Hum se Ali bin Abdullah ne byaan kiya, kaha hum se Sufyan bin Uyaynah ne byaan kiya, un se Abu al-Zinad ne, un se Aaraj ne aur un se Abu Hurairah razi Allahu anhu ne byaan kiya, woh kehte thay ke unhon ne Rasool Allah salla Allahu alaihi wasallam se suna tha ke Nabi Karim salla Allahu alaihi wasallam ne farmaya ke jannat mein ek darakht taveel ho ga (itna bara ke) sawar is ke saye mein sau saal tak chale ga aur phir bhi is ka saya khatam na ho ga agar tumhara jee chahe to is aayat «wa zhil-lim mamdoodin» ki qirat kar lo.

Mujahid ne kaha «jaalakum mustakh-lafeena feehi» yani jis ne zameen mein tum ko basaya, jaan-nasheen kiya, aabaad kiya. «minazh-zhulumaati ilan-noori» yani gumrahi se hidayat ki taraf. «wa manaafiu lin-naasi» yani tum lohe se dhaal aur hathiyar waghaira banate ho. «maulaakum» yani aag tumhare liye zyada sazawaar hai. «li-alla ya'lama ahlul kitaabi» taake Ahl e Kitab jaan lein ( «la» zaid hai). «azh-zhahiru» ilm ki roo se. «al-baatinu» ilm ki roo se. «un-zhooroona» (ba-fatah hamza wa kasra zhaa ek qirat hai) yani hamara intizar karo.

Mujahid ne kaha «yuhaad-doon-allaha» ka maani Allah ki mukhalifat karte hain. «kubitoo» zaleel kiye gaye. «istahuwazha» ghalib ho gaya.

Lafz «al-jalaa'u» ke maani ek zameen se doosri zameen ki taraf nikal dena jise jala-watni kehte hain.

Hum se Muhammad bin Abdur Raheem ne byaan kiya, kaha hum se Saeed bin Sulayman ne byaan kiya, kaha hum se Hushaym ne byaan kiya, kaha hum ko Abu Bishr Jafar ne khabar di, un se Saeed bin Jubayr ne byaan kiya ke main ne Abdullah bin Abbas razi Allahu anhuma se Surah at-Tauba ke mutalliq poocha to unhon ne kaha yeh Surah at-Tauba hai ya fazeehat karne wali hai is surat mein barabar yahi utarta raha baaz log aise hain aur baaz log aise hain yahan tak ke logon ko guman hua yeh surat kisi ka kuch bhi nahi chhore gi balkay sab ke bhed khol de gi. Byaan kiya ke main ne Surah al-Anfaal ke mutalliq poocha to farmaya ke yeh Jang e Badr ke baare mein nazil hui thi. Byaan kiya ke main ne Surah al-Hashr ke mutalliq poocha to farmaya ke qabila Banu Nadheer ke Yahud ke baare mein nazil hui thi.

Hum se Hasan bin Mudrik ne byaan kiya, kaha hum se Yahya bin Hammad ne byaan kiya, kaha hum ko Abu Awanah ne khabar di, unhein Abu Bishr (Jafar bin Abi) ne aur un se Saeed bin Jubayr ne byaan kiya ke main ne Ibn Abbas razi Allahu anhuma se Surah al-Hashr ke mutalliq poocha to unhon ne kaha balkay usay Surah an-Nadheer kaha.

Aayat mein «leenatun» bamaani «nakhlatun» hai jis ka maani khajoor hai jabke woh Ajwa ya Barni na ho yani khajoor murad hain.

Hum se Qutaybah bin Saeed ne byaan kiya, kaha hum se Layth bin Saad ne byaan kiya, un se Nafi ne aur un se Abdullah bin Umar razi Allahu anhuma ne byaan kiya ke Rasool Allah salla Allahu alaihi wasallam ne Banu Nadheer ke khajooron ke darakht jala diye thay aur unhein kaat dala tha. Yeh darakht Maqam e Buwayra mein thay phir is ke mutalliq Allah Ta'ala ne aayat nazil ki «ma qata'tum min leenatin au taraktumooha qaa'imatan ala usooliha fa-bi-izhnillahi wa liyukhzhiyal faasiqeena» ke ”jo khajooron ke darakht tum ne kaate ya unhein un ki jaroon par qaim rehne diya so yeh donon Allah hi ke hukm ke muwafiq hain aur taake nafarmanon ko zaleel kare.“

Hum se Ali bin Abdullah ne byaan kiya, kaha hum se Sufyan bin Uyaynah ne kai martaba Amr bin Dinar se byaan kiya, un se Zuhri ne, un se Malik bin Aus bin Haddasan ne aur un se Umar razi Allahu anhu ne byaan kiya ke Bani Nadheer ke amwaal ko Allah Ta'ala ne Rasool Allah salla Allahu alaihi wasallam ko baghair larayi ke diya tha. Musalmanon ne is ke liye ghore aur oont nahi doraye. In amwaal ka kharch karna khaas taur se Rasool Allah salla Allahu alaihi wasallam ke hath mein tha. Chunanche Aap salla Allahu alaihi wasallam is mein se azwaj e mutahharat ka saalana kharch dete thay aur jo baqi bachta tha is se saman e jang aur ghoron ke liye kharch karte thay taake Allah Rabb al-Izzat ke rasta mein jihad ke mauqa par kaam aayein.