Hum se Abdullah bin Yusuf ne byaan kiya , kaha hum se Imam Malik ne byaan kiya , un se Nafi ne ke jab Abdullah bin Umar razi Allahu anhuma se namaz e khauf ke mutalliq poocha jata to woh farmate ke Imam Musalmanon ki ek jama'at ko le kar khud aage barhe aur unhein ek rakat namaz parhaye . Is dauran mein Musalmanon ki doosri jama'at un ke aur dushman ke darmiyan mein rahe . Yeh log namaz mein abhi shareek na hon , phir jab Imam in logon ko ek rakat parha chuke jo pehle is ke saath thay to ab yeh log peeche hat jayein aur un ki jagah le lein , jinon ne ab tak namaz nahi parhi hai , lekin yeh log salam na pherein . Ab woh log aage barhein jinon ne namaz nahi parhi hai aur Imam unhein bhi ek rakat namaz parhaye , ab Imam do rakat parh chukne ke baad namaz se farigh ho chuka . Phir donon jama'atein (jinon ne alag alag Imam ke saath ek ek rakat namaz parhi thi) apni baqi ek ek rakat ada kar lein . Jabke Imam apni namaz se farigh ho chuka hai . Is tarah donon jama'aton ki do do rakat poori ho jayein gi . Lekin agar khauf is se bhi zyada hai to har shakhs tanha namaz parh le , paidal ho ya sawar , qibla ki taraf rukh ho ya na ho . Imam Malik ne byaan kiya , un se Nafi ne ke mujh ko yaqeen hai ke Abdullah bin Umar razi Allahu anhuma ne yeh baatein Rasool Allah salla Allahu alaihi wasallam se sun kar hi byaan ki hain .

Mujh se Abdullah bin Abi Aswad ne byaan kiya , kaha hum se Humayd bin Aswad aur Yazid bin Zuray ne byaan kiya , kaha ke hum se Habib bin Shaheed ne byaan kiya , un se Ibn Abi Mulaykah ne byaan kiya ke Ibn Zubayr razi Allahu anhuma ne Usman bin Affan razi Allahu anhu se kaha ke Surah al-Baqarah ki aayat «wallazhina yutawaffauna minkum wa yazharuna azwaajan» yani ”jo log tum mein se wafat pa jayein aur biwiyan chhor jayein .“ Allah Ta'ala ke farman «ghayra ikhrajin» tak ko doosri aayat ne mansookh kar diya hai . Is ko Aap ne mus-haf mein kyun likhwaya , chhor kyun nahi diya ? Unhon ne kaha: mere bhatije! Main kisi aayat ko is ke thikane se badalne wala nahi . Yeh Humayd ne kaha ya kuch aisa hi jawab diya .

Hum se Ahmad bin Salih ne byaan kiya , un se Ibn Wahb ne byaan kiya , unhein Yunus ne khabar di , unhein Ibn Shihab ne , unhein Abu Salamah aur Saeed ne , un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ”Shakk karne ka hamain Ibrahim alaihissalam se zyada haq hai , jab unhon ne arz kiya tha ke ae mere Rabb! Mujhe dikha de ke tu mardon ko kis tarah zinda kare ga , Allah ki taraf se irshad hua , kya tujh ko yaqeen nahi hai ? Arz ki yaqeen zaroor hai , lekin main ne yeh darkhwast is liye ki hai ke mere dil ko aur itminan haasil ho jaye .“

Hum se Ibrahim bin Musa ne byaan kiya , kaha hum ko Hisham ne khabar di , unhein Ibn Jurayj ne , unhon ne Abdullah bin Abi Mulaykah se suna , woh Abdullah bin Abbas razi Allahu anhuma se byaan karte thay , Ibn Jurayj ne kaha aur main ne Ibn Abi Mulaykah ke bhai Abu Bakr bin Abi Mulaykah se bhi suna , woh Ubayd bin Umayr se riwayat karte thay ke ek din Umar razi Allahu anhu ne Nabi Karim salla Allahu alaihi wasallam ke as-haab se daryaft kiya ke Aap log jaante ho yeh aayat kis silsile mein nazil hui hai «ayawaddu ahadukum an takoona lahu jannatun» ”kya tum mein se koi yeh pasand karta hai ke is ka ek bagh ho .“ Sab ne kaha ke Allah zyada janne wala hai . Yeh sun kar Umar razi Allahu anhu bahut khafa ho gaye aur kaha , saaf jawab dein ke Aap logon ko is silsile mein kuch maloom hai ya nahi . Ibn Abbas razi Allahu anhuma ne arz kiya: Ameer al-Momineen! Mere dil mein ek baat aati hai . Umar razi Allahu anhu ne farmaya: bete! Tumhein kaho aur apne ko haqeer na samajho . Ibn Abbas razi Allahu anhuma ne arz kiya ke is mein amal ki misal byaan ki gayi hai . Umar razi Allahu anhu ne poocha , kaise amal ki ? Ibn Abbas razi Allahu anhuma ne arz kiya ke amal ki . Umar razi Allahu anhu ne kaha ke yeh ek maldar shakhs ki misal hai jo Allah ki itaat mein naik amal karta rehta hai . Phir Allah Shaytan ko is par ghalib kar deta hai , woh gunahon mein masroof ho jata hai aur is ke agle naik aamal sab gharat ho jate hain .

Arab log «alhafa» aur «alahha» aur «ahfani bil-mas'alati» jab kehte hain ke koi gir-gira kar peeche lag kar sawal kare . «fayuhfikum» ke maani tumhein mushaqqat mein daal de , na thaka de .

Hum se Saeed bin Abi Maryam ne byaan kiya , unhon ne kaha hum se Muhammad bin Jafar ne byaan kiya , unhon ne kaha ke mujh se Shareek bin Abi Namr ne byaan kiya , un se Ata bin Yasar aur Abdur Rahman bin Abi Amrah Ansari ne byaan kiya aur unhon ne kaha hum ne Abu Hurairah razi Allahu anhu se suna , unhon ne byaan kiya ke Nabi Karim salla Allahu alaihi wasallam ne farmaya ”Miskeen woh nahi hai jise ek ya do khajoor , ek ya do luqme dar ba dar liye phirein , balkay miskeen woh hai jo maangne se bachta rahe aur agar tum daleel chaho to (Quran se) is aayat ko parh lo «la yas'aloona-naasa ilhaafan» ke ”woh logon se chimat kar nahi maangte .“

Hum se Umar bin Hafs bin Ghiyas ne byaan kiya , unhon ne kaha hum se hamare walid ne byaan kiya , hum se Aamash ne byaan kiya , hum se Muslim ne byaan kiya , un se Masrooq ne aur un se Umm al-Momineen Aisha razi Allahu anha ne byaan kiya ke jab sood ke silsile mein Surah al-Baqarah ki aakhri aayatein nazil huien to Rasool Allah salla Allahu alaihi wasallam ne unhein parh kar logon ko sunaya aur is ke baad sharab ki tijarat bhi haram qarar payi .

Hum se Bishr bin Khalid ne byaan kiya , unhon ne kaha hum ko Muhammad bin Jafar ne khabar di , unhein Shubah ne , unhein Sulayman Aamash ne , unhon ne kaha ke main ne Abu al-Duha se suna , woh Masrooq se riwayat karte thay ke un se Aisha razi Allahu anha ne byaan kiya jab Surah al-Baqarah ki aakhri aayatein nazil huien to Rasool Allah salla Allahu alaihi wasallam bahar tashreef laye aur masjid mein unhein parh kar sunaya is ke baad sharab ki tijarat haram ho gayi .

Mujh se Muhammad bin Bashar ne byaan kiya , kaha hum se Ghundar ne byaan kiya , un se Shubah ne byaan kiya , un se Mansoor ne , un se Abu al-Duha ne , un se Masrooq ne aur un se Aisha razi Allahu anha ne byaan kiya ke jab Surah al-Baqarah ki aakhri aayatein nazil huien to Rasool Allah salla Allahu alaihi wasallam ne unhein masjid mein parh kar sunaya aur sharab ki tijarat haram qarar di gayi .

Aur hum se Muhammad bin Yusuf Faryabi ne byaan kiya , un se Sufyan Sawri ne , un se Mansoor aur Aamash ne , un se Abu al-Duha ne , un se Masrooq ne aur un se Aisha razi Allahu anha ne byaan kiya ke jab Surah al-Baqarah ki aakhri aayat nazil hui to Rasool Allah salla Allahu alaihi wasallam kharay huay aur hamain parh kar sunaya phir sharab ki tijarat haram kar di .