Hum se Abu al-Waleed Hisham bin Abdul Malik ne byaan kiya, kaha hum se Layth bin Saad ne byaan kiya, un se Yazid bin Abi Habib ne, un se Abu al-Khair aur un se Uqbah razi Allahu anhu ne ke Rasool Allah salla Allahu alaihi wasallam ne farmaya ke tamam sharton mein woh shartein sab se zyada poori ki jaane ke laiq hain jin ke zariye tum ne sharmgahon ko halal kiya hai. Yani nikah ki shartein zaroor poori karni hon gi.

Hum se Ubaydullah bin Musa ne byaan kiya, kaha un se Zakariya ne jo Abu Zaidah ke sahibzade hain, un se Saad bin Ibrahim ne, un se Abu Salamah ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke kisi aurat ke liye jaiz nahi ke apni kisi (saukan) behen ki talaq ki shart is liye lagaye taake is ke hisse ka piyala bhi khud andail le kyunke usay wahi mile ga jo is ke muqaddar mein ho ga.

Ibn Masood razi Allahu anhu ne kaha ke koi aurat (saukan) behen ki talaq ki shart na lagaye.

Is ki riwayat Abdur Rahman bin Auf razi Allahu anhu ne Nabi Karim salla Allahu alaihi wasallam se ki hai.

Hum se Abdullah bin Yusuf ne byaan kiya, un ko Malik ne khabar di, unhein Humayd Taweel ne aur unhein Anas bin Malik ne ke Abdur Rahman bin Auf razi Allahu anhu Rasool Allah salla Allahu alaihi wasallam ki khidmat mein hazir huay to un ke oopar zard rang ka nishan tha. Nabi Karim salla Allahu alaihi wasallam ne is ke mutalliq poocha to unhon ne bataya ke unhon ne Ansar ki ek aurat se nikah kiya hai. Nabi Karim salla Allahu alaihi wasallam ne daryaft farmaya ke usay mahr kitna diya hai? Unhon ne kaha ke ek ghulli ke barabar sona. Nabi Karim salla Allahu alaihi wasallam ne farmaya ke phir walima kar khwah ek bakri hi ka ho.

Hum se Musaddad ne byaan kiya, kaha hum se Yahya ne byaan kiya, un se Humaydi ne aur un se Anas razi Allahu anhu ne byaan kiya ke Nabi Karim salla Allahu alaihi wasallam ne Zaynub bint Jahsh razi Allahu anha ke saath nikah par dawat e walima ki aur Musalmanon ke liye khane ka intizam kiya. (khane se faraghat ke baad) Nabi Karim salla Allahu alaihi wasallam bahar tashreef le gaye, jaisa ke nikah ke baad Aap ka dastoor tha. Phir Aap Ummahat al-Momineen ke hujron mein tashreef le gaye. Aap ne un ke liye dua ki aur unhon ne Aap ke liye dua ki. Phir Aap wapas tashreef laye to do sahabah ko dekha (ke abhi baithe huay thay) is liye Aap salla Allahu alaihi wasallam phir tashreef le gaye. (Anas razi Allahu anhu ne byaan kiya ke) mujhe poori tarah yaad nahi ke main ne khud Nabi Karim salla Allahu alaihi wasallam ko khabar di ya kisi aur ne khabar di ke woh donon sahabi bhi chale gaye hain.

Hum se Sulayman bin Harb ne byaan kiya, kaha hum se Hammad bin Zayd ne byaan kiya, un se Sabit ne aur un se Anas razi Allahu anhu ne ke Nabi Karim salla Allahu alaihi wasallam ne Abdur Rahman bin Auf par zardi ka nishan dekha to poocha ke yeh kya hai? Unhon ne kaha ke main ne ek aurat se ek ghulli ke wazan ke barabar sone ke mahr par nikah kiya hai. Nabi Karim salla Allahu alaihi wasallam ne farmaya ke Allah Ta'ala tumhein barkat de dawat e walima kar khwah ek bakri hi ki ho.

Hum se Farwah bin Abi al-Maghra ne byaan kiya, kaha hum se Ali bin Mushar ne byaan kiya, un se Hisham bin Urwah ne, un se un ke walid ne aur un se Aisha razi Allahu anha ne ke Nabi Karim salla Allahu alaihi wasallam ne jab mujh se shadi ki to meri walda (Umm Rooman bint Aamir) mere paas aayin aur mujhe Nabi Karim salla Allahu alaihi wasallam ke ghar ke andar le gayin. Ghar ke andar qabila Ansar ki auratein maujood thien. Unhon ne (mujhko aur meri maan ko) yun dua di «baarakallahu wa baaraka» ”Allah kare tum achhi ho tumhara naseeba achha ho.“

Hum se Muhammad bin Alaa ne byaan kiya, kaha hum se Abdullah bin al-Mubarak ne byaan kiya, un se Mamar bin Rashid ne, un se Hammam ne aur un se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ke guzashta anbiya mein se ek Nabi (Yoosha alaihissalam ya Dawood alaihissalam) ne ghazwa kiya aur (ghazwa se pehle) apni qaum se kaha ke mere saath koi aisa shakhs na chale jis ne kisi nayi aurat se shadi ki ho aur is ke saath sohbat karne ka irada rakhta ho aur abhi sohbat na ki ho.

Hum se Qubaysah bin Utbah ne byaan kiya, kaha hum se Sufyan ne byaan kiya, un se Hisham bin Urwah ne aur un se Urwah ne ke Nabi Karim salla Allahu alaihi wasallam ne Aisha razi Allahu anha se nikah kiya to un ki umr chhay saal ki thi aur jab un ke saath khilwat ki to un ki umr nau saal ki thi aur woh Nabi Karim salla Allahu alaihi wasallam ke saath nau saal tak rahein.