«gheeda» ay «naqasa» kam kiya gaya .

Mujh se Ibrahim bin al-Munzhir ne byaan kiya , unhon ne kaha hum se Maan bin Esa ne byaan kiya , unhon ne kaha ke mujh se Imam Malik ne byaan kiya , un se Abdullah bin Dinar ne aur un se Abdullah bin Umar razi Allahu anhuma ne byaan kiya ke Rasool Allah salla Allahu alaihi wasallam ne farmaya ke ghaib ki paanch kunjiyan hain jinhein Allah ke siwa koi nahi jaanta . Allah ke siwa koi nahi jaanta ke kal kya hone wala hai , Allah ke siwa koi nahi jaanta ke auraton ke raham mein kya kami beshi hoti rehti hai , Allah ke siwa koi nahi jaanta ke barish kab barse gi , koi shakhs nahi jaanta ke is ki maut kahan ho gi aur Allah ke siwa koi nahi jaanta ke Qayamat kab qaim ho gi .

Ibn Abbas razi Allahu anhuma ne kaha «haadin» ka maani bulane wala , hidayat karne wala (Nabi o Rasool murad hain) . Aur Mujahid ne kaha «sadeedun» ka maani peep aur lahu . Aur Sufyan bin Uyaynah ne ke «uzkuroo niamatallahi alaykum» ka maani yeh hai ke Allah ki jo niamatein tumhare paas hain un ko yaad karo aur jo jo agle waqiaat is ki qudrat ke huay hain aur Mujahid ne kaha «min kulli ma sa'altumoohu» ka maani yeh hai ke jin jin cheezon ki tum ne raghbat ki «yabghoonaha iwajan» is mein kajji paida karne ki talash karte rehte hain . «wa izh ta'azhzana rabbukum» jab tumhare malik ne tum ko khabardar kar diya jatla diya . «raddoo aydeeahum fee afwaahihim» yeh Arab ki zaban mein ek masal hai . Is ka matlab yeh hai ke Allah ka jo hukm hua tha is se baaz rahe , baja na laye . «maqaami» woh jagah jahan Allah Paak is ko apne samne khara kare ga . «min wara'ihi» samne se . «lakum taba'un» , «taba'un» , «taabi'un» ki jama hai jaise «ghaybun» , «ghaa'ibun» ki . «bi-musrikhikum» Arab log kehte hain «istakhrakhani» yani is ne meri faryad sun li . «yastasrikhuhu» is ki faryad sunta hai donon «surakhun» se nikle hain ( «surakhun» ka maani faryad) . «wa la khilaalun» , «khaallat-hu» ka masdar hai aur «khullatun» ki jama bhi ho sakta hai (yani is din dosti na ho gi ya dostiyaan na hon gi) «uj-tussat» jarr se ukhaarr liya gaya .

Mujh se Ubayd bin Ismail ne byaan kiya , kaha hum se Abu Usamah ne , un se Ubaydullah ne , un se Nafi ne aur un se un ke walid (Abdullah bin Umar razi Allahu anhuma) ne byaan kiya ke hum Rasool Allah salla Allahu alaihi wasallam ki khidmat mein hazir thay , Aap salla Allahu alaihi wasallam ne daryaft farmaya: achha mujh ko batlao to woh kaun sa darakht hai jo Musalman ki manind hai jis ke patte nahi girte , har waqt mewa de jata hai ? Ibn Umar razi Allahu anhuma kehte hain mere dil mein aaya woh khajoor ka darakht hai magar main ne dekha ke Abu Bakr aur Umar razi Allahu anhuma baithe huay hain unhon ne jawab nahi diya to mujh ko in buzurgon ke samne kalam karna achha maloom nahi hua . Jab in logon ne kuch jawab nahi diya to Nabi Karim salla Allahu alaihi wasallam ne khud hi farmaya woh khajoor ka darakht hai . Jab hum is majlis se kharay huay to main ne apne walid Umar razi Allahu anhu se arz kiya: Baba jaan! Allah ki qasam! Mere dil mein aaya tha ke main keh doon woh khajoor ka darakht hai . Unhon ne kaha phir tu ne keh kyun na diya . Main ne kaha Aap logon ne koi baat nahi ki main ne aage barh kar baat karna munasib na jaana . Unhon ne kaha wah agar tu is waqt keh deta to mujh ko itne itne (laal laal oont ka) maal milne se bhi zyada khushi hoti .

Hum se Abu al-Waleed ne byaan kiya , unhon ne kaha hum se Shubah ne byaan kiya , unhon ne kaha ke mujhe Alqamah bin Marsad ne khabar di , unhon ne kaha ke main ne Saad bin Ubaydah se suna aur unhon ne Bara bin Azib razi Allahu anhu se ke Rasool Allah salla Allahu alaihi wasallam ne farmaya ke Musalman se jab qabr mein sawal ho ga to woh gawahi de ga ke Allah ke siwa koi mabood nahi aur yeh ke Muhammad Allah ke Rasool hain . Allah Ta'ala ke irshad «yusabbitullahullazhina aamanu bil-qaulis-sabiti fil-hayatid-dunya wa fil-aakhirati» ”Allah iman walon ki is pakki baat (ki barkat) se mazboot rakhta hai , dunyawi zindagi mein (bhi) aur aakhirat mein (bhi)“ ka yahi matlab hai .

«alam tara» ka maani «alam talam» yani kya tu ne nahi jaana . «alam tara kaifa» , «alam tara ilallazhina kharajoo» mein hai . «al-bawaru» ay «al-halaku» . «booran» ka maani halakat hai jo «baara yabooru» ka masdar hai . «qauman booran» ke maani halak hone wali qaum ke hain .

Hum se Ali bin Abdullah ne byaan kiya , kaha hum se Sufyan bin Uyaynah ne byaan kiya , un se Amr bin Dinar ne , un se Ata bin Abi Rabah ne aur unhon ne Ibn Abbas razi Allahu anhuma se suna ke aayat «alam tara ilallazhina baddaloo niamatallahi kufran» mein kuffar se Ahl e Makkah murad hain .

Mujahid ne kaha «siratun alayya mustaqeemun» ka maani sacha rasta jo Allah tak pahunchta hai . Allah ki taraf jata hai «la-bi-imamin mubeenin» yani khulay raste par . Aur Ibn Abbas razi Allahu anhuma ne kaha «la'amruka» ka maani yani teri zindagi ki qasam . «qaumun munkaroona» Loot ne un ko ajnabi pardesi samjha . Doosre logon ne kaha «kitabun maloomun» ka maani muayyan miad . «lauma ta'teena» kyun hamare paas nahi laata . «shiyaun» ummatein aur kabhi doston ko bhi «shiyaun» kehte hain aur Ibn Abbas razi Allahu anhuma ne kaha «yuhra'oona» ka maani daurte , jaldi karte . «lil-mutawassimeena» dekhne walon ke liye . «sukkirat» dhaanki gayin . «buroojan» , «burjun» yani sooraj chaand ki manzilein . «lawaaqihu» , «malaaqihu» ke maani mein hai jo «milfahatun» ki jama yani hamila karne wali . «hama-in» , «hamaatun» ki jama hai bad-boodar keechar . «masnoonin» qaalib mein dhaali gayi . «la taujal» mat darr . «daabiru aakhiri» (dum) . «la-bi-imamin mubeenin» Imam , woh shakhs jis ki tu pairwi kare is se raah paye . «as-sayhatu» halakat ke maani mein hai .

Hum se Ali bin Abdullah Madini ne byaan kiya , kaha hum se Sufyan bin Uyaynah ne byaan kiya , un se Amr bin Dinar ne , un se Ikrimah ne aur un se Abu Hurairah razi Allahu anhu ne Nabi Karim salla Allahu alaihi wasallam se ke Aap salla Allahu alaihi wasallam ne farmaya jab Allah Ta'ala aasman mein koi faisla farmata hai to malaika aajzi se apne par maarne lagte hain . Jaisa ke Allah Ta'ala ke irshad mein hai ke jaise kisi saaf chakne patthar par zanjeer ke (maarne se aawaz paida hoti hai) aur Ali bin Abdullah al-Madini ne byaan kiya ke Sufyan bin Uyaynah ke siwa aur rawiyon ne «safwaanin» ke baad «yanfuzhuhum zhaalika» (jis se un par dahshat tari hoti hai) ke alfaz kahe hain . Phir Allah Paak apna hukm farishton tak pahuncha deta hai , jab un ke dilon par se darr jata rehta hai to doosre door wale farishte nazdeek wale farishton se poochte hain Parvardigar ne kya hukm saadir farmaya . Nazdeek wale farishte kehte hain baja irshad farmaya aur woh ooncha hai bara . Farishton ki yeh baatein chori se baat urane wale Shaytan pa lete hain . Yeh baat urane wale Shaytan oopar tallay rehte hain (ek par ek) Sufyan ne apne dayein hath ki ungliyan khol kar ek par ek kar ke batlaya ke is tarah Shaytan oopar tallay reh kar wahan jate hain . Phir bhi kabhi aisa hota hai . Farishte khabar pa kar aag ka shola phenkte hain woh baat sunne wale ko is se pehle jala dalta hai ke woh apne peeche wale ko woh baat pahuncha de . Kabhi aisa hota hai ke woh shola us tak nahi pahunchta aur woh apne neeche wale Shaytan ko woh baat pahuncha deta hai , woh is se neeche wale ko is tarah woh baat zameen tak pahuncha dete hain . Yahan tak ke zameen tak aa pahunchti hai . (kabhi Sufyan ne yun kaha) Phir woh baat nujoomi ke munh par daali jati hai . Woh ek baat mein sau baatein jhoot apni taraf se mila kar logon se byaan karta hai . Koi koi baat is ki sach nikalti hai to log kehne lagte hain dekho is nujoomi ne falan din hamain yeh khabar di thi ke aainda aisa aisa ho ga aur waisa hi hua . Is ki baat sach nikli . Yeh woh baat hoti hai jo aasman se churayi gayi thi .

Hum se Ali bin Abdullah ne byaan kiya , kaha hum se Sufyan bin Uyaynah ne byaan kiya , un se Amr bin Dinar ne , un se Ata bin Abi Rabah ne aur unhon ne Ibn Abbas razi Allahu anhuma se suna ke aayat «alam tara ilallazhina baddaloo niamatallahi kufran» mein kuffar se Ahl e Makkah murad hain .