Hum se Habban bin Musa ne byaan kiya , kaha hum ko Abdullah bin Mubarak ne khabar di , kaha hum ko Mamar ne khabar di , un se Zuhri ne byaan kiya , kaha mujh se Salim ne byaan kiya , un se un ke walid Abdullah bin Umar razi Allahu anhuma ne byaan kiya aur unhon ne Rasool Allah salla Allahu alaihi wasallam se suna , Aap ne Fajr ki doosri rakat ke ruku se sar utha kar yeh bad-dua ki . ”Ae Allah! Falan , falan aur falan kafir par lanat kar . Yeh bad-dua Aap ne «samiallahu liman hamidah» aur «rabbana wa lakal hamdu» ke baad ki thi . Is par Allah Ta'ala ne yeh aayat utari «laysa laka minal amri shay'un» ”Aap ko is mein koi dakhal nahi .“ Aakhir aayat «fa-innahum zhalimoona» tak . Is riwayat ko Ishaq bin Rashid ne Zuhri se naqal kiya hai .

Hum se Musa bin Ismail ne byaan kiya , unhon ne kaha hum se Ibrahim bin Saad ne byaan kiya , kaha hum se Ibn Shihab ne byaan kiya , un se Saeed bin Musayyab aur Abu Salamah bin Abdur Rahman ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam jab kisi par bad-dua karna chahte ya kisi ke liye dua karna chahte to ruku ke baad karte «samiallahu liman hamidah , allahumma rabbana lakal hamdu» ke baad . Baaz auqat Aap salla Allahu alaihi wasallam ne yeh dua bhi ki ”Ae Allah! Waleed bin Waleed , Salama bin Hisham aur Ayash bin Abi Rabiah ko najat de , Ae Allah! Mudar walon ko sakhti ke saath pakar le aur in mein aaisi qaht-saali la , jaisi Yusuf alaihissalam ke zamane mein hui thi .“ Aap salla Allahu alaihi wasallam buland aawaz se yeh dua karte aur Aap namaz e Fajr ki baaz rakat mein yeh dua karte . Ae Allah , falan aur falan ko apni rahmat se door kar de . Arab ke chand khaas qabail ke haq mein Aap (yeh bad-dua karte thay) yahan tak ke Allah Ta'ala ne aayat nazil ki «laysa laka minal amri shay'un» ke ”Aap ko is amr mein koi dakhal nahi .“

«ukhrakum» «aakhirikum» ki «tanis» hai . Ibn Abbas razi Allahu anhuma ne kaha do sa'adaton mein se ek sa'adat fatah aur doosri shahadat hai .

Hum se Amr bin Khalid ne byaan kiya , kaha hum se Zuhayr ne byaan kiya . Un se Abu Ishaq ne byaan kiya , kaha ke main ne Bara bin Azib razi Allahu anhu se suna , unhon ne byaan kiya ke Uhud ki larai mein Rasool Allah salla Allahu alaihi wasallam ne (teer-andazon ke) paidal daste par Abdullah bin Jubayr razi Allahu anhu ko afsar muqarrar kiya tha , phir bahut se Musalmanon ne peeth pher li , aayat «fazhaaka izh yad'oohumur rasoolu fee ukhrakum» ”aur Rasool tum ko pukar rahe thay tumhare peeche se .“ Mein isi ki taraf isharah hai , is waqt Rasool Allah salla Allahu alaihi wasallam ke saath barah sahabiyon ke siwa aur koi maujood na tha .

Hum se Ishaq bin Ibrahim bin Abdur Rahman Abu Yaqoob Baghdadi ne byaan kiya , kaha hum se Husain bin Muhammad ne byaan kiya , un se Shayban ne byaan kiya , un se Qatadah ne aur un se Anas razi Allahu anhu ne byaan kiya ke Abu Talha razi Allahu anhu ne kaha , Uhud ki larai mein jab hum saff bandhe kharay thay to hum par ghanoodgi tari ho gayi thi . Abu Talha razi Allahu anhu ne byaan kiya ke kaifiyat yeh ho gayi thi ke neend se meri talwar hath se baar baar girti aur main usay uthata .

«al-qarhu» yani «al-jirahu» zakham . «istajaabu» yani «ajaabu» unhon ne qabool kiya . «yastajeebu ay yujeebu» woh qabool karte hain .

Hum se Ahmad bin Yunus ne byaan kiya , main samajhta hoon ke unhon ne yeh kaha ke hum se Abu Bakr Shubah bin Ayash ne byaan kiya , un se Abu Haseen Usman bin Aasim ne aur un se Abu al-Duha ne aur un se Ibn Abbas razi Allahu anhuma ne ke kalma «hasbunallahu wa nimal wakeel» Ibrahim alaihissalam ne kaha tha , is waqt jab un ko aag mein dala gaya tha aur yahi kalma Muhammad salla Allahu alaihi wasallam ne is waqt kaha tha jab logon ne Musalmanon ko darane ke liye kaha tha ke logon (yani Quraysh) ne tumhare khilaf bara saman e jang ik ektha kar rakkha hai , un se daro lekin is baat ne in Musalmanon ka (josh e) iman aur barha kiya aur yeh Musalman bolay ke hamare liye Allah kafi hai aur wahi behtareen kaam banane wala hai .

Hum se Malik bin Ismail ne byaan kiya , kaha hum se Israeel ne byaan kiya , un se Abu Haseen ne , un se Abu al-Duha ne aur un se Ibn Abbas razi Allahu anhuma ne byaan kiya ke jab Ibrahim alaihissalam ko aag mein dala gaya to aakhri kalma jo Aap ki zaban mubarak se nikla «hasbiyallahu wa nimal wakeel» tha yani meri madad ke liye Allah kafi hai aur wahi behtareen kaam banane wala hai .

Is aayat mein jo «sayutawwaqoona» ka lafz hai «tawwaqtuhu» «bi-tauqin» se hai yani tauq pehnaye jayein ge .

Mujh se Abdullah bin Muneer ne byaan kiya , unhon ne Abu al-Nadr Hashim bin Qasim se suna , kaha hum se Abdur Rahman bin Abdullah bin Dinar ne byaan kiya , un se un ke walid ne , un se Abu Salih ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya jise Allah Ta'ala ne maal diya aur phir us ne is ki zakat nahi ada ki to (aakhirat mein) is ka maal nihayat zahreele saanp ban kar jis ki aankhon ke oopar do nuqte hon ge . Is ki gardan mein tauq ki tarah pehna diya jaye ga . Phir woh saanp is ke donon jabron ko pakar kar kahe ga ke main hi tera maal hoon , main hi tera khazana hoon , phir Aap ne is aayat ki tilawat «wa la yahsabannallazhina yabkhaloona bima aataahumullahu min fadlihi» ki ”aur jo log ke is maal mein bukhl karte hain jo Allah ne unhein apne fazl se de rakkha hai , woh yeh na samjhein ke yeh maal un ke haq mein behtar hai .“ Aakhir tak .