Mujh se Ahmad bin Abi Rajaa ne byaan kiya, kaha hum se Nadr bin Shumal ne byaan kiya, un se Hisham bin Urwah ne, kaha ke mujhe mere walid ne khabar di, un se Aisha razi Allahu anha ne, Aap ne byaan kiya ke Rasool Allah salla Allahu alaihi wasallam ke liye kisi aurat par mujhe itni ghairat nahi aati thi jitni Umm al-Momineen Khadija razi Allahu anha par aati thi kyunke Nabi Karim salla Allahu alaihi wasallam un ka zikr bakasrat kiya karte thay aur un ki tareef karte thay aur Nabi Karim salla Allahu alaihi wasallam par wahi ki gayi thi ke Aap Khadija ko jannat mein un ke moti ke ghar ki bisharat de dein.

Hum se Qutaybah bin Saeed ne byaan kiya, kaha hum se Layth bin Saad ne byaan kiya, un se Ibn Abi Mulaykah ne aur un se Miswar bin Makhramah razi Allahu anhu ne byaan kiya ke main ne Rasool Allah salla Allahu alaihi wasallam se suna, Nabi Karim salla Allahu alaihi wasallam mimbar par farma rahe thay ke Hisham bin Mugheerah jo Abu Jahl ka baap tha is ki aulad (Haris bin Hisham aur Salm bin Hisham) ne apni beti ka nikah Ali bin Abi Talib se karne ki mujh se ijazat maangi hai lekin main unhein hargiz ijazat nahi doon ga yaqeenan main is ki ijazat nahi doon ga hargiz main is ki ijazat nahi doon ga. Albatta agar Ali bin Abi Talib meri beti ko talaq de kar in ki beti se nikah karna chahein (to main is mein rukawat nahi banoon ga) kyunke woh (Fatima razi Allahu anha) mere jigar ka ek tukra hai jo is ko bura lage woh mujhko bhi bura lagta hai aur jis cheez se usay takleef pahunchti hai is se mujhe bhi takleef pahunchti hai.

Abu Musa razi Allahu anhu ne riwayat ki ke tum dekho ge ke chalis auratein ek mard ke saath hon gi is ki panah mein rahein gi kyunke mard kam reh jayein ge aur auratein zyada ho jayein gi.

Hum se Hafs bin Umar Hauzi ne byaan kiya, kaha hum se Hisham bin Urwah ne byaan kiya, un se Qatadah ne aur un se Anas razi Allahu anhu ne byaan kiya ke main tum se woh hadees byaan karoon ga jo main ne Rasool Allah salla Allahu alaihi wasallam se suni hai, mere siwa yeh hadees tum se koi aur nahi byaan karne wala hai. Main ne Nabi Karim salla Allahu alaihi wasallam se suna, Aap salla Allahu alaihi wasallam farma rahe thay ke Qayamat ki nishaniyon mein se yeh bhi hai ke Quran o hadees ka ilm utha liya jaye ga aur jahalat barh jaye gi. Zina ki kasrat ho jaye gi aur sharab log zyada peene lagein ge. Mard kam ho jayein ge aur auraton ki tadaad zyada ho jaye gi. Halat yeh ho jaye gi ke pachaas pachaas auraton ka sanbhaalne wala (khabar-geer) ek mard ho ga.

Hum se Qutaybah bin Saeed ne byaan kiya, kaha hum se Layth bin Saad ne byaan kiya, un se Yazid bin Abi Habib ne, un se Abu al-Khair ne aur un se Uqbah bin Aamir ne ke Rasool Allah salla Allahu alaihi wasallam ne farmaya ke auraton mein jaane se bachte raho is par qabila Ansar ke ek sahabi ne arz kiya: ya Rasool Allah! Dewar ke mutalliq Aap ki kiya rai hai? (woh apni bhawaj ke saath ja sakta hai ya nahi?) Nabi Karim salla Allahu alaihi wasallam ne farmaya ke dewar ya (jeth) ka jaana hi to halakat hai.

Hum se Ali bin Abdullah Madini ne byaan kiya, ke hum se Sufyan bin Uyaynah ne byaan kiya, un se Amr bin Dinar ne byaan kiya, un se Abu Mabad ne aur un se Abdullah bin Abbas razi Allahu anhuma ne byaan kiya ke Nabi Karim salla Allahu alaihi wasallam ne farmaya ke mahram ke siwa koi mard kisi aurat ke saath tanhayi mein na baithe. Is par ek sahabi ne arz kiya: ya Rasool Allah! Meri biwi Hajj karne gayi hai aur mera naam falan ghazwa mein likha gaya hai. Nabi Karim salla Allahu alaihi wasallam ne farmaya ke phir tu wapas ja aur apni biwi ke saath Hajj kar.

Hum se Muhammad bin Bashar ne hadees byaan ki, un se Ghundar ne hadees byaan ki, un se Shubah ne hadees byaan ki, un se Hisham ne byaan kiya, unhon ne Anas bin Malik razi Allahu anhu se suna, unhon ne byaan kiya ke qabila Ansar ki ek khatoon Nabi Karim salla Allahu alaihi wasallam ke paas aayin aur Nabi Karim salla Allahu alaihi wasallam ne is se logon se ek taraf ho kar tanhayi mein guftagu ki is ke baad Nabi Karim salla Allahu alaihi wasallam ne farmaya ke tum log (yani Ansar) mujhe sab logon se zyada azeez ho.

Hum se عثمin bin Abi Shaybah ne byaan kiya, kaha hum se Abdah bin Sulayman ne byaan kiya, un se Hisham bin Urwah ne, un se un ke walid ne, un se Zaynub bint Umm Salamah razi Allahu anha ne aur un se Umm al-Momineen Umm Salamah ne ke Nabi Karim salla Allahu alaihi wasallam un ke yahan tashreef rakhte thay, ghar mein ek Mugheeth naami mukhannas bhi tha. Is mukhannas (heejre) ne Umm Salamah ke bhai Abdullah bin Abi Umayyah razi Allahu anhu se kaha ke agar kal Allah ne tumhein Taif par fatah inayat farmayi to main tumhein Ghailan ki beti ko dikhlaoon ga kyunke woh samne aati hai to (mutapay ki wajah se) is ke char shiknein par jati hain aur jab peeche phirti hai to aath ho jati hain. Is ke baad Nabi Karim salla Allahu alaihi wasallam ne (Umm Salamah se) farmaya ke yeh (mukhannas) tumhare paas ab na aaya kare.

Hum se Ishaq bin Ibrahim Hanzhali ne byaan kiya, un se Esa bin Yunus ne byaan kiya, un se Awzai ne, un se Zuhri ne, un se Urwah ne aur un se Aisha razi Allahu anha ne byaan kiya ke main ne dekha ke Nabi Karim salla Allahu alaihi wasallam mere liye apni chadar se parda kiye huay hain. Main Habsha ke in logon ko dekh rahi thi jo masjid mein (jangi) khel ka mazahira kar rahe thay, aakhir main hi ukata gayi. Ab tum samajh lo ek kam umr larki jis ko khel tamasha dekhne ka bara shauq hai kitni der tak dekhti rahi ho gi.

Hum se Farwah bin Abi al-Maghra ne byaan kiya, kaha hum se Ali bin Mushar ne byaan kiya, un se Hisham bin Urwah ne, un se un ke walid ne aur un se Aisha razi Allahu anha ne byaan kiya ke Umm al-Momineen Sauda bint Zama'h razi Allahu anha raat ke waqt bahar niklein to Umar razi Allahu anhu ne unhein dekh liya aur pehchan gaye. Phir kaha: Ae Sauda, Allah ki qasam! tum hamase chhup nahi saktien. Jab Sauda razi Allahu anha wapas Nabi Karim salla Allahu alaihi wasallam ke paas aayin to Nabi Karim salla Allahu alaihi wasallam se is ka zikr kiya. Nabi Karim salla Allahu alaihi wasallam is waqt mere hujray mein shaam ka khana kha rahe thay. Aap salla Allahu alaihi wasallam ke hath mein gosht ki ek haddi thi. Is waqt Aap par wahi nazil honi shuru hui aur jab nuzool e wahi ka silsila khatam hua to Aap salla Allahu alaihi wasallam ne farmaya ke tumhein ijazat di gayi hai ke tum apni zarooriyat ke liye bahar nikal sakti ho.