Hum se Humaydi ne byaan kiya , unhon ne kaha hum se Sufyan ne byaan kiya , unhon ne kaha ke hum se Mansoor ne byaan kiya , unhon ne kaha ke hum se Mujahid ne byaan kiya , un se Abu Mamar ne aur un se Abdullah razi Allahu anhu ne byaan kiya ke Khana Kaaba ke paas do Qurayshi aur ek Saqafi ya ek Qurayshi aur do Saqafi mard baithe huay thay . Un ke pait bahut mote thay lekin aqal se kore . Ek ne in mein se kaha , tumhara kya khayal hai kya Allah hamari baaton ko sun raha hai ? Doosre ne kaha agar hum zor se bolein to sunta hai lekin aahista bolein to nahi sunta . Teesre ne kaha agar Allah zor se bolne par sun sakta hai to aahista bolne pe bhi zaroor sunta ho ga . Is par yeh aayat utri «wa ma kuntum tastatiroona an yash-hada alaykum sam-ukum wa la absaarukum wa la juloodukum» ke ”aur tum is baat se apne ko chhupa hi nahi sakte ke tumhare kaan aur tumhari aankhein aur tumhare chamre gawahi dein ge .“ Aakhir aayat tak . Sufyan hum se yeh hadees byaan karte thay aur kaha ke hum se Mansoor ne ya Ibn Najeeh ne ya Humayd ne in mein se kisi ek ne ya kisi do ne yeh hadees byaan ki , phir Aap Mansoor hi ka zikr karte thay aur doosron ka zikr ek se zyada martaba nahi kiya .

Hum se Amr bin Ali ne byaan kiya , kaha hum se Yahya ne byaan kiya , kaha hum se Sufyan Sawri ne byaan kiya , kaha ke mujh se Mansoor ne byaan kiya , un se Mujahid ne , un se Abu Mamar ne aur un se Abdullah bin Masood razi Allahu anhu ne pehli hadees ki tarah byaan kiya .

Ibn Abbas razi Allahu anhuma se «aqeeman» ke maani baanjh manqool hain . «roohan min amrina» mein «roohun» se Quran Majeed murad hai . Aur Mujahid ne kaha «yazhra'ukum feehi» ka matlab yeh hai ek nasl ke baad doosri nasl phailata rahe ga . «la hujjata baynana» yani ab hum mein aur tum mein koi jhagra nahi raha . «tarfin khafiyyin» kamzor ki nigah se , duzdida nazar se . Auron ne kaha «fa-yazhlalna rawakida ala zhahrihi» ka matlab yeh hai ke apne maqam par maujon ke thaperon se hilti rahein na aage barhein na peeche hatein . «shara'oo» naya deen nikala .

Hum se Muhammad bin Bashar ne bayan kiya, kaha hum se Muhammad bin Jafar ne bayan kiya, kaha ke hum se Shubah ne, in se Abd-ul-Malik bin Maysarah ne bayan kiya ke main ne Taoos se suna ke Ibn Abbas razi Allahu anhuma se Allah Ta'ala ke irshad «il-lal-mawaddata fil-qurbaa» ”siwa rishta-dari ki mohabbat ke“ mutalliq poochha gaya to Saeed bin Jubayr ne farmaya ke Aal e Muhammad salla Allahu alaihi wasallam ki qarabath-dari murad hai. Ibn Abbas razi Allahu anhuma ne is par kaha ke tum ne jald-baazi ki. Quraish ki koi shakh aaisi nahi jis mein Nabi Karim salla Allahu alaihi wasallam ki qarabath-dari na ho. Nabi Karim salla Allahu alaihi wasallam ne in se farmaya ke tum se sirf yeh chahta hoon ke tum is qarabath-dari ki wajah se sila-rahmi ka muamla karo jo mere aur tumhare darmiyan mein maujood hai.

Mujahid ne kaha ke «ala ummatin» ke maani ek Imam par ya ek millat par ya ek deen par . «wa qeelihi ya rabbi» ka maani hai kya kafir log yeh samajhte hain ke hum un ki aahista baatein aur un ki kaana phuusi aur un ki guftagu nahi sunte (yeh tafseer is qirat par hai jab «wa qeelahu» ba-nasb laam parha jaye . Is halat mein «wa sirrahum wa najwaahum» par atf ho ga aur mashhoor qirat «wa qeelihi» ba-kasr laam hai . Is surat mein yeh «as-saati» par atf ho ga yani Allah Ta'ala un ki guftagu bhi jaanta hai aur sunta hai) . Aur Ibn Abbas razi Allahu anhuma ne kaha «wa lau la an yakoonan-naasu ummatan waahidatan» ka matlab yeh hai agar yeh baat na hoti ke sab logon ko kafir hi bana dalta to main kafiron ke gharon mein chaandi ki chhatein aur chaandi ki seerhiyaan kar deta . «ma'arija» ke maani seerhiyaan , takht waghaira . «muqrineena» zor wale . «aasafuna» hamain ghussa dilaya . «yashu» andha ban jaye . Mujahid ne kaha «afanadribu ankumuzh-zhikra» ka matlab yeh hai ke kya tum yeh samajhte ho ke tum Quran ko jhutlate raho ge aur hum tum par azab nahi utarein ge (tum ko zaroor azab ho ga) . «wa mada masalul awwaleena» aglon ke qisse kahaniyaan chal parein . «wa ma kunna lahu muqrineena» yani oont ghore , khachar aur gadhoon par hamara zor aur qaboo na chal sakta tha . «yunash-sha'u fil hilyati» se betiyaan murad hain , yani tum ne beti zaat ko Allah ki aulad thehraya , wah wah kya achha hukm lagate ho . «lau shaa'ar-rahmaanu ma abadh-naahum» mein «hum» ki zameer buton ki taraf phirti hai kyunke aage farmaya «ma lahum bi-zhaalika min ilmin» yani buton ko jin ko yeh poojte hain kuch bhi ilm nahi hai woh to bilkul be-jaan hain «fee aqibihi» is ki aulad mein . «muqtarineena» saath saath chalte huay . «salafan» se murad Firaun ki qaum hai . Woh log jo Muhammad salla Allahu alaihi wasallam ki ummat mein kafir hain un ke peshwa yani agle log thay . «wa masalan lil-aakhireena» yani pichhlon ki ibrat aur misal . «yasuddoona» chillane lage , shor o ghul karne lage . «mubrimoona» thaanne wale , qarar dene wale . «awwalul aabideena» sab se pehle iman lane wala . «innani bara'un mimma ta'budoona» Arab log kehte hain hum tum se «bara'un» hain hum tum se «khala'un» hain yani bezar hain , alag hain , kuch gharz wasta tum se nahi rakhte . Wahid , tasniya , jama , muzakkar wa muannas sab mein «bara'un» ka lafz bola jata hai kyunke «bara'un» masdar hai . Aur agar «baree'un» parha jaye jaise Ibn Masood razi Allahu anhu ki qirat hai tab to tasniya mein «baree'aani» aur jama mein «baree'oona» kehna chahiye . «az-zukhrufu» ke maani sona . «mala'ikatuy yakhl-u-foona» yani farishte jo ek ke peeche ek aate rehte hain .

Hum se Hajjaj bin Minhal ne byaan kiya , kaha hum se Sufyan bin Uyaynah ne byaan kiya , un se Amr ne , un se Ata ne , un se Safwan bin Yala ne aur un se un ke walid ne ke main ne Rasool Allah salla Allahu alaihi wasallam ko mimbar par yeh aayat parhte suna «wa naadau ya maaliku liyaqdi alayna rabbuka» ”aur yeh log pukarein ge ke Ae Maalik! Tumhara Parvardigar hamara kaam hi tamam kar de .“ Aur Qatadah ne kaha «masalan lil-aakhireena» yani pichhlon ke liye nasihat . Doosre ne kaha «muqrineena» ka maani qaboo mein rakhne wale . Arab log kehte hain fulaana fulaane ka «muqrinun» hai yani is par ikhtiyar rakhta hai (is ko qaboo mein laya hai) . «akwaabun» woh kooze jin mein tonti na ho balkay munh khula hua ho jahan se aadmi chahe piye . «in kaana lir-rahmaani waladun» ka maani yeh hai ke is ki koi aulad nahi hai . (is surat mein «in» nafiya hai) «aabideena» se «aanifeena» murad hai . Yani sab se pehle main is se «aar» karta hoon . Is mein do lughat hain «aabidun wa abidun» aur Abdullah bin Masood razi Allahu anhu ne is ko «wa qaalar-rasoolu ya rabbi» parha hai . «awwalul aabideena» ke maani sab se pehla inkar karne wala yani agar Khuda ki aulad sabit karte ho to main is ka sab se pehla inkari hoon . Is surat mein «aabideena» baab «abada yabudu» se aaye ga aur Qatadah ne kaha «fee ummil kitabi» ka maani yeh hai ke majmu-i kitab aur asal kitab (yani Lauh e Mahfooz mein) .

«musrifeena» se murad mushrikeen hain . Wallah agar yeh Quran utha liya jata jabke ibtida mein Quraysh ne usay radd kar diya tha to sab halak ho jate . «fa-ahlakna ashaddu minhum bat-shan wa mada masalul awwaleena» mein «masalun» se azab murad hai . «juz-an» bamaani «adlan» yani shareek .

Mujahid ne kaha «rahwan» ka maani rasta . «alal aalameena» se murad un ke zamane ke log hain . «fatiloohu» ke maani un ko dhakel do . «wa zawwajnaahum bi-hoorin» ka matlab hum ne bari bari aankhon wali hooron se un ka jora mila diya jin ka jamal dekhne se aankhon ko hairat hoti hai . «tarjumooni» mujh ko qatl karo . «rahwan» thama hua . Ibn Abbas razi Allahu anhuma ne kaha «kal-muhli» yani kala til-chhat ki tarah . Auron ne kaha «tubbaun» se Yaman ke baadshah murad hain . Un ko «tubbaun» is liye kaha jata tha ke ek ke baad ek baadshah hota aur saya ko bhi «tubbaun» kehte hain kyunke woh sooraj ke saath rehta hai .

Hum se Abdan ne byaan kiya , un se Abu Hamzah ne , un se Aamash ne , un se Muslim ne , un se Masrooq ne aur un se Abdullah bin Masood razi Allahu anhu ne ke (Qayamat ki) paanch alamaat guzar chuki hain «ad-dukhaanu» dhuwaan , «ar-roomu» ghalba e Room , «al-qamaru» chaand ka tukre hona , «wal bat-shatu» pakar aur «wal lizaamu» halakat aur qaid .

Hum se Abdan ne bayan kiya, in se Abu Hamza ne, in se Aamash ne, in se Muslim ne, in se Masrooq ne aur in se Abdullah bin Masood razi Allahu anhu ne ke (Qayamat ki) paanch alamaatein guzar chuki hain «ad-dukhaanu» dhuwan, «ar-roomu» ghalba e Room, «al-qamaru» chaand ka tukre hona, «wal-bat-shatu» pakar aur «wal-lizhaamu» halakat aur qaid.