Hum se Abu al-Yaman ne byaan kiya , kaha hum ko Shuayb ne khabar di , unhein Zuhri ne , un se Urwah bin Zubayr ne byaan kiya , un se Aisha razi Allahu anha ne byaan kiya ke parda ka hukm nazil hone ke baad Abu al-Quays ke bhai Aflah razi Allahu anhu ne mujh se milne ki ijazat chaahi , lekin main ne kahlwa diya ke jab tak is silsile mein Rasool Allah salla Allahu alaihi wasallam se ijazat haasil na le loon , un se nahi mil sakti . Main ne socha ke un ke bhai Abu al-Quays ne mujhe thora hi doodh pilaya tha , doodh pilane wali to Abu al-Quays ki biwi thi . Phir Nabi Karim salla Allahu alaihi wasallam tashreef laye to main ne Aap se arz kiya ke ya Rasool Allah! Abu al-Quays ke bhai Aflah razi Allahu anhu ne mujh se milne ki ijazat chaahi , lekin main ne yeh kahlwa diya ke jab tak Nabi Karim salla Allahu alaihi wasallam se ijazat na le loon un se mulaqat nahi kar sakti . Is par Nabi Karim salla Allahu alaihi wasallam ne farmaya ke apne chacha se milne se tum ne kyun inkar kar diya . Main ne arz kiya: ya Rasool Allah! Abu al-Quays ne mujhe thora hi doodh pilaya tha , doodh pilane wali to un ki biwi thien . Nabi Karim salla Allahu alaihi wasallam ne farmaya unhein andar aane ki ijazat de do woh tumhare chacha hain . Urwah ne byaan kiya ke isi wajah se Aisha razi Allahu anha farmati thien ke raza'at se bhi woh cheezin (maslan nikah waghaira) haram ho jati hain jo nasab ki wajah se haram hoti hain .

Abu al-Aaliyah ne kaha lafz «salatun» ki nisbat agar Allah ki taraf ho to is ka matlab yeh hota hai ke woh Nabi ki farishton ke samne sana o tareef karta hai aur agar malaika ki taraf ho to dua e rahmat is se murad li jati hai . Ibn Abbas razi Allahu anhuma ne kaha ke (aayat mein) «yusalloona» bamaani barkat ki dua karne ke hai . «lanughriyannaka» ay «lanusallitannaka» . Yani hum tujh ko zaroor un par musallat kar dein ge .

Mujh se Saeed bin Yahya ne byaan kiya , kaha mujh se mere walid ne byaan kiya , kaha hum se Misar ne byaan kiya , un se Hakam ne , un se Ibn Abi Layla ne aur un se Kabb bin Ujrah razi Allahu anhu ne ke arz kiya gaya: ya Rasool Allah! Aap par salam ka tariqa to hamain maloom ho gaya hai , lekin Aap par «salatun» ka kya tariqa hai . Nabi Karim salla Allahu alaihi wasallam ne farmaya ke yun parha karo «allahumma salli ala muhammadin wa ala aali muhammadin , kama sallayta ala aali Ibraheema , innaka hameedum majeedun , allahumma baarik ala muhammadin wa ala aali muhammadin , kama baarakta ala aali Ibraheema , innaka hameedum majeedun» .

Hum se Abdullah bin Yusuf ne byaan kiya , unhon ne kaha hum se Layth bin Saad ne byaan kiya , unhon ne kaha ke mujh se Ibn al-Haad ne byaan kiya , un se Abdullah bin Khabbab ne aur un se Abu Saeed Khudri razi Allahu anhu ne byaan kiya ke hum ne arz kiya: ya Rasool Allah! Aap par salam bhejne ka tariqa to hamain maloom ho gaya hai . Lekin «salatun» (durood) bhejne ka kya tariqa hai ? Nabi Karim salla Allahu alaihi wasallam ne farmaya ke yun kaha karo «allahumma salli ala muhammadin abdika wa rasoolika , kama sallayta ala aali Ibraheema , wa baarik ala muhammadin wa ala aali muhammadin kama baarakta ala Ibraheema» . Abu Salih ne byaan kiya ke aur un se Layth bin Saad ne (in alfaz ke saath) «ala muhammadin wa ala aali muhammadin , kama baarakta ala aali Ibraheema» ke alfaz riwayat kiye hain .

Hum se Ibrahim bin Hamzah ne byaan kiya , kaha hum se Ibn Abi Hazim aur Darawardi ne byaan kiya , aur un se Yazid ne aur unhon ne is tarah byaan kiya ke «kama sallayta ala Ibraheema , wa baarik ala muhammadin wa aali muhammadin kama baarakta ala Ibraheema wa aali Ibraheema» is riwayat mein zara lafzon mein kami beshi hai aur in alfaz mein bhi yeh durood parhna jaiz hai maani mein koi farq nahi parta .

Hum se Ishaq bin Ibrahim ne byaan kiya , unhon ne kaha hum ko Rauh bin Ubadah ne khabar di , unhon ne kaha hum se Auf ne byaan kiya , un se Hasan Basri aur Muhammad bin Sireen aur Khallass ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke Musa alaihissalam bare ba-haya thay , unhi ke mutalliq Allah Ta'ala ka yeh irshad hai «ya ayyuhallazhina aamanu la takoonu kallazhina aazhau Musa fabarra'ahullahu mimma qaaloo wa kaana indallahi wajeehan» ke ”Ae Iman Walo! In logon ki tarah na ho jana jinon ne Musa alaihissalam ko eeza pahunchayi thi , so Allah ne unhein bari sabit kar diya aur Allah ke nazdeek woh bare izzat wale thay .“

«mu-aajizeena» ke maani aage barhne wale . «bi-mujizeena» hamare hath se nikal jaane wale . «sabaqoo» ke maani hamare hath se nikal gaye . «la yujizhoona» hamare hath se nahi nikal sakte . «yasbiqoona» hamain aajiz kar sakein ge . «bi-mujizeena» aajiz karne wale (jaise mashhoor qirat hai) aur «mu-aajizeena» (jo doosri qirat hai) is ka maani ek doosre par ghalba dhoondne wale ek doosre ka ajz zahir karne wale . «mishara» ka maani daswan hissa . «al-ukulu» phal . «ba'id» (jaise mashhoor qirat hai) aur «ba'ad» jo Ibn Kaseer ki qirat hai donon ka maani ek hai aur Mujahid ne kaha «la yazubu» ka maani is se ghaib nahi hota . «al-arimu» woh band ya ek laal pani tha jis ko Allah Paak ne band par bheja woh phat kar gir gaya aur maidan mein garha par gaya . Bagh donon taraf se oonche ho gaye phir pani ghaib ho gaya . Donon bagh sookh gaye aur yeh laal pani band mein se beh kar nahi aaya tha balkay Allah ka azab tha jahan se chaha wahan se bheja aur Amr bin Sharahbeel ne kaha «arimun» kehte hain band ko Yaman walon ki zaban mein . Doosre ne kaha ke «arimun» ke maani naale ke hain . «as-sabighatu» ke maani zirhein . Mujahid ne kaha . «yujaaza» ke maani azab diye jate hain . «a-izhu-kum bi-waahidatin» yani main tum ko Allah ki itaat karne ki nasihat karta hoon . «masna» do do ko . «furaada» ek ek ko kehte hain . «at-tanaawushu» aakhirat se phir duniya mein aana (jo mumkin nahi hai) . «ma yashtahoona» un ki khwahishat maal o aulad duniya ki zaib o zeenat . «bi-ash-ya'ihim» un ki jorr wale doosre kafir . Ibn Abbas razi Allahu anhuma ne kaha «kal-jawabi» jaise pani bharne ke garhon jaise «jawba-tuhu» kehte hain hauz ko . Imam Bukhari rahmahullah ka yeh matlab nahi hai ke «jawabi» aur «jawba-tun» ka mada ek hai kyunke «jawabi» , «jaabiyatun» ka jama hai . Is ka ayn kalma baa aur «jawba-tun» ka ayn kalma wao hai . «khamtin» peelu ka darakht . «al-aslu» jhao ka darakht . «al-arimu» sakht zor ki (barish) .

Hum se Abdullah bin Zubayr Humaydi ne byaan kiya , kaha hum se Sufyan bin Uyaynah ne , kaha hum se Amr bin Dinar ne , kaha ke main ne Ikrimah se suna , woh byaan karte thay ke main ne Abu Hurairah razi Allahu anhu se suna , unhon ne byaan kiya ke Rasool Allah salla Allahu alaihi wasallam ne farmaya ke jab Allah Ta'ala aasman par kisi baat ka faisla karta hai to farishte Allah Ta'ala ke faisla ko sun kar jhukte huay aajzi karte huay apne bazu phar-pharate hain . Allah ka farman unhein is tarah sunayi deta hai jaise saaf chakne patthar par zanjeer chalane se aawaz paida hoti hai . Phir jab un ke dilon se ghabrahat door ho jati hai to woh aapas mein poochte hain ke tumhare Rabb ne kya farmaya ? Woh kehte hain ke haq baat ka hukm farmaya aur woh bahut ooncha , sab se bara hai phir un ki yahi guftagu chori chhupe sunne wale Shaytan sun bhaagte hain , Shaytan aasman ke neeche yun neeche oopar hote hain , Sufyan ne is mauqa par hatheli ko morr kar ungliyan alag alag kar ke shayateen ke jama hone ki kaifiyat batayi ke is tarah Shaytan ek ke oopar ek rehte hain . Phir woh Shaytan koi ek kalma sun lete hain aur apne neeche wale ko batate hain . Is tarah woh kalma saahir ya kaahin tak pahunchta hai . Kabhi to aisa hota hai ke is se pehle ke woh yeh kalma apne se neeche wale ko bataiyein aag ka gola unhein aa dabocha hai aur kabhi aisa hota hai ke jab woh bata lete hain to aag ka angara un par parta hai , is ke baad kaahin is mein sau jhoot mila kar logon se byaan karta hai (ek baat jab is kaahin ki sahih ho jati hai to un ke maanne walon ki taraf se) kaha jata hai ke kya isi tarah hamain se falan din kaahin nahi kaha tha , isi ek kalma ki wajah se jo aasman par shayateen ne suna tha kaahinon aur saahiron ki baat ko log sacha jaanne lagte hain .

Hum se Ali bin Abdullah Madini ne byaan kiya , kaha hum se Muhammad bin Hazim ne byaan kiya , kaha hum se Aamash ne byaan kiya , un se Amr bin Murrah ne , un se Saeed bin Jubayr ne aur un se Ibn Abbas razi Allahu anhuma ne byaan kiya ke ek din Rasool Allah salla Allahu alaihi wasallam Safa pahari par charhay aur pukara: ya sabahaahu! (logo dauro) is aawaz par Quraysh jama ho gaye aur poocha kya baat hai ? Nabi Karim salla Allahu alaihi wasallam ne farmaya ke tumhari kya rai hai agar main tumhein bataoon ke dushman subah ke waqt ya shaam ke waqt tum par hamla karne wala hai to kya tum meri baat ki tasdeeq nahi karo ge ? Unhon ne kaha ke hum Aap ki tasdeeq karein ge . Aap salla Allahu alaihi wasallam ne farmaya ke phir main tum ko sakht tareen azab (dozakh) se pehle darane wala hoon . Abu Lahab (mardood) bola tu halak ho ja , kya tu ne isi liye hamain bulaya tha . Is par Allah Paak ne aayat «tabbat yada abi lahabin» nazil farmayi .

Mujahid ne kaha «qitmeerun» ghulli ka chhaach (ghulli ka chhilka ya parda) . «musqalatun» bhaari bojh , lada hua . Auron ne kaha «harooro» din ki garmi jab sooraj nikla ho aur Abdullah bin Abbas razi Allahu anhuma ne kaha «haroorun» raat ki garmi aur «samoomun» din ki garmi . «gharaabeebu» , «ghirbeebun» ki jama hai bahut kale kale bilkul siyah .