum se Ali bin Abdullah ne byaan kiya , kaha hum se Marwan bin Muawiyah ne , kaha hum se Abu Yafoor ne byaan kiya , kaha ke hum se Abu al-Duha ki majlis mein (mahine par) bahas ki to unhon ne byaan kiya ke hum se Ibn Abbas razi Allahu anhuma ne byaan kiya , unhon ne kaha ke ek din subah hui to Nabi Karim salla Allahu alaihi wasallam ki azwaj ro rahi thien , har zauja mutahhara ke paas un ke ghar wale maujood thay . Masjid ki taraf gaya to woh bhi logon se bhari hui ku . Phir Umar bin Khattab razi Allahu anhu aaye aur Nabi Karim salla Allahu alaihi wasallam ki khidmat mein oopar gaye to Nabi Karim salla Allahu alaihi wasallam is waqt ek kamrah mein tashreef rakhte thay . Unhon ne salam kiya lekin kisi ne jawab nahi diya . Unhon ne phir salam kiya lekin kisi ne jawab nahi diya . Phir salam kiya aur is martaba bhi kisi ne jawab nahi diya . To aawaz di (baad mein ijazat milne par) Nabi Karim salla Allahu alaihi wasallam ki khidmat mein gaye aur arz kiya: kiya Aap ne apni azwaj ko talaq de di hai ? Nabi Karim salla Allahu alaihi wasallam ne farmaya ke nahi balkay ek mahina tak in se alag rehne ki qasam khayi hai . Chunanche Nabi Karim salla Allahu alaihi wasallam untees din tak alag rahe aur phir apne biwiyon ke paas gaye .

Aur Allah ka farmana ke aur unhein itna hi maaro jo un ke liye sakht na ho .

Hum se Muhammad bin Yusuf ne byaan kiya , kaha hum se Sufyan Sawri ne byaan kiya , in se Hisham bin Urwah ne , un se un ke walid ne aur un se Abdullah bin Zama'h razi Allahu anhu ne ke Nabi Karim salla Allahu alaihi wasallam ne farmaya ke tum mein koi shakhs apni biwi ko ghulamon ki tarah na maare ke phir doosre din is se hum-bistar ho ga .

Hum se Khallad bin Yahya ne byaan kiya , kaha hum se Ibrahim bin Nafi ne , in se Hasan ne woh Muslim ke sahibzade hain , un se Safiya razi Allahu anha ne , un se Aisha razi Allahu anha ne ke qabila Ansar ki ek khatoon ne apni beti ki shadi ki ku . Is ke baad larki ke sar ke baal beemari ki wajah se urr gaye to woh Nabi Karim salla Allahu alaihi wasallam ki khidmat mein hazir huien aur Aap se is ka zikr kiya aur kaha ke is ke shohar ne is se kaha hai ke apne baalon ke saath (doosre masnooi baal) jorre . Nabi Karim salla Allahu alaihi wasallam ne is par farmaya ke aisa to hargiz mat kar kyunke masnooi baal sar par rakh ke jo jorre to aise baal jorne waliyon par lanat ki gayi hai .

Hum se Ibn Salam ne byaan kiya , kaha hum ko Abu Muawiyah ne khabar di , unhein Hisham bin Urwah ne , unhein un ke walid ne aur un se Aisha razi Allahu anha ne aayat «wa in-imra'atun khaafat mim ba'liha nushoozan au iraadan» ”aur agar koi aurat apne shohar ki taraf se nafrat aur munh morne ka khauf mehsoos kare .“ Ke mutalliq farmaya ke aayat mein aaisi aurat ka byaan hai jo kisi mard ke paas ho aur woh mard usay apne paas zyada na bulata ho balkay usay talaq dene ka irada rakhta ho aur is ke bajaye doosri aurat se shadi karna chahta ho lekin is ki maujooda biwi is se kahe ke mujhe apne saath hi rakho aur talaq na do . tum meere siwa kisi aur se shadi kar sakte ho , meere kharch se bhi tum aazad ho aur tum par baari ki bhi koi pabandi nahi to is ka zikr Allah Ta'ala ke is irshad mein «fala junaha alayhuma an yasalaha baynahuma sulhan was-sulhu khayrun» ke ”pas in par koi gunah nahi agar woh aapas mein sulah kar lein aur sulah bahar-haal behtar hai .“

Hum se Musaddad bin Musarhad ne byaan kiya , kaha hum se Yahya bin Saeed ne byaan kiya , in se Ibn Jurayj ne , un se Ata ne aur un se Jabir razi Allahu anhu ne byaan kiya ke Nabi Karim salla Allahu alaihi wasallam ke zamana mein hum azl kiya karte thay .

Hum se Ali bin Abdullah ne byaan kiya , kaha hum se Sufyan Sawri ne byaan kiya , in se Amr bin Dinar ne byaan kiya , unhein Ata ne khabar di , unhon ne Jabir razi Allahu anhu se suna , unhon ne byaan kiya ke Nabi Karim salla Allahu alaihi wasallam ke zamana mein jab Quran nazil ho raha tha hum azl karte thay .

Aur Amr bin Dinar ne byaan kiya Ata se unhon ne Jabir razi Allahu anhu se ke Quran nazil ho raha thu aur hum azl karte thay .

Hum se Abdullah bin Muhammad bin Asmaa ne byaan kiya , kaha hum se Juwayriyah ne byaan kiya , in se Imam Malik bin Anas ne , un se Zuhri ne , un se Ibn Muhayreez ne aur un se Abu Saeed Khudri razi Allahu anhu ne byaan kiya ke (ek ghazwa mein) hamain qaidi auratein milien aur hum ne in se azl kiya . Phir hum ne Rasool Allah salla Allahu alaihi wasallam se is ka hukm poocha to Nabi Karim salla Allahu alaihi wasallam ne farmaya ke kiya tum waqayi aisa karte ho ? Teen martaba Aap salla Allahu alaihi wasallam ne yeh farmaya (phir farmaya) Qayamat tak jo rooh bhi paida hone wali hai woh (apne waqt par) paida ho kar rahe gi . Pas tumhara azl karna abas harakat hai .