Hum se Ali bin Abdullah ne byaan kiya, kaha hum se Sufyan bin Uyaynah ne byaan kiya, kaha ke hum se Zuhri ne byaan kiya, kaha ke mujh se Abu Idrees ne byaan kiya aur unhon ne Ubadah bin Samit razi Allahu anhu se suna, unhon ne byaan kiya ke hum Nabi Karim salla Allahu alaihi wasallam ki khidmat mein hazir thay. Nabi Karim salla Allahu alaihi wasallam ne farmaya ke kya tum mujh se is baat par bai'at karo ge ke Allah Ta'ala ke saath kisi ko shareek na thehrao ge aur na zina karo ge aur na chori karo ge.“ Aap salla Allahu alaihi wasallam ne Surah an-Nisa ki aayatein parhien. Sufyan ne is hadees mein aksar yun kaha ke Aap ne yeh aayat parhi. Phir tum mein se jo shakhs is shart ko poora kare ga to is ka ajr Allah par hai aur jo koi in mein se kisi shart ki khilaf-warzi kar baitha aur is par usay saza bhi mil gayi to saza is ke liye kaffara ban jaye gi lekin kisi ne apne kisi ahad ke khilaf kiya aur Allah ne usay chhupa liya to woh Allah ke hawale hai Allah chahe to usay is par azab de aur agar chahe maaf kar de, Sufyan ke saath is hadees ko Abdur Razzaq ne bhi Mamar se riwayat kiya unhon ne Zuhri se aur yun hi kaha aayat parhi.

Hum se Muhammad bin Abdur Raheem ne byaan kiya, kaha hum se Haroon bin Maroof ne byaan kiya, kaha hum se Abdullah bin Wahb ne byaan kiya ke mujhe Ibn Jurayj ne khabar di, unhein Hasan bin Muslim ne khabar di, unhein Taoos ne aur un se Ibn Abbas razi Allahu anhuma ne byaan kiya ke main ne Rasool Allah salla Allahu alaihi wasallam aur Abu Bakr aur Umar aur Usman razi Allahu anhum ke saath Eid al-Fitr ki namaz parhi hai. In tamam buzurgon ne namaz khutba se pehle parhi thi aur khutba baad mein diya tha (ek martaba khutba se farigh hone ke baad) Nabi Karim salla Allahu alaihi wasallam utray goya ab bhi main Nabi Karim salla Allahu alaihi wasallam ko dekh raha hoon, jab Aap logon ko apne hath ke ishare se bitha rahe thay phir Aap saff cheerte huay aage barhay aur auraton ke paas tashreef laye. Bilal razi Allahu anhu Aap ke saath thay phir Aap ne yeh aayat tilawat ki «ya ayyuhan-nabiyyu izha jaa-akal mu'minatu yubayianaka ala alla yushrikna billahi shay-an wa la yasriqna wa la yazneena wa la yaqtulna auladahunna wa la ya'teena bi-buhtaanin yaftareenahu bayna aydeehinna wa arjulihinna» yani ”Ae Nabi! Jab momin auratein Aap ke paas aayein ke Aap se in baaton par bai'at karein ke Allah ke saath na kisi ko shareek karein gi aur na chori karein gi aur na bad-kaari karein gi aur na apne bachon ko qatl karein gi aur na bohtan lagayein gi jise apne hath aur paon ke darmiyan ghar lein“ Aap ne poori aayat aakhir tak parhi. Jab Aap salla Allahu alaihi wasallam aayat parh chuke to farmaya tum in sharait par qaim rehne ka waada karti ho? In mein se ek aurat ne jawab diya ji haan ya Rasool Allah! In ke siwa aur kisi aurat ne (sharam ki wajah se) koi baat nahi kahi. Hasan ko is aurat ka naam maloom nahi tha byaan kiya ke phir auraton ne sadqa dena shuru kiya aur Bilal razi Allahu anhu ne apna kapra phaila liya. Auratein Bilal razi Allahu anhu ke kapre mein chhalay aur angoothiyaan daalne lagein.

‏‏‏‏ Mujahid ne kaha «man ansari ilallahi» ka maani yeh hai ke mere saath ho kar kaun Allah ki taraf jata hai aur Ibn Abbas razi Allahu anhuma ne kaha «marsoosun» khoob mazbooti se mila hua, jura hua, auron ne kaha seesa mila kar jura hua.

Hum se Abu al-Yaman ne byaan kiya, kaha hum ko Shuayb ne khabar di aur un se Zuhri ne byaan kiya kaha hum ko Muhammad bin Jubayr bin Mut'im ne khabar di aur un se un ke walid Jubayr bin Mut'im razi Allahu anhu ne byaan kiya ke main ne Rasool Allah salla Allahu alaihi wasallam se suna, Aap salla Allahu alaihi wasallam farma rahe thay ke mere kai naam hain. Main Muhammad hoon, main Ahmad hoon, main Maahi hoon ke jis ke zariye Allah Ta'ala kufr ko mita de ga aur main Haashir hoon ke Allah Ta'ala sab ko hashr mein mere baad jama kare ga aur main Aaqib hoon. Yani sab paighambaron ke baad duniya mein aane wala hoon.

‏‏‏‏ .

‏‏‏‏ Umar razi Allahu anhu ne «famdu ila zhikrillahi» parha hai yani Allah Ta'ala ki yaad ki taraf chalo.

Mujh se Abdul Aziz bin Abdullah ne byaan kiya, kaha ke mujh se Sulayman bin Hilal ne byaan kiya, un se Sawr ne, un se Abu al-Ghais Salim ne aur un se Abu Hurairah razi Allahu anhu ne byaan kiya ke hum Rasool Allah salla Allahu alaihi wasallam ke paas baithe huay thay ke Surah al-Jumu'ah ki yeh aayatein nazil huien «wa aakhareena minhum lamma yalhaqoo bihim» al-aayat aur doosron ke liye bhi jo abhi in mein shamil nahi huay hain. (Nabi Karim salla Allahu alaihi wasallam haadi aur mualim hain) byaan kiya main ne arz ki ya Rasool Allah! Yeh doosre kaun log hain? Nabi Karim salla Allahu alaihi wasallam ne koi jawab nahi diya. Aakhir yahi sawal teen martaba kiya. Majlis mein Salman Farsi razi Allahu anhu bhi maujood thay Nabi Karim salla Allahu alaihi wasallam ne un par hath rakh kar farmaya agar iman Surayya par bhi ho ga tab bhi in logon (yani Faaris walon) mein se is tak pahunch jayein ge ya yun farmaya ke ek aadmi in logon mein se is tak pahunch jaye ga.

Hum se Abdul Aziz bin Abdul Wahhab ne byaan kiya, kaha hum se Abdul Aziz ne byaan kiya, unhein Sawr ne aur un se Abu al-Ghais ne, unhein Abu Hurairah razi Allahu anhu ne aur unhein Nabi Karim salla Allahu alaihi wasallam ne ke un ki qaum ke kuch log usay pa lein ge.

Mujh se حفص bin Umar ne byaan kiya, kaha hum se Khalid bin Abdullah ne byaan kiya, un se Husain ne byaan kiya, un se Salim bin Abi al-Jad ne aur Abu Sufyan ne Jabir bin Abdullah razi Allahu anhuma se, unhon ne byaan kiya ke Jumu'ah ke din saman e tijarat liye huay oont aaye hum is waqt Nabi Karim salla Allahu alaihi wasallam ke saath thay unhein dekh kar siwaye barah aadmi ke sab log idhar hi daur pare. Is par Allah Tabarak o Ta'ala ne yeh aayat nazil ki «wa izha ra'au tijaaratan au lahwan-infad-doo ilayha» al-aayat yani aur baaz logon ne jab kabhi ek saude ya tamashay ki cheez ko dekha to is ki taraf daurte huay phail gaye.

.