Hum se Muslim bin Ibrahim ne byaan kiya , kaha hum se Shubah ne byaan kiya , kaha hum se Muawiyah bin Qurrah ne byaan kiya aur un se Abdullah bin Mugaffal razi Allahu anhu ne byaan kiya ke Rasool Allah salla Allahu alaihi wasallam ne Fatah Makkah ke din Surah al-Fatah khoob khush-alhani se parhi . Muawiyah bin Qurrah ne kaha ke agar main chahoon ke tumhare samne Nabi Karim salla Allahu alaihi wasallam ki is mauqa par tarz e qirat ki naqal karoon to kar sakta hoon .

Hum se Sadaqah bin Fadl ne byaan kiya , unhein Ibn Uyaynah ne khabar di , un se Ziyad ne byaan kiya aur unhon ne Mugheerah bin Shubah razi Allahu anhu se suna ke Rasool Allah salla Allahu alaihi wasallam namaz mein raat bhar kharay rahe yahan tak ke Aap ke donon paon sooj gaye . Aap salla Allahu alaihi wasallam se arz kiya gaya ke Allah Ta'ala ne to Aap ki agli pichhli tamam khatayein maaf kar di hain . Nabi Karim salla Allahu alaihi wasallam ne farmaya ke kya main shukr-guzar banda na banoon ?

Hum se Hasan bin Abdul Aziz ne byaan kiya , kaha hum se Abdullah bin Yahya ne byaan kiya , unhein Haywah ne khabar di , unhein Abu al-Aswad ne , unhon ne Urwah se suna aur unhon ne Aisha razi Allahu anha se ke Nabi Karim salla Allahu alaihi wasallam raat ki namaz mein itna taveel qiyam karte ke Aap ke qadam phat jate . Aisha razi Allahu anha ne ek martaba arz kiya ke ya Rasool Allah! Aap itni zyada mushaqqat kyun uthate hain . Allah Ta'ala ne to Aap ki agli pichhli khatayein maaf kar di hain . Aap salla Allahu alaihi wasallam ne farmaya kya phir main shukr-guzar banda banna pasand na karoon . Umr ke aakhri hisse mein (jab taveel qiyam dushwar ho gaya to) Aap salla Allahu alaihi wasallam baith kar raat ki namaz parhte aur jab ruku ka waqt aata to kharay ho jayein ge (aur taqreeban tees ya chalis aayatein aur parhte) phir ruku karte .

Hum se Abdullah ne byaan kiya , kaha hum se Abdul Aziz bin Abi Salamah ne byaan kiya , un se Hilal bin Abi Hilal ne , un se Ata bin Yasar aur un se Abdullah bin Amr bin al-Aas ne ke yeh aayat jo Quran mein hai «ya ayyuhan-nabiyyu inna arsalnaaka shaahidan wa mubashshiran wa nazheeran» ”Ae Nabi! Beshak hum ne Aap ko gawahi dene wala aur darane wala bana kar bheja hai .“ To Nabi Karim salla Allahu alaihi wasallam ke mutalliq yahi Allah Ta'ala ne Taurat mein bhi farmaya tha ”Ae Nabi! Beshak hum ne Aap ko gawahi dene wala aur bisharat dene wala aur un-parhon (Arabon) ki hifazat karne wala bana kar bheja hai . Aap mere bande hain aur mere Rasool hain . Main ne Aap ka naam Mutawakkil rakkha , Aap na bad-kho hain aur na sakht dil aur na bazaron mein shor karne wale aur na woh burayi ka badla burayi se dein ge balkay maafi aur darguzar se kaam lein ge aur Allah in ki rooh is waqt tak qabz nahi kare ga jab tak ke woh kajj qaum (Arbi) ko seedha na kar lein yani jab tak woh in se «la ilaha illallah» ka iqrar na kara lein pas is kalma e tawheed ke zariye woh andhi aankhon ko aur behre kaanon ko aur parda pare huay dilon ko khol dein ge .“

Hum se Ubaydullah bin Musa ne byaan kiya , un se Israeel ne , un se Abu Ishaq ne aur un se Bara razi Allahu anhu ne byaan kiya ke Nabi Karim salla Allahu alaihi wasallam ke ek sahabi (Usayd bin Huzayr razi Allahu anhu raat mein Surah al-Kahf) parh rahe thay . Un ka ek ghora jo ghar mein bandha hua tha badakne laga to woh sahabi niklay unhon ne koi khaas cheez nahi dekhi woh ghora phir bhi badak raha tha . Subah ke waqt woh sahabi Nabi Karim salla Allahu alaihi wasallam ki khidmat mein hazir huay aur raat ka waqia byaan kiya . Aap salla Allahu alaihi wasallam ne farmaya ke woh cheez (jis se ghora badka tha) sakinat thi jo Quran ki wajah se nazil hui .

Hum se Qutaybah bin Saeed ne byaan kiya , kaha hum se Sufyan ne byaan kiya , un se Amr ne aur un se Jabir razi Allahu anhu ne byaan kiya ke Sulah Hudaybiyah ke mauqa par lashkar mein hum (Musalman) ek hazar char sau thay .

Hum se Ali bin Abdullah ne byaan kiya , kaha hum se Shababah ne byaan kiya , kaha hum se Shubah ne byaan kiya , un se Qatadah ne byaan kiya , unhon ne Uqbah bin Sahban se suna aur unhon ne Abdullah bin Mugaffal Mazni razi Allahu anhu se , unhon ne kaha ke main darakht ke neeche bai'at mein maujood tha , Rasool Allah salla Allahu alaihi wasallam ne do ungliyon ke darmiyan kankari le kar phenkne se mana farmaya .

Aur Uqbah bin Sahban ne byaan kiya ke main ne Abdullah bin Mugaffal Mazni razi Allahu anhu se ghusl-khana mein peshab karne ke mutalliq suna . Yani yeh ke Aap ne is se mana farmaya .

Mujh se Muhammad bin Waleed ne byaan kiya , kaha hum se Muhammad bin Jafar ne byaan kiya , kaha hum se Shubah ne byaan kiya , un se Khalid ne , un se Abu Qulabah ne aur un se Sabit bin Dahhak ne aur woh (Sulah Hudaybiyah ke din) darakht ke neeche bai'at karne walon mein shamil thay .

Hum se Ahmad bin Ishaq Salmi ne byaan kiya , kaha hum se Yala ne , kaha hum se Abdul Aziz bin Siyah ne , un se Habib bin Sabit ne , ke main Abu Wail razi Allahu anhu ki khidmat mein ek masla poochne ke liye (Khawarij ke mutalliq) gaya , unhon ne farmaya ke hum Maqam e Siffeen mein parao dalay huay thay (jahan Ali aur Muawiyah razi Allahu anhuma ki jang hui thi) ek shakhs ne kaha ke Aap ka kya khayal hai agar koi shakhs Kitab Allah ki taraf sulah ke liye bulaye ? Ali razi Allahu anhu ne farmaya khair hai . Lekin Khawarij ne Muawiyah razi Allahu anhu ke khilaf Ali razi Allahu anhu ke saath thay is ke khilaf aawaz uthayi . Is par Sahl bin Hunayf ne farmaya tum pehle apna jaiza lo . Hum log Hudaybiyah ke mauqa par maujood thay Aap ki murad is sulah se thi jo Maqam e Hudaybiyah mein Nabi Karim salla Allahu alaihi wasallam aur mushrikeen ke darmiyan hui thi aur jang ka mauqa aata to hum is se peeche hatne wale nahi thay . (lekin sulah ki baat chali to hum ne is mein bhi sabr o sabat ka daman hath se nahi chhora) itne mein Umar razi Allahu anhu Nabi Karim salla Allahu alaihi wasallam ki khidmat mein hazir huay aur arz kiya kya hum haq par nahi hain ? Aur kya kuffar baatil par nahi hain ? Kya hamare maqtooleen jannat mein nahi jayein ge aur kya un ke maqtooleen dozakh mein nahi jayein ge ? Nabi Karim salla Allahu alaihi wasallam ne farmaya ke kyun nahi! Umar razi Allahu anhu ne kaha phir hum apne deen ke baare mein zillat ka mazahira kyun karein (yani dabb kar sulah kyun karein) aur kyun wapas jayein , jabke Allah Ta'ala ne hamain is ka hukm farmaya hai . Nabi Karim salla Allahu alaihi wasallam ne farmaya: Ae Ibn e Khattab! Main Allah ka Rasool hoon aur Allah Ta'ala mujhe kabhi zaya nahi kare ga . Umar razi Allahu anhu Nabi Karim salla Allahu alaihi wasallam ke paas se wapas aa gaye un ko ghussa aa raha tha , sabr nahi aaya aur Abu Bakr razi Allahu anhu ke paas aaye aur kaha , Ae Abu Bakr! Kya hum haq par aur woh baatil par nahi hain ? Abu Bakr ne bhi wahi jawab diya ke Ae Ibn e Khattab! Nabi Karim salla Allahu alaihi wasallam Allah ke Rasool hain aur Allah unhein hargiz zaya nahi kare ga . Phir Surah al-Fatah nazil hui .